തൃശ്ശൂര്‍: (KVARTHA) ചേലക്കര ഉപതെരഞ്ഞെടുപ്പില്‍ പി.വി. അന്‍വര്‍ (PV Anvar) എംഎല്‍എ പൊലീസ് വിലക്ക് ലംഘിച്ച് വാര്‍ത്താസമ്മേളനം നടത്തി. എല്‍ഡിഎഫിനെ പ്രതിരോധത്തിലാക്കി മദ്യവും പണവും വിതരണം ചെയ്യുന്നുവെന്ന ഗുരുതര ആരോപണമാണ് പാര്‍ട്ടിക്കെതിരെ അദ്ദേഹം ഉന്നയിച്ചത്.

തെരഞ്ഞെടുപ്പ് ചട്ടങ്ങള്‍ ലംഘിക്കുന്നില്ലെന്ന് വാദിച്ച അന്‍വര്‍, മുഖ്യമന്ത്രി പിണറായി വിജയന്റെ ഇടപെടലാണ് തന്റെ വാര്‍ത്താസമ്മേളനം തടയാന്‍ ശ്രമിക്കുന്നതെന്ന് ആരോപിച്ചു. വാര്‍ത്താ സമ്മേളനം തടയാന്‍ തിരഞ്ഞെടുപ്പ് ഉദ്യോഗസ്ഥരും സ്ഥലത്തെത്തി. തുടര്‍ന്ന് തിരഞ്ഞെടുപ്പ് ഉദ്യോഗസ്ഥരുടെ നിര്‍ദ്ദേശങ്ങള്‍ അവഗണിച്ച അദ്ദേഹത്തിന് നോട്ടീസ് നല്‍കി.

എന്തിനാണ് പിണറായി ഭയക്കുന്നതെന്ന് അന്‍വര്‍ വാര്‍ത്താസമ്മേളനത്തില്‍ ചോദിച്ചു. ഇന്ന് പ്രചരണം നടത്തരുതെന്ന് ചട്ടം പറയുന്നില്ല. കോണ്‍ഗ്രസില്‍ നിന്ന് വന്ന ഏതോ ഒരു അലവലാതിയുമായി എന്തിനാണ് ഏറ്റുമുട്ടാന്‍ നില്‍ക്കുന്നത്. 

ചെറുതുരുത്തിയില്‍ നിന്നും കിട്ടിയ പണം ആരുടേതാണെന്ന് ചോദിച്ചുകൊണ്ട്, എല്‍ഡിഎഫ് കോളനികളില്‍ പണം വിതരണം ചെയ്യുന്നതായി അന്‍വര്‍ ആരോപിച്ചു. തിരഞ്ഞെടുപ്പ് സ്ലിപ്പുകള്‍ക്കൊപ്പം പണം നല്‍കുന്നതായും അദ്ദേഹം പറഞ്ഞു. മദ്യവും പണവും ഒഴുക്കി വോട്ട് പിടിക്കുകയാണ് എല്‍ഡിഎഫെന്നും അന്‍വര്‍ ആരോപിച്ചു.

ഒരു സ്ഥാനാര്‍ത്ഥിക്ക് ഉപതെരഞ്ഞെടുപ്പില്‍ 40 ലക്ഷം രൂപ ചെലവഴിക്കാന്‍ അനുവദനീയമാണെങ്കില്‍, മൂന്ന് മുന്നണികളും ചേര്‍ന്ന് ചേലക്കരയില്‍ 36 കോടി രൂപ ചെലവഴിച്ചുവെന്നും അന്‍വര്‍ വാദിച്ചു. ഈ മണ്ഡലത്തില്‍ ആരും ജയിക്കില്ലെന്നും കോടതിയില്‍ പോകുമെന്നും അദ്ദേഹം പറഞ്ഞു. ബൂത്ത് തിരിച്ച് ഓരോ പാര്‍ട്ടിയും ചെലവാക്കിയ തുകയുടെ കണക്ക് തന്റെ കയ്യിലുണ്ടെന്നും അന്‍വര്‍ പറഞ്ഞു.

#KeralaPolitics #ChelakkaraBypoll #PVAnvar #LDF #electionmalpractices #corruption #Kerala