പത്തനംതിട്ട: (KVARTHA) ശബരിമല സ്വർണക്കൊള്ള കേസിൽ ദേവസ്വം ബോർഡ്‌ മുൻ പ്രസിഡൻ്റ്‌ എൻ വാസുവിനെ പ്രത്യേക അന്വേഷണ സംഘം അറസ്റ്റ്‌ ചെയ്തു. തുടർച്ചയായ രണ്ട്‌ ദിവസത്തെ ചോദ്യം ചെയ്യലിന്‌ ശേഷമാണ്‌ വാസുവിൻ്റെ അറസ്റ്റ്‌ ചൊവ്വാഴ്ച (11.11.2025) രേഖപ്പെടുത്തിയിരിക്കുന്നത്‌. വാസുവിനെ റാന്നി കോടതിയിൽ ഹാജരാക്കും.

ക്രൈം ബ്രാഞ്ച്‌ ഓഫീസിൽ വെച്ചായിരുന്നു എൻ വാസുവിനെ ചോദ്യം ചെയ്തത്‌. ശബരിമല ശ്രീകോവിലിലെ കട്ടിളപ്പാളിയിലെ സ്വർണം ചെമ്പെന്ന്‌ രേഖപ്പെടുത്തിയത്‌ വാസുവിൻ്റെ നിർദേശപ്രകാരമാണെന്ന വിവരം പ്രത്യേക അന്വേഷണ സംഘത്തിന്‌ ലഭിച്ചിരുന്നു. പിന്നാലെയായിരുന്നു വാസുവിനെ ചോദ്യം ചെയ്യലിന്‌ വിളിപ്പിച്ചത്‌.

മൊഴിയും കത്തും നിർണായകം

ദേവസ്വം ബോർഡ്‌ മുൻ എക്സിക്യൂട്ടീവ്‌ ഓഫീസർ സുധീഷ്‌ കുമാറും ദേവസ്വം ബോർഡ്‌ മുൻ അഡ്മിനിസ്‌ട്രേറ്റീവ്‌ ഓഫീസറുമായ മുരാരി ബാബുവുമാണ്‌ വാസുവിനെതിരെ നിർണായക മൊഴി നൽകിയത്‌. സ്വർണക്കൊള്ളയുമായി ബന്ധപ്പെട്ട വിവരങ്ങൾ എൻ വാസുവിന്‌ അറിയാമായിരുന്നു എന്നായിരുന്നു സുധീഷ്‌ കുമാർ എസ്‌ ഐ ടിക്ക്‌ നൽകിയ മൊഴി.

ഇതിൻ്റെ അടിസ്ഥാനത്തിൽ സുധീഷ്‌ കുമാറിൻ്റെ വീട്ടിൽ എസ്‌ ഐ ടി പരിശോധന നടത്തിയിരുന്നു. ഇതിൽ വാസുവിൻ്റെ കൈപ്പടയിൽ എഴുതിയ ഒരു കത്ത്‌ അന്വേഷണ സംഘം കണ്ടെത്തി. നേരത്തേ ചോദ്യം ചെയ്യാൻ വിളിപ്പിച്ചപ്പോൾ എസ്‌ ഐ ടി ഇതേപ്പറ്റി വാസുവിനോട്‌ ചോദിച്ചിരുന്നു. എന്നാൽ അദ്ദേഹം ഇത്‌ നിഷേധിക്കുകയായിരുന്നു ചെയ്തത്‌.

വാസുവിൻ്റെ മുൻ പദവികൾ

സംഭവുമായി ബന്ധപ്പെട്ട്‌ അറസ്റ്റിലായ എൻ വാസു 2018 ഫെബ്രുവരി മുതൽ 2019 മാർച്ച്‌ വരെ ദേവസ്വം കമ്മീഷണറായി പ്രവർത്തിച്ചിട്ടുണ്ട്‌. 2019 നവംബർ മുതൽ രണ്ട്‌ വർഷം അദ്ദേഹം ദേവസ്വം ബോർഡ്‌ പ്രസിഡൻ്റായും പ്രവർത്തിച്ചു. പി കെ ഗുരുദാസൻ എക്സൈസ്‌ മന്ത്രിയായിരുന്ന സമയത്ത്‌ വാസു പേഴ്സണൽ സ്റ്റാഫ്‌ അംഗമായി സേവനമനുഷ്ഠിച്ചിട്ടുണ്ട്‌ എന്ന വിവരവും അധികൃതർ പുറത്തുവിട്ടു.

ശബരിമല സ്വർണക്കൊള്ള കേസിൻ്റെ ഗൗരവം എത്രത്തോളമാണ്‌? നിങ്ങളുടെ അഭിപ്രായം പങ്കുവെക്കുക.

Article Summary: Former Devaswom Board President N Vasu arrested in Sabarimala gold scam case.

#Sabarimala #GoldScam #N Vasu #DevaswomBoard #Arrest #CrimeBranch