തിരുവനന്തപുരം: (KVARTHA) ശബരിമല സ്വർണക്കൊള്ള കേസുമായി ബന്ധപ്പെട്ട് തിരുവിതാംകൂർ ദേവസ്വം ബോർഡ് മുൻ പ്രസിഡൻ്റ് എ പത്മകുമാറിൻ്റെ അറസ്റ്റ് പ്രത്യേക അന്വേഷണ സംഘം (SIT) രേഖപ്പെടുത്തി. വ്യാഴാഴ്ച രാവിലെ ചോദ്യം ചെയ്യലിനായി ഹാജരായ അദ്ദേഹത്തിൻ്റെ അറസ്റ്റ് വൈകുന്നേരം മൂന്ന് മണിയോടെയാണ്‌ ഉദ്യോഗസ്ഥർ രേഖപ്പെടുത്തിയത്. തിരുവനന്തപുരത്തെ രഹസ്യകേന്ദ്രത്തിൽ വെച്ചായിരുന്നു ചോദ്യം ചെയ്യൽ. സി പി എം പത്തനംതിട്ട ജില്ലാ കമ്മറ്റി അംഗവും മുൻ എം എൽ എയുമാണ്‌ പത്മകുമാർ.

ശബരിമല സ്വർണക്കൊള്ളക്കേസിൽ നേരത്തേ അറസ്റ്റിലായ പ്രതികളുടെ മൊഴികളെല്ലാം പത്മകുമാറിന് എതിരാണെന്നാണ്‌ എസ് ഐ ടിക്ക് ലഭിച്ച വിവരം. കേസിലെ പ്രധാന പ്രതികളിൽ ഒരാളായ ഉണ്ണികൃഷ്‌ണൻ പോറ്റിക്ക് ഒത്താശ (സഹായം) ചെയ്തത് പത്മകുമാറാണെന്നാണ്‌ പ്രത്യേക അന്വേഷണസംഘത്തിൻ്റെ വിലയിരുത്തൽ. പോറ്റിയും പത്മകുമാറും തമ്മിൽ സാമ്പത്തിക ഇടപാടുണ്ടായിരുന്നതായും എസ് ഐ ടിക്ക് സൂചന ലഭിച്ചിട്ടുണ്ട്.

സ്വർണം ചെമ്പാക്കിയതിന് പിന്നിൽ പത്മകുമാർ?

മുരാരി ബാബു മുതൽ എൻ വാസു വരെയുള്ള പ്രതികൾ പത്മകുമാറിന് എതിരെ മൊഴി നൽകിയിട്ടുണ്ടെന്നാണ്‌ സൂചന. ‘സ്വർണം ചെമ്പാക്കി ഉത്തരവിറക്കിയത് പത്മകുമാർ പറഞ്ഞിട്ടാണ്’ — എന്നാണ്‌ ഇവരുടെ മൊഴികളിലുള്ളതെന്നും റിപ്പോർട്ടുകളുണ്ട്. അറസ്റ്റിൻ്റെ പശ്ചാത്തലത്തിൽ പത്മകുമാറിൻ്റെ സാമ്പത്തിക സ്രോതസ്സുകളടക്കം എസ് ഐ ടി വിശദമായി അന്വേഷിച്ചുവരികയാണ്‌.

സ്വർണക്കൊള്ള കേസുമായി ബന്ധപ്പെട്ട് പത്മകുമാറിന് നേരത്തേ രണ്ട് തവണ എസ് ഐ ടി ചോദ്യം ചെയ്യലിന് ഹാജരാകാനായി നോട്ടീസ് നൽകിയിരുന്നു. മുൻ കമ്മീഷണർ എൻ വാസു അറസ്റ്റിലായതിന് പിന്നാലെയാണ്‌ പത്മകുമാറിന് രണ്ടാമതും നോട്ടീസ് നൽകിയത്. എൻ വാസു ദേവസ്വം ബോർഡ് കമ്മീഷണറായിരുന്ന സമയത്ത് പത്മകുമാറായിരുന്നു ബോർഡ് പ്രസിഡൻ്റ്.

സി പി എം നേതാവിൻ്റെ അറസ്റ്റfല്‍ നിങ്ങളുടെ അഭിപ്രായം കമൻ്റ് ചെയ്യുക.

Article Summary: Former TDB President A Padmakumar arrested in Sabarimala Gold Scam.

#SabarimalaGoldScam #APadmakumar #DevaswomBoard #SITArrest #KeralaCrime #PoliticalArrest