ടെല്‍ അവീവ്: (KVARTHA) ഹമാസിന്റെ രാഷ്ട്രീയ മേധാവി ഇസ്മാഈല്‍ ഹനിയ്യയെ വധിച്ചത് തങ്ങളാണെന്ന് ഇസ്രാഈല്‍ ആദ്യമായി പരസ്യമായി സമ്മതിച്ചു. ഇസ്രാഈല്‍ പ്രതിരോധ മന്ത്രി ഇസ്രായേല്‍ കാറ്റ്‌സ് ആണ് ഇക്കാര്യം വ്യക്തമാക്കിയത്. യെമനിലെ ഹൂതികള്‍ക്കും കടുത്ത പ്രഹരം നേരിടേണ്ടിവരുമെന്നും അദ്ദേഹം മുന്നറിയിപ്പ് നല്‍കി. തിങ്കളാഴ്ച വൈകുന്നേരം പ്രതിരോധ മന്ത്രാലയത്തിലെ ഉദ്യോഗസ്ഥരെ ആദരിക്കുന്ന ചടങ്ങില്‍ സംസാരിക്കുകയായിരുന്നു കാറ്റ്‌സ്. 

'തിന്മയുടെ അച്ചുതണ്ടിന് ഇസ്രാഈല്‍ കനത്ത പ്രഹരമേല്‍പ്പിച്ചു. യെമനിലെ ഹൂതി ഭീകര സംഘടനയ്ക്കും ഞങ്ങള്‍ കനത്ത തിരിച്ചടി നല്‍കും. അത് അവസാനമായിരിക്കും', അദ്ദേഹം പ്രഖ്യാപിച്ചു. ഹൂതികള്‍  ഇസ്രാഈലിനു നേരെ മിസൈലുകള്‍ തൊടുത്തുവിടുമ്പോള്‍, തന്റെ പ്രസ്താവനയുടെ തുടക്കത്തില്‍ തന്നെ അവര്‍ക്ക് വ്യക്തമായ ഒരു സന്ദേശം നല്‍കാന്‍ താന്‍ ആഗ്രഹിക്കുന്നുവെന്ന് കാറ്റ്‌സ് വ്യക്തമാക്കി. 

ഞങ്ങള്‍ ഹമാസിനെ പരാജയപ്പെടുത്തി, ഞങ്ങള്‍ ഹിസ്ബുല്ലയെ പരാജയപ്പെടുത്തി, ഞങ്ങള്‍ ഇറാന്റെ പ്രതിരോധ സംവിധാനങ്ങളെ തകര്‍ത്തു, ഉല്‍പാദന സംവിധാനങ്ങള്‍ തകര്‍ത്തു. സിറിയയിലെ ബശ്ശാറുല്‍  അസദ് ഭരണകൂടത്തെ താഴെയിറക്കി. ഹൂതികളുടെ തന്ത്രപ്രധാനമായ അടിസ്ഥാന സൗകര്യങ്ങള്‍ നശിപ്പിക്കുമെന്നും അവരുടെ നേതാക്കളുടെ തലയറുക്കുമെന്നും അദ്ദേഹം മുന്നറിയിപ്പ് നല്‍കി. 

ഹമാസിന്റെ ഗസ്സ തലവന്‍ യഹ്യ സിന്‍വാറിന്റെയും ഹിസ്ബുല്ല നേതാവ് ഹസ്സന്‍ നസ്റല്ലയുടെയും വധത്തെക്കുറിച്ചും അദ്ദേഹം സൂചിപ്പിച്ചു. ഹനിയ്യ, സിന്‍വാര്‍, നസ്റല്ല എന്നിവരെ ടെഹ്റാനിലും ഗസ്സയിലും ലെബനനിലും ചെയ്തതുപോലെ ഹൊദൈദയിലും സനയിലും ചെയ്യുമെന്നും കാറ്റ്‌സ് പറഞ്ഞു. കഴിഞ്ഞ മാസങ്ങളില്‍ ഹൂതികള്‍ ഇസ്രാഈലിനു നേരെ നിരവധി മിസൈല്‍ ആക്രമണങ്ങള്‍ നടത്തിയിരുന്നു. 

ശനിയാഴ്ച ടെല്‍ അവീവിനു നേരെ ഹൂതികള്‍ നടത്തിയ ആക്രമണം ഹൈപ്പര്‍സോണിക് ബാലിസ്റ്റിക് മിസൈല്‍ ആണെന്ന് അവര്‍ അവകാശപ്പെട്ടിരുന്നു. ഈ മിസൈല്‍ ഇസ്രാഈല്‍ പ്രതിരോധ സംവിധാനങ്ങളെ മറികടന്ന് ജാഫയിലെ ഒരു പൊതു പാര്‍ക്കില്‍ പതിക്കുകയും ഒരു ഡസനിലധികം ആളുകള്‍ക്ക് നിസ്സാര പരിക്കേല്‍ക്കുകയും ചെയ്തു.

ഇറാന്‍ പ്രസിഡന്റ് മസൂദ് പെസെഷ്‌കിയന്റെ സത്യപ്രതിജ്ഞ ചടങ്ങില്‍ പങ്കെടുക്കാന്‍ ടെഹ്റാന്‍ സന്ദര്‍ശിക്കുന്നതിനിടെ ജൂലൈ 31നാണ് ഇസ്മാഈല്‍ ഹനിയ്യ കൊല്ലപ്പെട്ടത്. ഇറാനിയന്‍ സ്റ്റേറ്റ് മീഡിയ റിപ്പോര്‍ട്ടുകള്‍ പ്രകാരം, പുലര്‍ച്ചെ രണ്ട് മണിയോടെ വടക്കന്‍ ടെഹ്റാനില്‍ അദ്ദേഹം താമസിച്ചിരുന്ന സൈനിക വിമുക്തഭടന്മാര്‍ക്കുള്ള പ്രത്യേക വസതിയില്‍ ആക്രമണ വസ്തു പതിച്ചാണ് ഹമാസ് നേതാവും അംഗരക്ഷകനും കൊല്ലപ്പെട്ടത്. 

ഇറാനും ഫലസ്തീനും ഈ കൊലപാതകത്തിന് പിന്നില്‍ ഇസ്രാഈല്‍ ആണെന്ന് ആരോപിച്ചിരുന്നു. എന്നാല്‍ ഇസ്രാഈല്‍ ഇതുവരെ പ്രതികരിച്ചിരുന്നില്ല. ഹനിയ്യയുടെ കൊലപാതകം ഫലസ്തീനില്‍ വ്യാപകമായ പ്രതിഷേധത്തിന് കാരണമാവുകയും ഇറാന്റെ പരമോന്നത നേതാവ് ആയത്തുല്ല അലി ഖമേനി പ്രതികാര നടപടികള്‍ സ്വീകരിക്കുമെന്ന് പ്രഖ്യാപിക്കുകയും ചെയ്തു. ഹമാസിന്റെയും ഹിസ്ബുല്ലയുടെയും നേതാക്കളെ കൊലപ്പെടുത്തിയതിന് പ്രതികാരമായി ഒക്ടോബറില്‍ ഇറാന്‍ നിരവധി ഇസ്രാഈലി നഗരങ്ങളില്‍ മിസൈല്‍ ആക്രമണം നടത്തിയിരുന്നു.

#Israel, #Hamas, #Houthi, #Yemen, #Iran, #MiddleEast, #conflict, #assassination