കോഴിക്കോട്: (KVARTHA) കനത്ത മഴയിൽ മലയോര മേഖലയിലടക്കം വിവിധ ജില്ലകളിൽ വ്യാപക നാശനഷ്ടമുണ്ടായി. സംസ്ഥാനത്ത് പല താഴ്ന്ന പ്രദേശങ്ങളിലും വെള്ളം കയറി. ഒൻപതാം വളവിന് താഴെ റോഡിലേക്ക് പാറക്കല്ലുകൾ പതിച്ചതിനെ തുടർന്ന് താമരശ്ശേരി ചുരത്തിൽ ഗതാഗത തടസ്സമുണ്ടായി. ഫയർഫോഴ്‌സ് സ്ഥലത്തെത്തി കല്ലുകൾ നീക്കം ചെയ്യാൻ ശ്രമം തുടങ്ങി.

നാലാം വളവിൽ റോഡിലേക്ക് മരം വീണു. ചുരം സംരക്ഷണ പ്രവർത്തകർ മരം മുറിച്ചുമാറ്റി ഗതാഗതം പുനഃസ്ഥാപിച്ചു. പാലക്കാട് പലയിടത്തും നെൽപാടങ്ങൾ വെള്ളത്തിനടിയിലായി. കോഴിക്കോട് കുറ്റ്യാടി അടുക്കത്ത് നീളം പാറ കമലയുടെ വീടിന് മുകളിൽ തെങ്ങ് വീണു. ശനിയാഴ്ച (26.07.2025) അർധരാത്രിയാണ് സംഭവം നടന്നത്. ഓടിട്ട വീടിന് മുകളിലാണ് തെങ്ങ് വീണത്; കുട്ടികളടക്കം തലനാരിഴയ്ക്കാണ് രക്ഷപ്പെട്ടത്. കോഴിക്കോട് വിലങ്ങാട് സ്വദേശി ജലജയുടെ വീടിന് മുകളിലേക്ക് മരം വീണ് വീട് തകർന്നു.

കോഴിക്കോടും മലയോര മേഖലയിൽ കനത്ത മഴ തുടരുകയാണ്. താമരശ്ശേരി ഉൾപ്പെടെയുള്ള മേഖലകളിൽ രാത്രിയിൽ അതിശക്തമായ മഴയുണ്ടായി. കനത്ത മഴയിൽ ചാലക്കുടിയിലെ താഴ്ന്ന പ്രദേശങ്ങളിൽ വെള്ളം കയറി; ചാലക്കുടി അണ്ടർ പാസിലും വെള്ളം കയറിയ നിലയിലാണ്. പാലക്കാട്ടും നെൽപാടങ്ങൾ വെള്ളത്തിനടിയിലായി.

കാലാവസ്ഥാ മുന്നറിയിപ്പുകളും നിയന്ത്രണങ്ങളും

അടുത്ത മൂന്ന് മണിക്കൂറിൽ കേരളത്തിലെ എല്ലാ ജില്ലകളിലും ഒറ്റപ്പെട്ട ഇടത്തരം മഴയ്ക്കും മണിക്കൂറിൽ 50 കിലോമീറ്റർ വരെ വേഗതയിൽ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് ഞായറാഴ്ച (27.07.2025) രാവിലെ ഏഴ് മണിക്ക് അറിയിച്ചു.

മഴയെത്തുടർന്ന് ചില നിയന്ത്രണങ്ങളും ഏർപ്പെടുത്തിയിട്ടുണ്ട്. ഇടുക്കിയിലെ മൂന്നാർ ഗ്യാപ് റോഡ് വഴിയുള്ള രാത്രി യാത്ര നിരോധിച്ചു. ജില്ലയിലെ ഖനന പ്രവർത്തനങ്ങളും തോട്ടം മേഖലയിലെ പുറം ജോലികൾക്കും നിയന്ത്രണം ഏർപ്പെടുത്തിയിട്ടുണ്ട്. പാലക്കാട് നെല്ലിയാമ്പതിയിൽ തത്കാലം വിനോദസഞ്ചാരികൾക്ക് പ്രവേശനമുണ്ടാകില്ല. എറണാകുളം ജില്ലയിൽ മലയോര പ്രദേശങ്ങളിലൂടെയുള്ള രാത്രികാല യാത്ര നിരോധിച്ചു.

മണ്ണിടിച്ചിലിൽ എറണാകുളം എടത്തലയിലെ ലൈജുവിന്റെ വീട് ഭാഗികമായി തകർന്നു. കണ്ണൂർ ഇരിട്ടി-തളിപ്പറമ്പ് സംസ്ഥാന പാതയിൽ വെള്ളം കയറി ഗതാഗതം തടസ്സപ്പെട്ടു. നിരവധി വീടുകളിലും വെള്ളം കയറിയിട്ടുണ്ട്. പഴശ്ശി ഡാമിന്റെ താഴെയുള്ള പ്രദേശങ്ങളിലാണ് വെള്ളം കയറിയത്. ഇരിക്കൂർ പടയങ്കോട് അംഗനവാടി വെള്ളത്തിൽ മുങ്ങി.

അട്ടപാടിയിൽ വൈദ്യുതി പോസ്റ്റുകളടക്കം തകർന്നതോടെ വൈദ്യുതിബന്ധം വിച്ഛേദിക്കപ്പെട്ടു. രണ്ടു ദിവസമായി പ്രദേശത്ത് വൈദ്യുതിയില്ല. രാത്രി കനത്ത കാറ്റും മഴയുമുണ്ടായിരുന്നു. മലപ്പുറത്ത് രാവിലെ മുതൽ മഴ ശക്തമാണ്. തീരദേശ മേഖലയിൽ കടലാക്രമണം രൂക്ഷമാണ്.

പാലക്കാട് വീടിനു മുകളിൽ മരം വീണ് ചന്ദ്രനഗർ കുപ്പിയോട് കനാൽവരമ്പിലെ സരോജിനിക്ക് പരിക്കേറ്റു. അപകടത്തിൽ സരോജിനിയുടെ കൊച്ചുമകൾ തലനാരിഴയ്ക്കാണ് രക്ഷപ്പെട്ടത്.

കോഴിക്കോട് മാവൂർ കച്ചേരിക്കുന്നിൽ മൂന്ന് വീടുകളിൽ വെള്ളം കയറി. ചാലിയാറും ചെറുപുഴയും ഇരുവഞ്ഞിയും കരകവിഞ്ഞൊഴുകുകയാണ്. ഊർക്കടവിൽ റെഗുലേറ്റർ കം ബ്രിഡ്ജിന്റെ 16 ഷട്ടറുകൾ ഉയർത്തി. ചാത്തമംഗലം പഞ്ചായത്തിൽ റോഡുകൾ വെള്ളത്തിൽ മുങ്ങി. താമരശ്ശേരി കട്ടിപ്പാറ കേളൻമൂലയിൽ വീടിന് മുകളിലേക്ക് മരം വീണു. ഇവിടെ ആളപായമില്ല. കോഴിക്കോട് വിലങ്ങാട് മിന്നൽ ചുഴലിയിൽ വ്യാപക നാശനഷ്ടമുണ്ടായി; പലയിടത്തും മരങ്ങൾ കടപുഴകി വീണു. മൂന്ന് വീടുകൾക്ക് മുകളിലും മരം വീണു. വയനാട്ടിലെ കല്ലുമുക്ക്, മംഗലത്ത് കുര്യാക്കോസ് എന്ന ആളുടെ വീടിനു മുകളിലും മരം വീണു.

വയനാട്ടിൽ അതീവ ജാഗ്രത

വയനാട്ടിൽ ഇന്നലെ രാത്രി പരക്കെ കനത്ത മഴയും കാറ്റും വീശി. ഇന്നും രാവിലെ പലയിടങ്ങളിലും മഴ തുടരുകയാണ്. മലവെള്ളപ്പാച്ചിലുണ്ടായ മാനന്തവാടി മക്കിമലയിൽ അതീവ ജാഗ്രത തുടരുന്നു. വനത്തിനുള്ളിൽ മണ്ണിടിഞ്ഞിട്ടുണ്ടെന്നാണ് അധികൃതരുടെ അനുമാനം. തലപ്പുഴയിലെ പുഴയുടെ തീരങ്ങളിൽ താമസിക്കുന്നവരോട് ജാഗ്രത പുലർത്തണമെന്ന് അധികൃതർ ആവശ്യപ്പെട്ടു. തിരുനെല്ലി പുഴ കരകവിഞ്ഞ് ഒഴുകുന്നതിനാൽ പനംകുറ്റി ഉന്നതിയിലെ എട്ട് കുടുംബങ്ങളെ മാറ്റി താമസിപ്പിച്ചിട്ടുണ്ട്.

പടിഞ്ഞാറത്തറ, മുട്ടിൽ ഉൾപ്പെടെയുള്ള പഞ്ചായത്തുകളിൽ രാത്രിയോടെ കൺട്രോൾ റൂമുകൾ തുറന്നു. പഞ്ചാരക്കൊല്ലിയിലെ ചില വീടുകളിലും വെള്ളം കയറിയിട്ടുണ്ട്. താഴ്ന്ന പ്രദേശങ്ങളിൽ പലതും വെള്ളം കയറിയ നിലയിലാണ്. വയനാട് ജില്ലയിലെ ഒൻപത് പഞ്ചായത്തുകളിൽ റിസോർട്ടുകൾ, ഹോംസ്റ്റേകൾ എന്നിവയുടെ പ്രവർത്തനം നിരോധിച്ചു. മാനന്തവാടി, വൈത്തിരി താലൂക്കുകളിലെ പഞ്ചായത്തുകളിലാണ് ഈ നിരോധനം. മുണ്ടക്കൈ ചൂരൽമല ദുരന്ത പ്രദേശത്ത് 'നോ ഗോ സോൺ' മേഖലയിലേക്കുള്ള പ്രവേശനം നിർത്തിവെച്ചു. സ്‌പെഷ്യൽ ക്ലാസ്, ട്യൂഷൻ ക്ലാസുകൾ എന്നിവയും പാടില്ലെന്ന് അധികൃതർ അറിയിച്ചു.

സുൽത്താൻ ബത്തേരി മേഖലയിൽ ശക്തമായ മഴയും കാറ്റും തുടരുകയാണ്. നിരവധി സ്ഥലങ്ങളിൽ റോഡിന് കുറുകെയും വീടിനുമുകളിലേക്കും മരങ്ങൾ വീണു. സുൽത്താൻ ബത്തേരി കല്ലൂർ പുഴ കരകവിഞ്ഞു; സമീപത്തെ ഉന്നതികളിലേക്ക് വെള്ളം കയറിത്തുടങ്ങി. തലപ്പുഴ ഫോറസ്റ്റ് സ്റ്റേഷന് സമീപം റോഡിന് കുറുകെ മരം വീണ് ഗതാഗത തടസ്സമുണ്ടായി. ഇലക്ട്രിക് ലൈനിന് മുകളിലേക്കാണ് മരം വീണിരിക്കുന്നത്.

ഡാമുകളിലെ ജലനിരപ്പ് ഉയർന്നു, മുന്നറിയിപ്പ്

ജലനിരപ്പ് ഉയർന്നതോടെ ഡാമുകൾ സംബന്ധിച്ചും ചില അറിയിപ്പുകൾ പുറത്തുവിട്ടിട്ടുണ്ട്.

• പെരിങ്ങൽക്കുത്ത് ഡാമിലെ രണ്ടാമത്തെ വാൽവ് തുറന്നു. ചാലക്കുടി പുഴയുടെ തീരത്ത് ജാഗ്രത പാലിക്കണമെന്ന് അധികൃതർ അറിയിച്ചു.

• പാലക്കാട് ചുള്ളിയാർ ഡാമിന്റെ സ്പിൽവേ ഷട്ടർ അഞ്ച് സെന്റിമീറ്റർ ഉയർത്തി. ഗായത്രിപ്പുഴയുടെ തീരത്ത് ജാഗ്രതാ നിർദ്ദേശം പുറപ്പെടുവിച്ചു.

• ആളിയാർ ഡാം ഷട്ടറും തുറന്നു.

• മാട്ടുപ്പെട്ടി ഡാം പരമാവധി സംഭരണശേഷിയിലേക്ക് അടുക്കുകയാണ്. മുതിരപ്പുഴയാറിന്റെ ഇരുകരകളിലും ഉള്ളവർ ജാഗ്രത പുലർത്തണം.

• കണ്ണൂർ ബാവലി പുഴയിൽ ജലനിരപ്പ് ഉയർന്നതിനാലും കക്കുവ പുഴ കര കവിഞ്ഞതിനാലും ജനം ജാഗ്രത പാലിക്കണം.

• തൃശ്ശൂർ ഷോളയാർ ഡാമിന്റെ സ്പിൽവേ ഷട്ടർ അരയടി ഉയർത്തി. വെള്ളം ചാലക്കുടിപ്പുഴയിലേക്ക് ഒഴുക്കുന്നതിനാൽ ജലവിതാനം ഉയരാൻ സാധ്യതയുണ്ട്.

• കൊല്ലം തെന്മല പരപ്പാർ ഡാം തുറന്നു.

• പീച്ചി ഡാമിന്റെ നാല് ഷട്ടറുകളും നിലവിൽ എട്ടിഞ്ച് തുറന്നിട്ടുണ്ട്.

• കണ്ണൂർ പഴശ്ശി ഡാമിന്റെ 13 ഷട്ടറുകൾ മൂന്ന് മീറ്റർ വീതവും ഒരു ഷട്ടർ രണ്ടര മീറ്ററും ഉയർത്തി.

• കക്കയം ഡാമിന്റെ രണ്ട് ഷട്ടറുകളും ഉയർത്തി. ഡാമിലേക്കുള്ള നീരൊഴുക്ക് ശക്തമായി തുടരുകയാണ്. പുഴയോരത്ത് താമസിക്കുന്നവർക്ക് ജാഗ്രതാ നിർദേശം നൽകി.

നിങ്ങളുടെ പ്രദേശത്ത് മഴക്കെടുതികൾ ഉണ്ടായിട്ടുണ്ടോ? അനുഭവങ്ങൾ പങ്കുവെക്കുക.

Article Summary: Heavy rains cause widespread damage across Kerala, leading to floods and landslides.

#KeralaRains #HeavyRains #FloodAlert #Landslide #Monsoon2025 #KeralaFloods