തിരുവനന്തപുരം: (KVARTHA) യൂത്ത് കോണ്‍ഗ്രസ് സംസ്ഥാന അധ്യക്ഷന്‍ രാഹുല്‍ മാങ്കൂട്ടത്തിലിനെതിരായ ലൈംഗിക പീഡനക്കേസിലെ അതിജീവിതയെ സമൂഹമാധ്യമങ്ങളിലൂടെ വീണ്ടും അധിക്ഷേപിച്ചെന്ന പരാതിയില്‍ രാഹുല്‍ ഈശ്വറിനെതിരെ അന്വേഷണം. രാഹുല്‍ ഈശ്വര്‍ ജാമ്യവ്യവസ്ഥ ലംഘിച്ചെന്ന് കാണിച്ച് അതിജീവിത നല്‍കിയ പരാതിയിലാണ് നടപടി. ജാമ്യം റദ്ദാക്കാന്‍ നടപടി സ്വീകരിക്കണമെന്നും പരാതിയില്‍ ആവശ്യപ്പെടുന്നു.

പരാതിയും അന്വേഷണവും

പ്രത്യേക അന്വേഷണസംഘം മേധാവി പൂങ്കുഴലിക്കാണ് അതിജീവിത പരാതി നല്‍കിയത്. സമൂഹമാധ്യമത്തില്‍ തന്നെ അധിക്ഷേപിക്കുന്നതിന് രാഹുല്‍ ഈശ്വര്‍ വീണ്ടും സാഹചര്യമൊരുക്കിയെന്നും ഇത് ജാമ്യവ്യവസ്ഥകളുടെ ലംഘനമാണെന്നും അതിജീവിത പരാതിയില്‍ ചൂണ്ടിക്കാട്ടുന്നു. പരാതി തിരുവനന്തപുരം സിറ്റി സൈബര്‍ പൊലീസിന് കൈമാറി. രാഹുല്‍ ഈശ്വര്‍ ജാമ്യവ്യവസ്ഥകള്‍ ലംഘിച്ചിട്ടുണ്ടോ എന്ന് പരിശോധിച്ച് അടിയന്തരമായി റിപ്പോര്‍ട്ട് സമര്‍പ്പിക്കാന്‍ നിര്‍ദേശം നല്‍കിയിട്ടുണ്ട്.

രാഹുല്‍ ഈശ്വറിന്റെ പ്രതികരണം

അതേസമയം, തനിക്കെതിരെ അതിജീവിത വീണ്ടും വ്യാജ പരാതി നല്‍കിയെന്ന് രാഹുല്‍ ഈശ്വര്‍ ആരോപിച്ചു. താന്‍ ഒരു ജാമ്യവ്യവസ്ഥയും ലംഘിച്ചിട്ടില്ലെന്നും മാധ്യമങ്ങളോട് സംസാരിക്കുന്നതിനോ വീഡിയോ ചെയ്യുന്നതിനോ കോടതി വിലക്കേര്‍പ്പെടുത്തിയിട്ടില്ലെന്നും രാഹുല്‍ വ്യക്തമാക്കി.

'എന്തൊരു കഷ്ടമാണ് ഇത്. നമ്മുടെ നാട്ടില്‍ സത്യവും നീതിയും ഇല്ലേ. വിമര്‍ശനങ്ങളെ ഭയന്ന് ചിലര്‍ നിയമത്തെ ആയുധവല്‍ക്കരിച്ചു. എതിര്‍സ്വരങ്ങളെ നിശബ്ദമാക്കുന്ന ഈ പ്രവണത നല്ലതാണോ? ആണിനെ കുടുക്കാന്‍ എന്ത് എളുപ്പമാണെന്ന് ആലോചിച്ചു നോക്കൂ. ഈ പുരുഷവേട്ട ഇല്ലാതാക്കണമെന്നാണ് പൊലീസ്, കോടതി, നിയമ സംവിധാനത്തോട് പറയാനുള്ളത്. ആരെയും വ്യാജ പരാതി കൊടുത്ത് കുടുക്കാം എന്നുള്ള അവസ്ഥ മാറണം. പുരുഷ കമ്മീഷന്‍ വരണം. എന്നെ ഇനിയും അറസ്റ്റ് ചെയ്യുമായിരിക്കാം. പക്ഷേ പുരുഷന്മാര്‍ക്ക് നീതി കിട്ടണം,' രാഹുല്‍ ഈശ്വര്‍ പ്രതികരിച്ചു.

കേസ് പശ്ചാത്തലം

രാഹുല്‍ മാങ്കൂട്ടത്തില്‍ എം.എല്‍.എയ്‌ക്കെതിരെ പരാതി നല്‍കിയ യുവതിയെ വീഡിയോയിലൂടെ അധിക്ഷേപിച്ച കേസില്‍ നവംബര്‍ 30-നാണ് രാഹുല്‍ ഈശ്വറിനെ പൊലീസ് കസ്റ്റഡിയിലെടുത്തത്. അന്വേഷണവുമായി സഹകരിക്കുന്നില്ലെന്ന പ്രോസിക്യൂഷന്‍ വാദം അംഗീകരിച്ച് തിരുവനന്തപുരം എ.സി.ജെ.എം. കോടതി നേരത്തെ രണ്ട് തവണ ഇദ്ദേഹത്തിന്റെ ജാമ്യാപേക്ഷ തള്ളിയിരുന്നു. കുറ്റകൃത്യത്തിന്റെ ഗൗരവം കണക്കിലെടുത്തായിരുന്നു അന്ന് ജാമ്യം നിഷേധിച്ചത്. തുടര്‍ന്ന് 16 ദിവസത്തെ ജയില്‍വാസത്തിന് ശേഷമാണ് രാഹുലിന് ജാമ്യം ലഭിച്ചത്. ജാമ്യം ലഭിച്ച് പുറത്തിറങ്ങിയ ശേഷവും സമാനമായ രീതിയില്‍ അധിക്ഷേപം തുടരുന്നു എന്നാണ് പുതിയ പരാതിയില്‍ പറയുന്നത്.

അതിജീവിതയുടെ പരാതിയും രാഹുൽ ഈശ്വറിന്റെ മറുപടിയും; ഈ വിഷയത്തിൽ നിയമം എന്ത് നിലപാടെടുക്കണം? പ്രതികരിക്കൂ.

Article Summary: Survivor in Rahul Mankootathil case files complaint against Rahul Easwar for alleged bail violation. Rahul Easwar denies charges, calls for Men's Commission.

#RahulEaswar #RahulMankootathil #SurvivorComplaint #KeralaPolice #CyberPolice #TrivandrumNews