മുംബൈ: (KVARTHA) മഹാരാഷ്ട്ര നിയമസഭാ തിരഞ്ഞെടുപ്പിനുള്ള 65 സ്ഥാനാർഥികളുടെ ആദ്യ പട്ടിക ശിവസേന (ഉദ്ധവ് താക്കറെ) വിഭാഗം പുറത്തിറക്കി. പാർട്ടി അധ്യക്ഷൻ ഉദ്ധവ് താക്കറെയുടെ മകനും യുവ നേതാവുമായ ആദിത്യ താക്കറെ വോർലി നിയമസഭാ മണ്ഡലത്തിൽ നിന്ന് മത്സരിക്കും. വോർലിയിൽ നിന്നുള്ള നിലവിലെ എംഎൽഎയാണ് ആദിത്യ താക്കറെ. ശിവസേനയുടെ പ്രധാന ശക്തികേന്ദ്രമായാണ് വോർലി കണക്കാക്കപ്പെടുന്നത്.

महाराष्ट्र विधानसभा निवडणूक २०२४

शिवसेना (उद्धव बाळासाहेब ठाकरे) पक्षाची अधिकृत उमेदवारांची पहिली यादी. pic.twitter.com/QAJ01ce7ds

— ShivSena - शिवसेना Uddhav Balasaheb Thackeray (@ShivSenaUBT_) October 23, 2024

കോൺഗ്രസും ശരത് പവാർ വിഭാഗം എൻസിപിയും ഉൾപ്പെടുന്ന മഹാ വികാസ് അഘാഡി (എംവിഎ) സഖ്യത്തിന് കീഴിൽ ഉദ്ധവ് താക്കറെയുടെ ശിവസേന 95 സീറ്റുകളിൽ മത്സരിക്കും. താനെയിൽ രാജൻ വിചാരെക്ക് സീറ്റ് നൽകി. എതിരാളിയായ മുഖ്യമന്ത്രി ഏകനാഥ് ഷിൻഡെക്കെതിരെ കോപ്രി- പച്ച്പഖാദിയിൽ താക്കറെ വിഭാഗം കേദാർ ദിഗെയെ മത്സരിപ്പിക്കും. അന്തരിച്ച നേതാവ് ആനന്ദ് ദിഗെയുടെ ബന്ധുവാണ് കേദാർ ദിഗെ. ഷിൻഡെയുടെ രാഷ്ട്രീയ ഗുരുവായി ആനന്ദ് ദിഗെ കണക്കാക്കപ്പെടുന്നു.

യുവസേന നേതാവും താക്കറെയുടെ ബന്ധുവുമായ വരുൺ സർദേശായി ബാന്ദ്ര (ഈസ്റ്റ്) സീറ്റിൽ മത്സരിക്കും. 2022-ലെ ശിവസേന പിളർപ്പിന് ശേഷം ഉദ്ധവ് താക്കറെയ്ക്കെക്കൊപ്പം തുടരുന്ന മിക്ക എംഎൽഎമാരെയും പാർട്ടി വീണ്ടും രംഗത്തിറക്കിയിട്ടുണ്ട്. മഹാരാഷ്ട്രയിലെ 288 അംഗ നിയമസഭയിലേക്കുള്ള തിരഞ്ഞെടുപ്പ് നവംബർ 20 നും വോട്ടെണ്ണൽ നവംബർ 23 നും നടക്കും.
 

#MaharashtraElections, #ShivSena, #UddhavThackeray, #AdityaThackeray, #MVA