കോഴിക്കോട്: (KVARTHA) തദ്ദേശപ്പോരിൻ്റെ രണ്ടാം ഘട്ടത്തിൽ വടക്കന്‍ കേരളത്തിലെ ഏഴ് ജില്ലകളിൽ പോളിംഗ് തുടരുന്നു. ഉച്ചയ്ക്ക് 12.15 ആയപ്പോൾ ആകെ പോളിംഗ് 40.09 ശതമാനമായി രേഖപ്പെടുത്തി. ഇതോടെ ജില്ലകളിൽ കനത്ത പോളിംഗാണ് നടക്കുന്നതെന്ന സൂചനകളാണ് പുറത്തുവരുന്നത്.

മലപ്പുറം ജില്ലയിലാണ് ഏറ്റവും ഉയർന്ന പോളിംഗ് ശതമാനം രേഖപ്പെടുത്തിയത്. ഇവിടെ 42.02 % വോട്ടർമാർ സമ്മതിദാനാവകാശം വിനിയോഗിച്ചു. അതേസമയം, പാലക്കാട് 40.87 %, കോഴിക്കോട് 40.24 %, തൃശൂർ 39.58 %, വയനാട് 39.99 %, കാസർകോട് 38.94 %, കണ്ണൂർ 38.73 % എന്നിങ്ങനെയാണ് മറ്റ് ജില്ലകളിലെ പോളിംഗ് നില.

ചെന്ത്രാപ്പിന്നിയിൽ വോട്ടെടുപ്പ് തടസ്സപ്പെട്ടു

തൃശൂർ ജില്ലയിലെ ചെന്ത്രാപ്പിന്നി ചാമക്കാലയിൽ പോളിംഗ് തടസ്സപ്പെട്ടു. എടത്തിരുത്തി ഗ്രാമപഞ്ചായത്തിലെ പന്ത്രണ്ടാം വാർഡ് ചാമക്കാല ഗവ. മാപ്പിള സ്കൂളിലെ ഒന്നാം നമ്പർ ബൂത്തിലാണ് ഒരാൾ രണ്ട് വോട്ട് ചെയ്‌തു എന്ന പരാതിയെ തുടർന്ന് വോട്ടിങ് തടസ്സപ്പെട്ടത്.

ഈ ബൂത്തിൽ 246 പേർ വോട്ട് ചെയ്തപ്പോൾ മെഷീനിൽ 247 വോട്ടാണ് രേഖപ്പെടുത്തിയിരുന്നത്. അവസാനം വോട്ട് ചെയ്‌ത ആൾക്ക് വോട്ട് രേഖപ്പെടുത്തിയതിൻ്റെ ബീപ് ശബ്ദം വന്നില്ല എന്നുപറഞ്ഞു പരാതി ഉന്നയിച്ചിരുന്നു. ഇതിനെത്തുടർന്ന്, ഇയാൾക്ക് രണ്ടാമതും വോട്ടുചെയ്യാൻ അനുവാദം നൽകിയതാണ് കുഴപ്പമായത്. ഇയാളുടെ രണ്ട് വോട്ടും മെഷീനിൽ രേഖപ്പെടുകയുണ്ടായി. ഒടുവിൽ, റിട്ടേണിംഗ് ഓഫീസർ സ്ഥലത്തെത്തി പ്രശ്‌നം പരിഹരിച്ചതിനെത്തുടർന്ന് വോട്ടെടുപ്പ് പുനരാരംഭിച്ചു.

നിങ്ങളുടെ ബൂത്തിലെ പോളിംഗ് ശതമാനം എത്രയാണ്? കമൻ്റ് ചെയ്യുക.

Article Summary: Northern Kerala Local Body Elections Second Phase Polling continues.

#KeralaLocalPolls #PollingDay #ThadheshaTheeranjeduppu #KeralaVoting #VoterTurnout #Chengappini