നിലമ്പൂരിൽ മുന്നണികളെ ആശങ്കയിലാഴ്ത്തി പി വി അൻവറിന്റെ മുന്നേറ്റം: ത്രികോണപ്പോര് ആരുടെ വിജയത്തെ വീഴ്ത്തും?

ഭാമനാവത്ത്

മലപ്പുറം: (KVARTHA) നിലമ്പൂർ ഉപതിരഞ്ഞെടുപ്പിന് മണിക്കൂറുകൾ മാത്രം ശേഷിക്കെ, രാഷ്ട്രീയ കേരളം ആകാംഷയോടെ ഉറ്റുനോക്കുകയാണ്. ചരിത്രത്തിലാദ്യമായി ത്രികോണ മത്സരം നടക്കുന്ന നിലമ്പൂരിൽ, എൽ.ഡി.എഫ്, യു.ഡി.എഫ് മുന്നണികൾക്കൊപ്പം തൃണമൂൽ സ്വതന്ത്ര സ്ഥാനാർത്ഥിയായി പി.വി. അൻവറും രംഗത്തെത്തിയതോടെ പോരാട്ടം കടുത്തു. 

പരമ്പരാഗതമായി യു.ഡി.എഫിന് സ്വാധീനമുള്ള മണ്ഡലമാണെങ്കിലും, ആര്യാടന്റെ തട്ടകത്തിൽ എൽ.ഡി.എഫ് സ്വതന്ത്രനായി മത്സരിച്ച പി.വി. അൻവർ രണ്ടു തവണ വിജയിച്ചിട്ടുണ്ട്. ഏകദേശം ഒമ്പത് വർഷത്തോളം എം.എൽ.എയായിരുന്ന അൻവറിനുള്ള ജനസ്വാധീനം തള്ളിക്കളയാനാവില്ല.

മണ്ഡലത്തിലെ മുക്കും മൂലയും പരിചിതമായ അൻവർ, കോൺഗ്രസ് പശ്ചാത്തലമുള്ള ദേശീയ സ്വാതന്ത്ര്യസമര പാരമ്പര്യമുള്ള കുടുംബത്തിൽ നിന്നാണ് വരുന്നത്. യൂത്ത് കോൺഗ്രസ് നേതാവും കോൺഗ്രസ് ഭാരവാഹിയുമായിരുന്ന അദ്ദേഹം, സീറ്റിനായി സി.പി.എമ്മുമായി ചങ്ങാത്തത്തിലായി. മുഖ്യമന്ത്രി പിണറായി വിജയനായിരുന്നു അൻവറിന്റെ ഗോഡ്ഫാദർ. 

പിണറായിയെ പിതൃതുല്യനായാണ് അൻവർ പല വേദികളിലും വിശേഷിപ്പിച്ചിരുന്നത്. എന്നാൽ, പോലീസിൽ നിന്ന് നീതി ലഭിച്ചില്ലെന്ന കാരണത്താൽ പിണറായിക്കെതിരെ അൻവർ 'കുരിശുയുദ്ധം' പ്രഖ്യാപിച്ചിരിക്കുകയാണ്. 'പിണറായിസം', 'അൻവറിസം' എന്നീ വാക്കുകൾ തന്നെ അദ്ദേഹം രാഷ്ട്രീയ വിമർശനമായി ഉപയോഗിക്കുന്നുണ്ട്.

നിലമ്പൂർ ഉപതിരഞ്ഞെടുപ്പിൽ പാർട്ടി കുടുംബങ്ങളിലെയും അനുഭാവികളുടെയും വോട്ടുകളിൽ അടിയൊഴുക്കുണ്ടാകുമോ എന്ന ആശങ്കയിലാണ് സി.പി.എമ്മും കോൺഗ്രസും. ഇരു മുന്നണികളും പരസ്പരം പോരാടുമ്പോൾ തനിക്കാണ് ഗുണമെന്നാണ് അൻവറിന്റെ കണക്കുകൂട്ടൽ. ഇരു പാർട്ടികളുടെയും വോട്ടുകൾ തനിക്ക് ലഭിക്കുമെന്ന പി.വി. അൻവറിന്റെ മുന്നറിയിപ്പാണ് ഇരു മുന്നണികളെയും വെട്ടിലാക്കിയിരിക്കുന്നത്.

റെഡ് അലർട്ട് പ്രഖ്യാപിച്ച കനത്ത മഴയെപ്പോലും വകവെക്കാതെ ചൊവ്വാഴ്ച  നിലമ്പൂരിലെ കൊട്ടിക്കലാശം ആവേശഭരിതമായിരുന്നു. നിശബ്ദ പ്രചാരണവും കഴിഞ്ഞ് പോളിങ്ങിലേക്ക് കടക്കുമ്പോൾ, ഇരു പാർട്ടികളിലെയും പ്രവർത്തകർ ആവേശത്തിലാണെങ്കിലും, അനുഭാവികളുടെയും കുടുംബങ്ങളുടെയും വോട്ടുകൾ പി.വി. അൻവറിലേക്ക് ചോരുമോയെന്ന ആശങ്ക നിലനിൽക്കുന്നുണ്ട്. 

തിരഞ്ഞെടുപ്പിന്റെ തുടക്കത്തിൽ അൻവറിനെ സി.പി.എം-കോൺഗ്രസ് നേതാക്കൾ തള്ളിപ്പറഞ്ഞിരുന്നെങ്കിലും, ഇപ്പോൾ കാര്യങ്ങൾ അങ്ങനെയല്ല. നിലമ്പൂരിൽ ജയപരാജയങ്ങൾ നിർണ്ണയിക്കുന്നതിൽ പി.വി. അൻവറിന്റെ സ്വതന്ത്ര സ്ഥാനാർത്ഥിത്വം ഒരു പ്രധാന ഘടകമായി തീരുമെന്നാണ് സി.പി.എം-കോൺഗ്രസ് നേതാക്കൾ രഹസ്യമായി വിലയിരുത്തുന്നത്. 

എന്നാൽ, അൻവർ ആരുടെ വോട്ടാണ് പിടിക്കാൻ പോകുന്നതെന്നാണ് ചോദ്യം. ഇരു മുന്നണികളെയും കൂടാതെ, അവസാന നിമിഷം ബി.ജെ.പിയും പ്രചാരണം ശക്തിപ്പെടുത്തിയതോടെ നിലമ്പൂർ ഉപതിരഞ്ഞെടുപ്പിലെ പോരാട്ടം കൂടുതൽ വർണ്ണാഭമായി.

ഇനി ബാക്കിയുള്ളത് ഒരു ദിവസത്തെ നിശബ്ദ പ്രചാരണവും പിറ്റേന്നുള്ള ജനവിധിയുമാണ്. അതിശക്തമായ ത്രികോണ മത്സരമാണ് നിലമ്പൂരിൽ നടക്കുന്നത്. മൂന്ന് സ്ഥാനാർത്ഥികളും ഒരുപോലെ വിജയപ്രതീക്ഷ പങ്കുവെക്കുന്നുണ്ട്. 

കൊടുങ്കാറ്റ് വന്നാലും വോട്ട് പെട്ടിയിൽ വീഴുമെന്ന് സ്വതന്ത്ര സ്ഥാനാർത്ഥിയായ പി.വി. അൻവർ പറയുന്നു. ക്ഷേമ പെൻഷൻ വിവാദമടക്കം ചർച്ചയാക്കിയാണ് ഇടത് സ്ഥാനാർത്ഥി എം. സ്വരാജ് വോട്ട് തേടിയത്. എ.ഐ.സി.സി ജനറൽ സെക്രട്ടറി കെ.സി. വേണുഗോപാലിന്റെ പ്രസ്താവനയാണ് ഇത്തവണ നിലമ്പൂരിൽ ഇടതുപക്ഷം പ്രധാന ആയുധമാക്കിയത്.

കടുത്ത മഴയിലും മൂന്ന് മുന്നണികളുടെയും അണികൾ കൊട്ടിക്കലാശത്തിൽ പാട്ടിനനുസരിച്ച് നൃത്തം ചെയ്ത് നിലമ്പൂരിനെ ആവേശത്തിലാഴ്ത്തി. ആര്യാടൻ ഷൗക്കത്തിന് 10,000-ത്തിനും 15,000-ത്തിനും ഇടയിൽ ഭൂരിപക്ഷമാണ് യു.ഡി.എഫ് കണക്കുകൂട്ടുന്നത്.

മുന്നണി ഐക്യം പതിവിലും പ്രകടമാണെന്നതാണ് പ്രതീക്ഷയുടെ ശക്തി. മുഖ്യമന്ത്രി നേരിട്ട് നയിച്ച പ്രചാരണത്തിലൂടെ അവസാന നിമിഷം മത്സരം പ്രവചനാതീതമാക്കാൻ സാധിച്ചെന്ന വിലയിരുത്തലിലാണ് എൽ.ഡി.എഫ്. സർക്കാർ വിരുദ്ധ വികാരം പ്രകടമായില്ല. യു.ഡി.എഫിന്റെ വെൽഫെയർ പാർട്ടി, ജമാഅത്തെ ഇസ്ലാമി ബന്ധം ഭൂരിപക്ഷ, ക്രിസ്ത്യൻ സമുദായങ്ങളെ സ്വാധീനിച്ചാൽ നില കൂടുതൽ ഭദ്രമാവുമെന്നും സി.പി.എം കണക്കുകൂട്ടുന്നു.

മണ്ഡലത്തിൽ ഏഴ് പഞ്ചായത്തും ഒരു മുനിസിപ്പാലിറ്റിയുമുണ്ട്. ഇതിൽ ഭരണത്തിലുള്ള അഞ്ച് പഞ്ചായത്തുകളിൽ മേൽക്കോയ്മ നേടാൻ കഴിയുമെന്നാണ് യു.ഡി.എഫിന്റെ വിലയിരുത്തൽ. എൽ.ഡി.എഫ് അധികാരത്തിലുള്ള രണ്ട് പഞ്ചായത്തിലും നിലമ്പൂർ നഗരസഭയിലും വോട്ട് ചോർച്ച തടയുന്നതിനൊപ്പം യു.ഡി.എഫ് പഞ്ചായത്തുകളിൽ വോട്ട് വിഹിതം ഉയർത്താനുള്ള അവസാനവട്ട തന്ത്രങ്ങളിലാണ് സി.പി.എം. വോട്ട് വിഹിതത്തിലെ വർദ്ധനവാണ് എൻ.ഡി.എയുടെ ലക്ഷ്യം. 

എന്നാൽ, പത്ത് ശതമാനം വോട്ടെങ്കിലും പിടിക്കുമെന്നാണ് അൻവർ ക്യാമ്പിന്റെ അവകാശവാദം മുന്നണികൾക്ക് അലോസരമായിട്ടുണ്ട്. മുന്നണി വോട്ടുകൾ ചോരില്ലെന്ന് ആത്മവിശ്വാസം പ്രകടിപ്പിക്കുമ്പോഴും അനുഭാവി വോട്ടുകളിൽ ഒരു പങ്ക് അൻവറിലേക്ക് ചായുമോ എന്നതാണ് കോൺഗ്രസിന്റെയും സി.പി.എമ്മിന്റെയും ആശങ്ക. 

ഇത്തരം ഒരു സാഹചര്യം നിലനിൽക്കുകയാണെങ്കിൽ, വിജയിക്കുന്ന സ്ഥാനാർത്ഥി ആരുതന്നെയായാലും ഭൂരിപക്ഷം വളരെ കുറവായിരിക്കുമെന്ന കണക്കുകൂട്ടൽ എൽ.ഡി.എഫ്-യു.ഡി.എഫ് ക്യാമ്പുകളിലുമുണ്ട്.

നിലമ്പൂരിലെ തിരഞ്ഞെടുപ്പ് ഫലത്തെക്കുറിച്ച് നിങ്ങളുടെ അഭിപ്രായം പങ്കുവെക്കുക. 

Article Summary: PV Anvar's unexpected surge in Nilambur creates triangular contest.

#NilamburElection #KeralaPolitics #PVAnvar #Byelection #TriangularFight #Kerala