തൃശൂർ: (KVARTHA) നാമനിർദ്ദേശ പത്രികയിൽ സ്വത്തുവിവരം മറച്ചുവെച്ച ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറിനെതിരെ കേന്ദ്ര തിരഞ്ഞെടുപ്പ് കമ്മീഷന് പരാതി നൽകുമെന്ന് എഐസിസി ജനറൽ സെക്രട്ടറി കെ സി വേണുഗോപാൽ എംപി. തൃശൂർ ഡിസിസി ഓഫീസിൽ 2026 മാർച്ച് 25 ബുധനാഴ്ച നടത്തിയ വാർത്താസമ്മേളനത്തിലാണ് അദ്ദേഹം ഇക്കാര്യം വ്യക്തമാക്കിയത്. രാജീവ് ചന്ദ്രശേഖർ നടത്തിയത് വ്യക്തമായ ചട്ടലംഘനമാണെന്നും ജനങ്ങളെ കബളിപ്പിക്കുന്ന ഇത്തരം നടപടികൾക്കെതിരെ യുഡിഎഫ് ശക്തമായ നിയമനടപടികൾ സ്വീകരിക്കുമെന്നും അദ്ദേഹം പറഞ്ഞു.

സ്വത്തുവിവരം മറച്ചുവെച്ചെന്ന് ആരോപണം

കർണാടകയിലെ കോറമംഗലയിൽ 68-2-408 എന്ന ക്രമനമ്പറിലുള്ള വസ്തുവിന്റെ വിവരം രാജീവ് ചന്ദ്രശേഖർ സത്യവാങ്മൂലത്തിൽ ഉൾപ്പെടുത്തിയിട്ടില്ലെന്ന് വേണുഗോപാൽ ആരോപിച്ചു. 2026 മാർച്ച് 17-ന് ഈ വസ്തുവിന്റെ പേരിൽ 5,02,085 രൂപ നികുതിയടച്ചത് രാജീവ് ചന്ദ്രശേഖർ തന്നെയാണ്. 2024-ലെ തിരഞ്ഞെടുപ്പിൽ മത്സരിച്ചപ്പോൾ ഈ വസ്തുവിന്റെ വിവരം നൽകിയിരുന്നെങ്കിലും ഇപ്പോൾ അത് ഒഴിവാക്കിയത് ചട്ടലംഘനമാണ്. തിരഞ്ഞെടുപ്പ് കമ്മീഷന്റെ സർക്കുലറിൽ ബിജെപി മുദ്ര കാണപ്പെട്ട സംഭവത്തെ ഇതിനോട് ചേർത്ത് വായിക്കണമെന്നും അദ്ദേഹം കൂട്ടിച്ചേർത്തു.

ബാർ ലൈസൻസിൽ കോടികളുടെ അഴിമതി

നിയമസഭാ തിരഞ്ഞെടുപ്പ് ഫണ്ട് ലക്ഷ്യമിട്ട് ബാർ മുതലാളിമാരിൽ നിന്ന് സിപിഎം കോടികൾ കോഴ വാങ്ങിയതായി കെ സി വേണുഗോപാൽ ആരോപിച്ചു. കേന്ദ്ര ടൂറിസം വകുപ്പിന്റെ ക്ലാസിഫിക്കേഷൻ പൂർത്തിയാകുന്നതിന് മുൻപേ അതീവരഹസ്യമായി ബാർ ലൈസൻസുകൾ പുതുക്കി നൽകി. ലൈസൻസ് പുതുക്കരുതെന്ന് എക്സൈസ് കമ്മീഷണർ നിർദ്ദേശിച്ച ഇരുനൂറോളം ബാറുകൾക്ക് പോലും കാലാവധി നീട്ടിക്കൊടുത്തു. മദ്യവർജ്ജനമെന്ന് പറയുന്ന പിണറായി സർക്കാർ കഴിഞ്ഞ 10 വർഷത്തിനിടെ പുതുതായി 377 ബാറുകൾക്കാണ് അനുമതി നൽകിയത്. അഴിമതിക്കെതിരെ പ്രസംഗിക്കുന്ന മുഖ്യമന്ത്രിയുടെ 'തൊലിക്കട്ടി അപാരമാണെ'ന്നും അദ്ദേഹം പരിഹസിച്ചു.

കർഷകരോടുള്ള വഞ്ചന

കർഷക പെൻഷന് അനുമതി നിഷേധിച്ച സംസ്ഥാന ധനവകുപ്പിന്റെ നടപടി പാവപ്പെട്ട കർഷകരോടുള്ള വഞ്ചനയാണെന്ന് കെ സി വേണുഗോപാൽ പറഞ്ഞു. കേന്ദ്ര-സംസ്ഥാന സർക്കാരുകളുടെ കർഷക വിരുദ്ധ നായങ്ങൾ മൂലം കൃഷിക്കാർ ദുരിതത്തിലാണ്. അമേരിക്കയുമായുള്ള ഡീലിന്റെ ഭാഗമായി രാജ്യത്തെ കർഷക താൽപ്പര്യങ്ങൾ കേന്ദ്രം അട്ടിമറിക്കുമ്പോൾ സംസ്ഥാന സർക്കാർ അവരെ കൂടുതൽ ദ്രോഹിക്കുകയാണ്. പാചകവാതക ക്ഷാമവും വിലക്കയറ്റവും ജനജീവിതം ദുഷ്കരമാക്കിയെന്നും തൃശൂരിൽ അദ്ദേഹം ചൂണ്ടിക്കാട്ടി.

സംസ്ഥാനത്ത് യുഡിഎഫ് തരംഗം ആഞ്ഞടിക്കുകയാണെന്നും ഭരണവിരുദ്ധ വികാരം തിരഞ്ഞെടുപ്പിൽ പ്രതിഫലിക്കുമെന്നും അദ്ദേഹം പ്രത്യാശ പ്രകടിപ്പിച്ചു. നിയമസഭാ തിരഞ്ഞെടുപ്പിൽ യുഡിഎഫ് വൻ വിജയം നേടുമെന്നും കെ സി വേണുഗോപാൽ വാർത്താസമ്മേളനത്തിൽ പറഞ്ഞു.

കേരളത്തിലെ രാഷ്ട്രീയ മാറ്റങ്ങളെക്കുറിച്ചും അഴിമതി ആരോപണങ്ങളെക്കുറിച്ചുമുള്ള ഈ വാർത്ത നിങ്ങളുടെ സുഹൃത്തുക്കളിലേക്കും ഗ്രൂപ്പുകളിലേക്കും ഷെയർ ചെയ്യൂ. പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യാൻ ശ്രദ്ധിക്കുക. നിങ്ങളുടെ അഭിപ്രായങ്ങൾ ഞങ്ങളുടെ ഫേസ്ബുക്ക് പേജില്‍ ഈ വാർത്തയുടെ താഴെ കമന്റായി രേഖപ്പെടുത്താനും മറക്കരുത്.

Article Summary: AICC General Secretary KC Venugopal accused BJP leader Rajeev Chandrasekhar of hiding assets in his nomination and alleged massive corruption in bar license renewals by the LDF government.

#KCVenugopal #RajeevChandrasekhar #KeralaElection2026 #UDFKerala #CPMCorruption #BarBribeCase #KeralaPolitics #BreakingNewsKerala