ന്യൂഡെല്‍ഹി: (KVARTHA) കശ്മീരിലെ ഭീകരാക്രമണത്തിന്റെ പശ്ചാത്തലത്തിൽ ഇന്ത്യ, പാകിസ്ഥാൻ ഹൈക്കമ്മീഷനിലെ ഉദ്യോഗസ്ഥനെ അർധരാത്രി വിളിച്ചുവരുത്തി തങ്ങളുടെ നിർദ്ദേശങ്ങൾ അറിയിച്ചു. ആക്രമണത്തെ കാനഡയും ശക്തമായി അപലപിച്ചു. 30 മണിക്കൂറിലേറെ നീണ്ട മൗനത്തിനുശേഷമാണ് കാനഡ ഔദ്യോഗികമായി പഹൽഗാം ഭീകരാക്രമണത്തിനെതിരെ പ്രതികരിക്കാന്‍ തയാറായത്.

‘ജമ്മു കശ്മീരിലെ ഭീകരാക്രമണം എന്നെ ഞെട്ടിച്ചു. നിരപരാധികളായ സാധാരണക്കാരെയും വിനോദസഞ്ചാരികളും കൊലപ്പെടുത്തുകയും പരിക്കേൽപ്പിക്കുകയും ചെയ്തത് അർത്ഥശൂന്യവും ഞെട്ടലുളവാക്കുന്ന ഹിംസാത്മക പ്രവൃത്തിയുമാണ്. കാനഡ ഈ ഭീകരാക്രമണത്തെ ശക്തമായി അപലപിക്കുന്നു. ഭീകരാക്രമണത്തിന് ഇരകളായവരെയും അവരുടെ കുടുംബാംഗങ്ങളെയും അനുശോചനം അറിയിക്കുന്നു’ – മാർക്ക് കാർനി സമൂഹമാധ്യമത്തിൽ കുറിച്ചു.

നേരത്തെ പ്രതികരിക്കാതിരുന്നതിനെ തുടർന്ന് വിമർശനങ്ങൾ ഉയർന്നതിനു പിന്നാലെയാണ് കനേഡിയൻ പ്രധാനമന്ത്രി മാർക്ക് കാർണി പ്രസ്താവന നടത്തിയത്. കഴിഞ്ഞ ദിവസങ്ങളിൽ ലോകരാജ്യങ്ങൾ ഇന്ത്യക്ക് പിന്തുണയുമായി രംഗത്തെത്തിയിരുന്നു. കശ്മീരിലെ ജനങ്ങളും ഭീകരാക്രമണത്തിനെതിരെ ശക്തമായ പ്രതിഷേധം അറിയിച്ചു. അമേരിക്കൻ പ്രസിഡന്റ് ഡൊണാൾഡ് ട്രംപ് പ്രധാനമന്ത്രി നരേന്ദ്ര മോദിയെ വിളിച്ച് സഹായം വാഗ്ദാനം ചെയ്തു.

സർവകക്ഷിയോഗം

പഹൽഗാം ഭീകരാക്രമണം വിലയിരുത്തുന്നതിനായി വ്യാഴാഴ്ച സർവകക്ഷിയോഗം ചേരും. പ്രതിരോധമന്ത്രി രാജ്‌നാഥ് സിംഗ് യോഗത്തിൽ അധ്യക്ഷത വഹിക്കും. പ്രധാനമന്ത്രിയുടെ അധ്യക്ഷതയിൽ ചേർന്ന മന്ത്രിസഭാ സമിതിയുടെ തീരുമാനങ്ങൾ യോഗത്തിൽ വിശദീകരിക്കും. ആക്രമണത്തെക്കുറിച്ചുള്ള അന്വേഷണ വിവരങ്ങളും ചർച്ച ചെയ്യും. ഇതിനു പുറമെ, ഭീകരാക്രമണത്തിന് ശേഷമുള്ള സാഹചര്യം വിലയിരുത്താൻ കോൺഗ്രസ് പ്രവർത്തക സമിതിയും വ്യാഴാഴ്ച യോഗം ചേരും.

പാക് ദേശീയ സുരക്ഷാ കൗൺസിൽ യോഗം

നയതന്ത്ര തലത്തിൽ ഇന്ത്യയുടെ ശക്തമായ നീക്കങ്ങൾ ചർച്ച ചെയ്യാൻ പാകിസ്ഥാൻ ദേശീയ സുരക്ഷാ കൗൺസിൽ യോഗവും വ്യാഴാഴ്ച ചേരും. സിന്ധു നദീജല കരാർ റദ്ദാക്കുന്നതുമായി ബന്ധപ്പെട്ട കാര്യങ്ങളും യോഗം പരിഗണിക്കും. പാകിസ്ഥാനിലെ മുതിർന്ന മന്ത്രിമാർ ഇന്ത്യയുടെ നടപടികളെ വിമർശിച്ച് രംഗത്തെത്തിയിരുന്നു. പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേർന്ന സുരക്ഷാ കാര്യങ്ങൾക്കായുള്ള മന്ത്രിസഭാ സമിതി, സൈന്യത്തിന് ജാഗ്രതാ നിർദ്ദേശം നൽകിയിട്ടുണ്ട്. പഹൽഗാം ആക്രമണത്തിന് പിന്നിൽ പ്രവർത്തിച്ച ഭീകരരെ കണ്ടെത്താനുള്ള തിരച്ചിൽ സുരക്ഷാ സേന ഊർജ്ജിതമാക്കിയിട്ടുണ്ട്.

ഈ വാർത്തയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കൂ! കൂടുതൽ വിവരങ്ങൾക്കായി ഷെയർ ചെയ്യുക.

India summoned a Pakistani official post-midnight following the Kashmir attack, which Canada condemned after initial silence. Global support poured in for India, as Kashmiris protested. An all-party meeting is scheduled.

#KashmirAttack, #IndiaPakistan, #CanadaCondemns, #Terrorism, #AllPartyMeet, #Security