പാലക്കാട്: (KVARTHA) രാഹുല്‍ മാങ്കൂട്ടത്തിലിന്റെ വമ്പന്‍ ജയം കോണ്‍ഗ്രസ് പ്രവര്‍ത്തകര്‍ ആഘോഷമാക്കുമ്പോള്‍ ബിജെപി വലിയ ഞെട്ടലിലാണ്. ബിജെപിയുടെ സ്വപ്നങ്ങളുടെ ഗോപുരങ്ങള്‍ ചീട്ടുകൊട്ടാരം പോലെ തകര്‍ന്നടിയുന്ന കാഴ്ചയാണ് അവര്‍ക്ക് വളക്കൂറുള്ള മണ്ണില്‍ കണ്ടത്. ബിജെപിക്ക് തിരഞ്ഞെടുപ്പ് ഫലം വലിയ തിരിച്ചടിയായി മാറിയിരിക്കുകയാണ്. 

പയറ്റിയത് തൃശൂരിന്റെ രണ്ടാം ഭാഗം

തൃശൂര്‍ ലോക്സഭാ സീറ്റിലെ വിജയത്തിന് പിന്നാലെ, അവിടെ ബിജെപി നടപ്പാക്കിയ തന്ത്രങ്ങള്‍ പാലക്കാട്ട് അതേപടി പയറ്റുകയായിരുന്നു നേതൃത്വം. പുതിയ വോട്ടര്‍മാരെ ചേര്‍ക്കുന്നത് മുതല്‍ പ്രചാരണ രംഗത്തുവരെ ഇത് പ്രതിഫലിച്ചു. പക്ഷേ, ഒടുവില്‍ കോണ്‍ഗ്രസ് ശക്തമായ പോരാട്ടത്തിലൂടെ ബിജെപി കോട്ടകള്‍ പൊളിച്ചടുക്കുന്നതാണ് കണ്ടത്.

2021ല്‍ ഇ ശ്രീധരന്‍ നേടിയ 50,220 വോട്ടുകളുടെ അടുത്തെത്താന്‍ പോലും ഇത്തവണ എന്‍ഡിഎ സ്ഥാനാര്‍ഥി സി കൃഷ്ണകുമാറിന് കഴിഞ്ഞില്ല. 39,529 വോട്ടുകളാണ് കൃഷ്ണകുമാറിന് ലഭിച്ചത്. ഇ ശ്രീധരനെക്കാള്‍ 10,691 വോട്ടുകള്‍ കുറവാണ് ഈ തവണ ബിജെപി നേടിയത്. തങ്ങളുടെ ശക്തികേന്ദ്രങ്ങളായ പല സ്ഥലങ്ങളിലും വോട്ടുകളില്‍ ഗണ്യമായ കുറവുണ്ടായി.

കോണ്‍ഗ്രസിന്റെ മറുപടി

തൃശൂര്‍ പൂരം കലക്കിയതിന് പാലക്കാട്ട് വെടിക്കെട്ടോട് കൂടി ജനം മറുപടി നല്‍കിയെന്നാണ് വി കെ ശ്രീകണ്ഠന്‍ എംപി തിരഞ്ഞെടുപ്പ് ഫലത്തോട് പ്രതികരിച്ചത്. ബിജെപിക്ക് ഇതുപോലെ കണക്കിന് കിട്ടിയ ഒരു തിരഞ്ഞെടുപ്പ് അടുത്തകാലത്തൊന്നും ഉണ്ടായിട്ടില്ലെന്നും അദ്ദേഹം കൂട്ടിച്ചേര്‍ത്തു.

ബിജെപിയില്‍ പ്രത്യാഘാതങ്ങള്‍

പാലക്കാട്ട് തോല്‍വിക്ക് ശേഷം, സംസ്ഥാന ബിജെപി നേതൃത്വത്തില്‍ ഗ്രൂപ്പ് പോരാട്ടങ്ങള്‍ ശക്തമാകും എന്നാണ് വിലയിരുത്തല്‍. തിരഞ്ഞെടുപ്പിലെ വലിയ പരാജയം സംസ്ഥാന നേതൃത്വത്തിനെതിരെ നിലകൊള്ളുന്നവര്‍ക്ക് വലിയ തോതില്‍ ഊര്‍ജം നല്‍കും. ഇതിനൊപ്പം ഒരുപക്ഷേ സംസ്ഥാന നേതൃത്വത്തില്‍ അഴിച്ചുപണി ഉണ്ടായേക്കാം.

#PalakkadBypoll #KeralaElections #BJP #Congress #KeralaPolitics #ElectionResults #India