തിരുവനന്തപുരം: (KVARTHA) ഫിലിം കോൺക്ലേവ് സമാപന ചടങ്ങിലെ വിവാദ പരാമർശത്തിൽ പ്രശസ്ത സംവിധായകൻ അടൂർ ഗോപാലകൃഷ്ണനെതിരെ പോലീസിൽ പരാതി. സാമൂഹിക പ്രവർത്തകൻ ദിനു വെയിലാണ് മ്യൂസിയം പോലീസ് സ്റ്റേഷനിൽ പരാതി നൽകിയത്. അടൂരിന്റെ പരാമർശങ്ങൾ എസ്.സി-എസ്.ടി. (അതിക്രമങ്ങൾ തടയൽ) നിയമപ്രകാരം കുറ്റകരമാണെന്ന് പരാതിയിൽ പറയുന്നു. എസ്.സി-എസ്.ടി. കമ്മീഷനും ദിനു വെയിൽ പരാതി നൽകിയിട്ടുണ്ട്.

വിവാദ പരാമർശം

പട്ടികജാതി വിഭാഗത്തിൽ നിന്ന് സിനിമയെടുക്കാൻ വരുന്നവർക്ക് പരിശീലനം നൽകണമെന്നായിരുന്നു അടൂർ ഗോപാലകൃഷ്ണന്റെ വിവാദ പരാമർശം. ചലച്ചിത്ര കോർപ്പറേഷൻ വെറുതെ പണം നൽകരുതെന്നും ഒന്നര കോടി നൽകിയത് വളരെ കൂടുതലാണെന്നും അടൂർ ഗോപാലകൃഷ്ണൻ പറഞ്ഞു. സ്ത്രീകൾ ആയതുകൊണ്ട് മാത്രം അവസരം കൊടുക്കരുതെന്നും അദ്ദേഹം കൂട്ടിച്ചേർത്തു. സ്ത്രീപക്ഷ വിഷയം ചർച്ച ചെയ്യാൻ ലക്ഷ്യമിട്ട കോൺക്ലേവിലാണ് അടൂർ ഗോപാലകൃഷ്ണന്റെ ഈ അധിക്ഷേപകരമായ പരാമർശം ഉണ്ടായത്.

സംവിധായകൻ ഡോ. ബിജുവിന്റെ വിമർശനം

അതേസമയം, അടൂർ ഗോപാലകൃഷ്ണന്റെ അധിക്ഷേപ പരാമർശത്തിനെതിരെ സംവിധായകൻ ഡോ. ബിജു രംഗത്തെത്തി. പുറത്തുവന്നത് ഫ്യൂഡൽ ചിന്താഗതിയാണെന്ന് ഡോ. ബിജു വിമർശിച്ചു. അടൂരിനെപ്പോലുള്ളവർ കൂടുതൽ സാമൂഹിക ബോധ്യത്തോടെ പെരുമാറണമെന്നും പട്ടികവിഭാഗക്കാർക്കും വനിതകൾക്കും മാത്രം പരിശീലനം എന്തിനാണെന്നും ഡോ. ബിജു ചോദിച്ചു. ഇവർ കഴിവില്ലാത്തവരാണ് എന്ന ബോധ്യത്തിൽ നിന്നാണ് അടൂരിന്റെ വാക്കുകളെന്നും ഡോക്ടർ ബിജു കൂട്ടിച്ചേർത്തു.

കെ എസ് എഫ് ഡി സി ചെയർമാൻ്റെ പ്രതികരണം

ദളിത്, സ്ത്രീ സംവിധായകർക്ക് സിനിമയെടുക്കാൻ ഗ്രാന്റ് നൽകാനുള്ള സർക്കാർ തീരുമാനം ധീരമാണെന്ന് കെ.എസ്.എഫ്.ഡി.സി. ചെയർമാൻ കെ. മധു പ്രതികരിച്ചു. സർക്കാർ നയം ചലച്ചിത്ര വികസന കോർപ്പറേഷൻ പിന്തുടരും. അടൂർ ഗോപാലകൃഷ്ണനും ശ്രീകുമാരൻ തമ്പിയും ഗുരുസ്ഥാനീയരായതിനാൽ വിവാദപരാമർശങ്ങളിൽ കൂടുതൽ പറയുന്നില്ലെന്നും കെ. മധു മാധ്യമങ്ങളോട് പറഞ്ഞു.
 

അടൂർ ഗോപാലകൃഷ്ണന്റെ പരാമർശങ്ങളെക്കുറിച്ചും അതിനെതിരായ പ്രതികരണങ്ങളെക്കുറിച്ചും നിങ്ങളുടെ അഭിപ്രായം എന്താണ്?

Article Summary: Police complaint filed against Adoor Gopalakrishnan for controversial remarks.

#AdoorGopalakrishnan #Controversy #SCSTAct #KeralaFilm #MalayalamCinema #PoliceComplaint