പൂനെ: (KVARTHA) ഫ്ലാറ്റിലെ വളർത്തുനായയുടെ ആക്രമണത്തിൽനിന്ന് ഓടി രക്ഷപ്പെടുന്നതിനിടെ സമുച്ചയത്തിൻ്റെ മൂന്നാം നിലയിൽനിന്നു വീണ് ഇലക്ട്രിഷ്യൻ മരിച്ച സംഭവത്തിൽ നായയുടെ ഉടമസ്ഥനെതിരെ പൊലീസ് കേസെടുത്തു. പുണെയിലെ മംഗൾവാർ പേഠ് സ്വദേശി രമേശ് ഗായ്ക്വാഡ് (45) ആണ് അപകടത്തിൽപ്പെട്ടതിനെ തുടർന്ന് മരിച്ചത്. നായയുടെ ഉടമസ്ഥനായ സിദ്ധാർഥ് കാംബ്ലെക്കെതിരെയാണ് കേസെടുത്തിട്ടുള്ളത്.

അപകടം സംഭവിച്ചത് ഇങ്ങനെ

മംഗൾവാർ പേഠിൽനിന്ന് ഒരു കിലോമീറ്റർ അകലെയുള്ള കസബ പേഠിലെ സിദ്ധിവിനായക് ഹൗസിങ് സൊസൈറ്റിയിൽ ഇലക്ട്രിക് വർക്കുമായി ബന്ധപ്പെട്ടാണ് രമേശ് എത്തിയത്. മൂന്നാം നിലയിൽ പണി നടക്കുന്നതിനിടെ നാലാം നിലയിൽനിന്ന് ഒരു ജർമൻ ഷെപ്പേർഡ് ഇനത്തിൽപ്പെട്ട വളർത്തുനായ രമേശിനെ കടിക്കാൻ പാഞ്ഞെത്തി. നായയുടെ ആക്രമണം ഭയന്ന് ഓടുന്നതിനിടയിലാണ് രമേശ് താഴേക്കു വീണത്. അപകടത്തിൽപ്പെട്ട രമേശ് തൽക്ഷണം മരിച്ചതായി പൊലീസ് അറിയിച്ചു.

ഉടമസ്ഥനെതിരെ കേസ്

രമേശിൻ്റെ ഭാര്യ നൽകിയ പരാതിയിലാണ് പൊലീസ് കേസ് രജിസ്റ്റർ ചെയ്തത്. നായയുടെ ഉടമസ്ഥനായ കാംബ്ലെക്കെതിരെയാണ് കേസെടുത്തിരിക്കുന്നത്. പൂനെ മുനിസിപ്പൽ കോർപറേഷൻ്റെ ലൈസൻസ് ഇല്ലാതെയാണ് കാംബ്ലെ നായയെ വളർത്തിയിരുന്നതെന്ന് അന്വേഷണത്തിൽ വ്യക്തമായതായി പൊലീസ് അറിയിച്ചു.

വളർത്തുമൃഗങ്ങളെ ഫ്ലാറ്റിൽ പരിപാലിക്കുമ്പോൾ സ്വീകരിക്കേണ്ട മുൻകരുതലും ഉടമസ്ഥൻ എടുത്തിരുന്നില്ലെന്ന് പൊലീസ് സബ് ഇൻസ്പെക്ടർ സന്തോഷ് ഗോറെ വ്യക്തമാക്കി. നായയുടെ ഉടമസ്ഥൻ്റെ അശ്രദ്ധയാണ് അപകടത്തിലേക്ക് നയിച്ചതെന്നും പൊലീസ് പറഞ്ഞു.
 

വളർത്തുനായയുടെ ആക്രമണത്തിൽ ഇലക്ട്രിഷ്യൻ മരിച്ച സംഭവത്തിൽ നിങ്ങളുടെ അഭിപ്രായം പങ്കുവെക്കുക.

Article Summary: Electrician dies falling from 3rd floor after dog attack; owner booked for negligence.

#MumbaiCrime #DogAttack #ElectricianDeath #PuneNews #NegligenceCase #GermanShepherd