പാലക്കാട്: (KVARTHA) ചിറ്റൂരിൽ ശനിയാഴ്ച കാണാതായ ആറ് വയസുകാരൻ സുഹാനെ മരിച്ച നിലയിൽ കണ്ടെത്തി. 20 മണിക്കൂർ നീണ്ട ഉദ്വേഗഭരിതമായ തിരച്ചിലിനൊടുവിലാണ് ഞായറാഴ്ച (2025 ഡിസംബർ 28) രാവിലെ കുട്ടിയുടെ മൃതദേഹം കണ്ടെത്തിയത്. അമ്പാട്ടുപാളയം എരുമൻകോട് മുഹമ്മദ് അനസ്– തൗഹിത ദമ്പതികളുടെ ഇളയമകനാണ് സുഹാൻ. വീടിന് 100 മീറ്റർ മാത്രം അകലെയുള്ള കുളത്തിൽ മൃതദേഹം പൊങ്ങിക്കിടക്കുന്ന നിലയിലായിരുന്നു.

ശനിയാഴ്ച (2025 ഡിസംബർ 27) ഉച്ചയ്ക്ക് 12 മണിയോടെയാണ് സുഹാനെ വീട്ടുമുറ്റത്ത് നിന്ന് കാണാതായത്. സഹോദരനുമായി കളിക്കുന്നതിനിടെ ഉണ്ടായ പിണക്കത്തെത്തുടർന്ന് കുട്ടി വീട്ടിൽ നിന്ന് ഇറങ്ങുകയായിരുന്നുവെന്ന് ബന്ധുക്കൾ പറയുന്നു. സാധാരണ കുട്ടികൾക്കിടയിൽ ഉണ്ടാകാറുള്ള ചെറിയ പിണക്കമായിരുന്നതിനാൽ പെട്ടെന്ന് തിരിച്ചെത്തുമെന്ന് കരുതിയെങ്കിലും ഏറെ വൈകിയിട്ടും കുട്ടിയെ കാണാതായതോടെ വീട്ടുകാരും നാട്ടുകാരും തിരച്ചിൽ ആരംഭിക്കുകയായിരുന്നു.

നീലിഗിരി പബ്ലിക് സ്കൂൾ അധ്യാപികയായ സുഹാന്റെ അമ്മ തൗഹിത സ്കൂളിലെ ഒരു ആവശ്യത്തിനായി പോയ സമയത്തായിരുന്നു സംഭവം. വിവരമറിഞ്ഞ് പോലീസും ഫയർഫോഴ്സും നാട്ടുകാരും ചേർന്നാണ് വിപുലമായ തിരച്ചിൽ നടത്തിയത്. പ്രദേശത്തെ തോടുകളും കുളങ്ങളും കേന്ദ്രീകരിച്ചായിരുന്നു പ്രധാനമായും തിരച്ചിൽ പുരോഗമിച്ചത്. ഒടുവിൽ ഞായറാഴ്ച രാവിലെ വീടിന് തൊട്ടടുത്തുള്ള കുളത്തിൽ കുട്ടിയെ മരിച്ച നിലയിൽ കണ്ടെത്തുകയായിരുന്നു.

മൃതദേഹം കണ്ടെത്തിയതിനെത്തുടർന്ന് പോലീസ് ഇൻക്വസ്റ്റ് നടപടികൾ പൂർത്തിയാക്കി. തുടർന്ന് വിദഗ്ധ പരിശോധനകൾക്കായി മൃതദേഹം പാലക്കാട് ജില്ലാ ആശുപത്രിയിലേക്ക് മാറ്റിയിട്ടുണ്ട്. കുട്ടിയുടെ അപ്രതീക്ഷിത വേർപാട് അമ്പാട്ടുപാളയം ഗ്രാമത്തെ ഒന്നാകെ കണ്ണീരിലാഴ്ത്തിയിരിക്കുകയാണ്.

ചിറ്റൂരിലെ ആറ് വയസുകാരന്റെ വിയോഗത്തിൽ അനുശോചനം രേഖപ്പെടുത്താം. നൊമ്പരവാർത്ത പങ്കുവെക്കൂ.

Article Summary: 6-year-old Suhan found dead in a pond near his home in Palakkad after 20 hours.

#Palakkad #Chittur #KeralaNews #Suhan #Tragedy #MissingChild