പാറശാല: (KVARTHA) ഉത്തർപ്രദേശിലെ ഹോസ്റ്റൽ മുറിയിൽ മരിച്ചനിലയിൽ കണ്ടെത്തിയ മലയാളി ഡോക്ടർ അഭിഷോ ഡേവിഡിന്റെ (32) മരണത്തിൽ അന്വേഷണം ആവശ്യപ്പെട്ട് ബന്ധുക്കൾ പ്രധാനമന്ത്രിക്കും മുഖ്യമന്ത്രിക്കും നിവേദനം അയച്ചു. അഭിഷോയുടെ പോസ്റ്റ്‌മോർട്ടം റിപ്പോർട്ടിനും മുറിയിലെ ഫൊറൻസിക് പരിശോധനാ ഫലത്തിനുമായി കാത്തിരിക്കുകയാണ് യു.പി. പോലീസ്.

പാറശാല പാലൂർക്കോണം പാമ്പാടുംകൂഴി അബിവില്ലയിൽ അഭിഷോയെ വെള്ളിയാഴ്ച രാവിലെയാണ് ഗോരഖ്പുർ ബി.ആർ.ഡി. മെഡിക്കൽ കോളജിലെ ഹോസ്റ്റലിൽ മരിച്ചനിലയിൽ കണ്ടെത്തിയത്. മൂന്നാം വർഷ പി.ജി. വിദ്യാർഥിയായിരുന്നു അദ്ദേഹം. ഞായറാഴ്ച രാത്രി നാട്ടിലെത്തിച്ച മൃതദേഹം ചൊവ്വാഴ്ച വീട്ടുവളപ്പിൽ സംസ്കരിച്ചു.

വെള്ളിയാഴ്ച രാവിലെ ഡ്യൂട്ടിക്ക് എത്താത്തതിനെ തുടർന്ന് ആശുപത്രി ജീവനക്കാർ ഹോസ്റ്റലിലെത്തി അകത്തുനിന്ന് പൂട്ടിയ വാതിൽ തകർത്ത് കയറിയപ്പോഴാണ് അഭിഷോയെ കട്ടിലിൽ മരിച്ചനിലയിൽ കണ്ടത്. മരണത്തിനു തലേന്നു രാത്രിയും ബന്ധുക്കളുമായി ഫോണിൽ സംസാരിച്ചിരുന്നു. ജൂലൈ 19-ന് നാട്ടിലേക്ക് വരാനിരിക്കുകയായിരുന്നു. രണ്ട് മാസം മുൻപാണ് ഒടുവിൽ നാട്ടിലെത്തിയത്. ഭാര്യ ഡോ. നിമിഷ തിരുവനന്തപുരം എസ്.ഐ.ടി. ആശുപത്രി ഗൈനക്കോളജി വിഭാഗം പി.ജി. വിദ്യാർഥിനിയാണ്. 10 മാസം മുൻപായിരുന്നു ഇവരുടെ വിവാഹം.
 

ഒരു യുവ ഡോക്ടറുടെ ദുരൂഹമരണം സംബന്ധിച്ച് നിങ്ങളുടെ അഭിപ്രായം എന്താണ്? ഇത്തരം സംഭവങ്ങളിൽ അധികൃതരുടെ ഇടപെടൽ എത്രത്തോളം പ്രധാനമാണ്? കമന്റ് ചെയ്യുക.

Article Summary: Malayali doctor found dead in UP hostel; family seeks probe.

#MalayaliDoctor #UPDeath #AbishoDavid #MysteryDeath #KeralaNews #PoliceProbe