കൊല്ലം: (KVARTHA) കുണ്ടറയില്‍ പൊട്ടിക്കിടന്ന വൈദ്യുതി കമ്പിയിൽ നിന്ന് ഷോക്കേറ്റ് വയോധികൻ മരിച്ചു. പെരുമ്പുഴ തലപ്പറമ്പ് ജങ്ഷനു സമീപം പത്മാലയത്തിൽ ഗോപാലകൃഷ്ണൻ പിള്ള (72) ആണ് മരിച്ചത്. വീടിന് സമീപത്തെ പറമ്പിൽ പുല്ല് ശേഖരിക്കുന്നതിനിടെ അബദ്ധത്തിൽ വൈദ്യുതി കമ്പിയിൽ പിടിക്കുകയായിരുന്നുവെന്ന് പോലീസ് അറിയിച്ചു. ഒപ്പമുണ്ടായിരുന്ന മകൾ അശ്വതിയുടെ കൈയ്ക്കും പൊള്ളലേറ്റു.

അശ്വതിയുടെ നിലവിളി കേട്ട് സമീപത്തുണ്ടായിരുന്നവർ ഓടിയെത്തി വൈദ്യുതി കമ്പി തട്ടിമാറ്റി. സമീപവാസിയായ ആംബുലൻസ് ഡ്രൈവർ അരുൺ പ്രാഥമിക ശുശ്രൂഷ നൽകി ഉടൻ തന്നെ പെരുമ്പുഴയിലെ ആശുപത്രിയിൽ എത്തിച്ചെങ്കിലും ഗോപാലകൃഷ്ണൻ പിള്ളയെ രക്ഷിക്കാനായില്ല. ഗുരുതരമായി പൊള്ളലേറ്റ അശ്വതിയെ കൊല്ലത്തെ ആശുപത്രിയിൽ പ്രവേശിപ്പിച്ചിരിക്കുകയാണ്.

അപകട കാരണം വൈദ്യുത കമ്പികൾ പൊട്ടിക്കിടന്നത്

കഴിഞ്ഞ മഴയിൽ തലപ്പറമ്പ് റോഡിൽ മരം വീണ് മൂന്ന് വൈദ്യുത പോസ്റ്റുകൾ ഒടിഞ്ഞുവീണിരുന്നു. സമീപത്തെ വീടുകൾക്ക് താത്കാലികമായി വൈദ്യുതി നൽകിയിരുന്നെങ്കിലും ഒടിഞ്ഞ പോസ്റ്റുകളും കമ്പികളും മാറ്റിയിരുന്നില്ലെന്ന് നാട്ടുകാർ പറയുന്നു. വൈദ്യുതി വിതരണം ആരംഭിച്ചപ്പോൾ പൊട്ടിക്കിടന്ന കമ്പികളിലൂടെ വൈദ്യുതി പ്രവഹിച്ചതാകാം അപകടത്തിന് കാരണമെന്ന് സംശയിക്കുന്നതായി പോലീസ് അറിയിച്ചു. മൃതദേഹം ജില്ലാ ആശുപത്രി മോർച്ചറിയിലേക്ക് മാറ്റി. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു.

വൈദ്യുതി കമ്പികളുടെ സുരക്ഷാ വീഴ്ചകളെക്കുറിച്ച് നിങ്ങളുടെ അഭിപ്രായം എന്താണ്? ഇത്തരം അപകടങ്ങൾ ഒഴിവാക്കാൻ എന്ത് മുൻകരുതലുകളാണ് വേണ്ടത്? കമന്റ് ചെയ്യുക.

Article Summary: Elderly man electrocuted by broken power line in Kundara, Kerala; daughter hospitalized. Negligence suspected.

#KeralaAccident, #Electrocution, #Kundara, #PowerLineSafety, #Tragedy, #Negligence