കോഴിക്കോട്: (KVARTHA) നഗരത്തിൽ ഫ്രാൻസിസ് റോഡ് മേൽപാലത്തിന് സമീപം വ്യാഴാഴ്ച പുലർച്ചെ ഇരുചക്രവാഹനങ്ങൾ കൂട്ടിയിടിച്ച് നാല് പേർക്ക് പരിക്കേറ്റ സംഭവത്തിൽ രണ്ട് പേർ മരിച്ചു. കല്ലായിൽ നിന്നു സൗത്ത് ബീച്ചിലേക്ക് പോയ ബൈക്കും എതിരെ വന്ന സ്കൂട്ടറുമാണ് കൂട്ടിയിടിച്ചത്. അപകടത്തിൽ ബൈക്ക് യാത്രക്കാരായ കല്ലായി കട്ടയാട്ട്പറമ്പ് പള്ളിക്കു സമീപം ഫാത്തിമ കോട്ടേജിൽ ആർ.എം. അഫ്‌ന (20), സുഹൃത്ത് മാങ്കാവ് കാളൂർ റോഡ് പറമണ്ണിൽ മഹൽ (23) എന്നിവരാണ് മരിച്ചത്.

അപകടത്തിൽപ്പെട്ടവരും ചികിത്സയും

അഫ്‌ന അപകടം നടന്ന ദിവസവും മഹൽ വെള്ളിയാഴ്ചയുമാണ് (01.08.2025) മരിച്ചത്. അപകടത്തിൽ പരിക്കേറ്റ അത്തോളി സ്വദേശി യാസിൻ (28), സ്കൂട്ടർ യാത്രക്കാരനായ പാലക്കാട് മണ്ണാർക്കാട് സ്വദേശി കണ്ണമംഗലം കളത്തിൽ ഷാഫി (42) എന്നിവരെ ആശുപത്രിയിൽ പ്രവേശിപ്പിച്ചു. ഇവരുടെ പരിക്ക് ഗുരുതരമല്ലെന്ന് ആശുപത്രി അധികൃതർ അറിയിച്ചു. ഇടിയുടെ ആഘാതത്തിൽ അഫ്‌ന ബൈക്കിൽ നിന്ന് തെറിച്ചു വീണ് സമീപത്തെ വൈദ്യുത തൂണിൽ തലയിടിക്കുകയായിരുന്നു. ഉടൻതന്നെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മഹൽ വെള്ളിയാഴ്ച രാവിലെ 10.25-നാണ് മരിച്ചത്. അഫ്‌നയും മഹലും മാങ്കാവ് ഇൻസ്റ്റാ മാർട്ട് ജീവനക്കാരായിരുന്നു.

അന്വേഷണവും വ്യക്തി വിവരങ്ങളും

മൃതദേഹം ബന്ധുക്കൾക്ക് വിട്ടുനൽകി. അപകടത്തില്‍ കേസെടുത്ത് അന്വേഷണം ആരംഭിച്ചതായി ചെമ്മങ്ങാട് പോലീസ് ഇൻസ്പെക്ടർ കെ.എസ്. അജേഷ് അറിയിച്ചു. ചക്കുംകടവ് സ്വദേശി ഹംസക്കോയയുടേയും തണ്ണിച്ചാൽ റഷീദയുടെയും മകളാണ് അഫ്‌ന. താരിഷയാണ് സഹോദരി. കാളൂർ റോഡ് പറമണ്ണിൽ പരേതനായ ദിനേശന്റെയും രേഷ്മയുടെയും മകനാണ് മഹൽ. അദ്വൈതാണ് സഹോദരൻ.

ഇരുചക്രവാഹന യാത്രക്കാർക്കിടയിൽ റോഡ് സുരക്ഷയെക്കുറിച്ച് നിങ്ങൾക്കെന്ത് പറയാനുണ്ട്? അഭിപ്രായം പങ്കുവെക്കൂ.

Two young individuals died, and two others were injured in a bike-scooter collision near Francis Road overbridge in Kozhikode.

#KozhikodeAccident #RoadSafety #TragicDeath #BikeAccident #ScooterAccident #KeralaAccident