ന്യൂഡെല്‍ഹി: (KVARTHA) ജമ്മു കശ്മീരിലെ പഹൽഗാമിലുണ്ടായ ഭീകരാക്രമണത്തിൽ 26 വിനോദസഞ്ചാരികളുടെ ജീവൻ നഷ്ടപ്പെട്ട സംഭവത്തിൽ രാജ്യത്തിന്റെ നടുക്കം ഇനിയും മാറിയിട്ടില്ല. എന്നാൽ ഈ ദുരന്തത്തിനിടയിലും മനുഷ്യത്വത്തിൻ്റെ പ്രകാശ കിരണമായി മാറിയ ഒരു സംഭവമാണ് പുറത്തുവരുന്നത്. സുരക്ഷാ സൈന്യമോ പൊലീസോ എത്തിച്ചേരുന്നതിന് മുൻപ് തന്നെ, ബൈസരനിൽ വെടിവയ്പ്പിനിരയായ വിനോദസഞ്ചാരികളെ രക്ഷിക്കാൻ മുന്നിട്ടിറങ്ങിയത് അവിടുത്തെ സാധാരണക്കാരായ കച്ചവടക്കാരും കുതിരയോട്ടക്കാരുമാണ്.

നസാകത്ത് അലിയുടെ ധീരത

ഈ രക്ഷാപ്രവർത്തനത്തിൽ നിർണായക പങ്കുവഹിച്ച വ്യക്തിയാണ് നസാകത്ത് അലി എന്ന കശ്മീരി യുവാവ്. മൂന്ന് കുട്ടികൾ ഉൾപ്പെടെ 11 പേരെയാണ് നസാകത്ത് സ്വന്തം ജീവൻ പണയപ്പെടുത്തി രക്ഷിച്ചത്. ഛത്തീസ്ഗഢിലെ ബിജെപി യുവമോർച്ച നേതാവായ അരവിന്ദ് എസ്. അഗർവാൾ താൻ ഉൾപ്പെടെയുള്ള വിനോദസഞ്ചാരികളുടെ ജീവൻ രക്ഷിച്ച നസാകത്തിനെ ഫേസ്ബുക്കിലൂടെ പ്രകീർത്തിച്ചു.

അദ്ദേഹം കുറിച്ചു: 'മുസ്‌ലിംകൾ നമ്മുടെ ശത്രുക്കളാണെന്ന ചിന്ത നിങ്ങളുടെ മനസിൽ നിന്ന് എടുത്തു കളയണം. എല്ലാ സമൂഹത്തിലും നല്ലവരും ചീത്തയാളുകളും ക്രിമിനൽ ഘടകങ്ങളും കാണാം. എന്നാൽ മനുഷ്യത്വത്തെ സ്നേഹിക്കുന്ന ആളുകൾ എല്ലാ സമൂഹത്തിലുമുണ്ട്. മനുഷ്യത്വത്തെ സ്നേഹിക്കുന്നവരോടൊപ്പം നിൽക്കുകയും വിദ്വേഷം പ്രചരിപ്പിക്കുന്നവരെ തുരത്തുകയും വേണം. ബിജെപിക്കാരനാണെങ്കിലും അരവിന്ദ് അഗർവാൾ തന്റെ ഫേസ്ബുക്ക് വാളിൽ നസാകത്ത് അലി സാഹിബിനോടുള്ള ആദരവ് പ്രകടിപ്പിച്ചിട്ടുണ്ട്. നസാകത്ത് അലിക്ക് സല്യൂട്ട്.'

കണ്ണീരോടെ രാമചന്ദ്രന്റെ മകൾ

ഭീകരാക്രമണത്തിൽ കൊല്ലപ്പെട്ട കൊച്ചി ഇടപ്പള്ളി സ്വദേശി രാമചന്ദ്രന്റെ മകൾ ആരതിയും തങ്ങളെ സഹായിച്ച കശ്മീരികളെക്കുറിച്ച് ഹൃദയസ്പർശിയായി സംസാരിച്ചു. 'നാട്ടുകാർ വളരെയധികം സഹായിച്ചു. അവരാണ് റൂമും കാര്യങ്ങളുമെല്ലാം ചെയ്തു തന്നത്. അതിന് പണമൊന്നും വാങ്ങിയില്ല. മുസാഫിർ, സമീർ എന്നീ കശ്മീരി ഡ്രൈവർമാർ സഹോദരിയെ പോലെയാണ് എന്നെ നോക്കിയത്,' ആരതി മാധ്യമങ്ങളോട് പറഞ്ഞു.

'രാത്രി മൂന്ന് മണിവരെ ഞാൻ മോർച്ചറിയുടെ മുന്നിലായിരുന്നു. അപ്പോഴൊക്ക ഇവരായിരുന്നു കൂടെ. കശ്മീരിൽ പോയപ്പോൾ എനിക്ക് രണ്ട് സഹോദരന്മാരെ കിട്ടി എന്നാണ് യാത്രയയക്കാൻ എയർപോർട്ടിൽ വന്നപ്പോൾ അവരോട് ഞാൻ പറഞ്ഞത്. അല്ലാഹു അവരെ രക്ഷിക്കട്ടെ എന്നും ഞാൻ പറഞ്ഞു,' അവർ കൂട്ടിച്ചേർത്തു.

ചൊവ്വാഴ്ചയുണ്ടായ രാജ്യത്തെ നടുക്കിയ ഭീകരാക്രമണത്തിൽ നിരവധി പേർക്ക് പരിക്കേൽക്കുകയും ചെയ്തു.

പഹൽഗാമിലെ രക്ഷാപ്രവർത്തനത്തെക്കുറിച്ചുള്ള ഈ വാർത്ത ഷെയർ ചെയ്യൂ, മനുഷ്യത്വത്തിന് പ്രോത്സാഹനമാകട്ടെ

BJP leader praised a Kashmiri youth, Nasakhat Ali, for saving tourists during the Pahalgam terror attack, highlighting humanity over hatred. Victims' families also acknowledged the selfless help from locals.

#PahalgamAttack, #KashmirTerror, #Humanity, #NasakhatAli, #BJPLeder, #SaveLives