മലപ്പുറം: (KVARTHA) വണ്ടൂർ കരുവാരക്കുണ്ടിൽ നരഭോജിക്കടുവയെ പിടികൂടാനുള്ള ദൗത്യത്തിനിടെ ചെങ്കുത്തായ മലയിൽനിന്ന് വീണ് ഡിഎഫ്ഒ ജി. ധനിക് ലാലിന് പരുക്കേറ്റു. കാൽപാദത്തിന്റെ എല്ലിന് പൊട്ടലുണ്ട്. സംഭവസ്ഥലത്തുനിന്ന് വനപാലകരും സംഘാംഗങ്ങളും ചേർന്ന് സാഹസികമായി വടംകെട്ടി താഴെയെത്തിക്കുകയും ആംബുലൻസിൽ വണ്ടൂരിലെ സ്വകാര്യ ആശുപത്രിയിൽ പ്രവേശിപ്പിക്കുകയും ചെയ്തു.

കാലിന്റെ ഉപ്പൂറ്റിയിലാണ് പൊട്ടലുള്ളത്. ശസ്ത്രക്രിയ വേണമെന്ന് ഡോക്ടർമാർ അറിയിച്ചെങ്കിലും, കടുത്ത പ്രമേഹമുള്ളതിനാൽ തൽക്കാലം പ്ലാസ്റ്റർ ഇട്ടു. ഒരാഴ്ച കഴിഞ്ഞ് ശസ്ത്രക്രിയ നടത്താനാണ് തീരുമാനം. ടാപ്പിങ് തൊഴിലാളിയായ യുവാവിനെ കടിച്ചു കൊന്ന കടുവയെ പാന്ത്ര എസ് വളവിലെ മദാരി എസ്റ്റേറ്റിൽ ബുധനാഴ്ച വൈകിട്ടോടെ കണ്ടിരുന്നു. ഇതിനെത്തുടർന്നാണ് ഡിഎഫ്ഒയുടെ നേതൃത്വത്തിൽ രണ്ട് സംഘങ്ങളായി തിരച്ചിൽ ആരംഭിച്ചത്.

വഴി പോലുമില്ലാത്ത പ്രദേശത്തുകൂടി സാഹസികമായി കുത്തനെയുള്ള മലയിറങ്ങുമ്പോൾ ധനിക് ലാൽ കാൽ വഴുതി താഴേക്ക് വീഴുകയായിരുന്നു. ധനിക് ലാലിനെ ഫോണിൽ വിളിച്ച് സംസാരിച്ച വനംവകുപ്പ് മന്ത്രി എ.കെ. ശശീന്ദ്രൻ അദ്ദേഹത്തിന് എല്ലാവിധ ചികിത്സാ സഹായങ്ങളും ഉറപ്പുനൽകി.

നരഭോജി കടുവയെ പിടികൂടാനുള്ള വനംവകുപ്പിന്റെ ശ്രമങ്ങളെക്കുറിച്ച് നിങ്ങളുടെ അഭിപ്രായം പങ്കുവെക്കുക. മനുഷ്യരും വന്യജീവികളും തമ്മിലുള്ള സംഘർഷം കുറയ്ക്കാൻ എന്തുചെയ്യാനാകും? വാർത്ത ഷെയര്‍ ചെയ്യൂ.

Article Summary: DFO G. Dhanik Lal was injured, fracturing his foot, after falling from a steep hill during a mission to capture a man-eater tiger in Wandoor, Malappuram. The operation continued after sighting the tiger that had killed a tapping worker.

#KeralaForest #TigerAttack #DFOInjured #Malappuram #WildlifeConflict #Wandoor