കോഴിക്കോട്: (KVARTHA) കൊളങ്ങരപ്പീടികയിൽ പേപ്പർ അവശിഷ്ടങ്ങൾ സൂക്ഷിച്ചിരുന്ന എക്കോ ഇക്കോ പേപ്പേഴ്‌സ് ആൻ്റ് സ്‌ക്രാപ്പ് (Eco papers and scrap) എന്ന സ്ഥാപനത്തിൻ്റെ ഗോഡൗണിന് തീപിടിച്ചു. തീപിടിത്തത്തിൽ ഷെഡ് പൂർണമായും കത്തിനശിക്കുകയും സമീപത്തെ കെട്ടിടത്തിന് കേടുപാടുകൾ സംഭവിക്കുകയും ചെയ്തു.

പുലർച്ചെ 1.20-ഓടെയാണ് അപകടമുണ്ടായത്. മീഞ്ചന്ത ഫയർ സ്റ്റേഷനിൽ നിന്ന് മൂന്ന് യൂണിറ്റ് ഫയർഫോഴ്സ് സംഘം ഏകദേശം നാല് മണിക്കൂറോളം പരിശ്രമിച്ചാണ് പുലർച്ചെയോടെ തീ പൂർണമായും അണച്ചത്. തീപിടിത്തത്തിൽ ഏകദേശം 5 ലക്ഷം രൂപയുടെ നഷ്ടം കണക്കാക്കുന്നുണ്ട്.

ഗോഡൗഡിനോട് ചേർന്നുണ്ടായിരുന്ന ചെറിയ വീട്ടിൽ ഒരു ബിഹാർ കുടുംബം താമസിച്ചിരുന്നു. എന്നാൽ, പെരുന്നാൾ അവധിക്ക് ഇവർ നാട്ടിൽ പോയതിനാൽ വലിയൊരു അപകടം ഒഴിവായെന്ന് അധികൃതർ അറിയിച്ചു. തീപിടിത്തത്തിൻ്റെ കാരണം വ്യക്തമല്ല, അന്വേഷണം നടന്നുവരികയാണ്.

അതേസമയം, തിരുവനന്തപുരം നഗരത്തിലെ പി.എം.ജി. ജംഗ്ഷനിൽ പ്രവർത്തിക്കുന്ന ടി.വി.എസ്. സ്കൂട്ടർ ഷോറൂമിലും പുലർച്ചെ നാല് മണിയോടെ വൻ തീപിടിത്തം ഉണ്ടായി. അഞ്ച് ഫയർഫോഴ്സ് യൂണിറ്റുകൾ സംഭവസ്ഥലത്തെത്തിയിരുന്നു. മണിക്കൂറുകൾ നീണ്ട പരിശ്രമത്തിനൊടുവിൽ തീ പൂർണ്ണമായും നിയന്ത്രണ വിധേയമാക്കിയതായി ഫയർഫോഴ്സ് ഉദ്യോഗസ്ഥർ അറിയിച്ചു.

തീപിടിത്തത്തിൻ്റെ കാരണം വ്യക്തമല്ല. ഷോർട്ട് സർക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം. അപകട സമയത്ത് ജീവനക്കാർ ആരും ഷോറൂമിൽ ഉണ്ടായിരുന്നില്ല. സമീപത്തുള്ള കെട്ടിടത്തിലെ സുരക്ഷാ ജീവനക്കാരനാണ് തീപിടിത്തം കണ്ട് ഫയർഫോഴ്സിനെ വിവരമറിയിച്ചത്. തിരുവനന്തപുരത്ത് നിന്ന് നാല് യൂണിറ്റ്, ചാക്കയിൽ നിന്ന് മൂന്ന് യൂണിറ്റ്, വിഴിഞ്ഞം, കഴക്കൂട്ടം, നെടുമങ്ങാട് എന്നിവിടങ്ങളിൽ നിന്ന് ഓരോ യൂണിറ്റ് വീതം ഉൾപ്പെടെ നിരവധി ഫയർഫോഴ്സ് യൂണിറ്റുകളാണ് രക്ഷാപ്രവർത്തനത്തിനെത്തിയത്.

പുതിയ സ്കൂട്ടറുകൾക്ക് അടക്കം തീപിടിച്ചതിനാൽ ലക്ഷക്കണക്കിന് രൂപയുടെ നഷ്ടം സംഭവിച്ചിട്ടുണ്ടെന്നാണ് പ്രാഥമിക വിലയിരുത്തൽ. കൂടുതൽ വിവരങ്ങൾ ലഭ്യമാകുന്നതിനായി അന്വേഷണം നടന്നുവരികയാണ്.

പഴയ പേപ്പർ ശേഖരണ കേന്ദ്രങ്ങളിലെ സുരക്ഷാ മുൻകരുതലുകൾ എന്തൊക്കെയായിരിക്കണം? ഈ വാർത്ത പങ്കുവെച്ച് നിങ്ങളുടെ കാഴ്ചപ്പാടുകൾ അറിയിക്കുക.

Article Summary: Kozhikode paper scrap godown fire; 5 lakh loss, major disaster averted.

#KozhikodeFire #GodownFire #PaperScrap #FireAccident #KeralaNews #EmergencyResponse