മലപ്പുറം: (KVARTHA) മലപ്പുറം കൂരിയാട് ദേശീയപാതയിലെ തകർച്ചയിൽ നിർമ്മാണ കമ്പനികൾക്ക് ഗുരുതര വീഴ്ച സംഭവിച്ചതായി വിദഗ്ധ സമിതിയുടെ കണ്ടെത്തൽ. ഇടിഞ്ഞ ഭാഗത്തെ റോഡ് പൂർണമായും പുനർനിർമ്മിക്കണമെന്നും സംരക്ഷണ ഭിത്തി ഉൾപ്പെടെ തകർന്ന ഭാഗത്തെ ഒരു കിലോമീറ്റർ ദൂരം റോഡ് പുതിയതായി നിർമ്മിക്കണമെന്നും സമിതി കേന്ദ്ര സർക്കാരിന് സമർപ്പിച്ച റിപ്പോർട്ടിൽ ശുപാർശ ചെയ്തു. പ്രദേശത്ത് വീണ്ടും സംരക്ഷണ ഭിത്തി തകരുകയും റോഡിൽ വിള്ളലുകൾ രൂപപ്പെടുകയും ചെയ്ത സാഹചര്യത്തിലാണ് വിദഗ്ധ സമിതിയുടെ ഈ കണ്ടെത്തലുകൾക്ക് പ്രസക്തിയേറുന്നത്.

പ്രദേശത്ത് റോഡ് നിർമിക്കുന്നതിന് മണ്ണ് പരിശോധനയടക്കം ഫലപ്രദമായി നടത്തിയില്ലെന്ന് വിദഗ്ധ സമിതി പറയുന്നു. നിർഭാഗ്യകരമായ സംഭവമാണ് നടന്നതെന്നാണ് ട്രാൻസ്പോർട്ട് സെക്രട്ടറി റിപ്പോർട്ടിൽ വ്യക്തമാക്കുന്നത്. നിർമാണ കമ്പനിയടക്കമുള്ള ഏജൻസികൾക്ക് വൻവീഴ്ചയുണ്ടായെന്നും റിപ്പോർട്ടിലുണ്ട്. കൂരിയാട് മേഖലയിലെ നെൽപാടങ്ങളിലടക്കം ആവശ്യമായ സാങ്കേതിക പരിശോധന നടന്നില്ലെന്നും ഡിസൈനിൽ വൻ തകരാറുണ്ടെന്നും വിദഗ്ധ സമിതി കണ്ടെത്തി.

കൂരിയാട് വീണ്ടും സംരക്ഷണഭിത്തി ഇടിഞ്ഞു

അതിനിടെ, കൂരിയാട് ദേശീയപാതയിൽ വീണ്ടും സംരക്ഷണ ഭിത്തി തകർന്നു. ദേശീയപാതയുടെ ഭാഗമായുള്ള സംരക്ഷണ ഭിത്തിയുടെ ഒരു ഭാഗമാണ് പൊളിഞ്ഞത്. നേരത്തേ വലിയ രീതിയിൽ തകർച്ചയുണ്ടായ സ്ഥലത്തിനു സമീപത്താണ് സംരക്ഷണ ഭിത്തി പൊളിഞ്ഞത്.

കനത്ത മഴയ്ക്കിടെ സംരക്ഷണ ഭിത്തിയുടെ ഒരു ഭാഗം പൂർണമായും പൊളിഞ്ഞ് സർവീസ് റോഡിലേക്ക് പതിക്കുകയായിരുന്നു. പ്രധാന പാതയുടെ പാർശ്വഭിത്തിയിലെ സിമൻ്റ് കട്ടകളാണ് തകർന്നു വീണത്. പ്രദേശത്ത് കൂടുതൽ സ്ഥലങ്ങളിൽ സർവീസ് റോഡിനു വിള്ളൽ രൂപപ്പെട്ടിട്ടുണ്ട്. കനത്ത മഴ തുടരുന്നതിനാൽ സമീപത്തെ വയലുകളിൽ വെള്ളം കയറിയിട്ടുണ്ട്.

കൂരിയാട്ടെ ദേശീയപാത തകർച്ചയെക്കുറിച്ച് നിങ്ങളുടെ അഭിപ്രായം എന്താണ്? ഇത്തരം നിർമ്മാണ വീഴ്ചകൾ ആവർത്തിക്കാതിരിക്കാൻ എന്ത് നടപടികളാണ് സ്വീകരിക്കേണ്ടത്? നിർദ്ദേശങ്ങൾ പങ്കുവെക്കുക.

Article Summary: Expert committee confirms serious lapses in Kooriyad highway collapse, recommends full reconstruction.

#KooriyadHighway #RoadCollapse #Malappuram #ConstructionLapses #ExpertReport #NationalHighway