തിരുവനന്തപുരം: (KVARTHA) കേരളത്തിൻ്റെ പുതിയ സംസ്ഥാന പോലീസ് മേധാവിയെ തിരഞ്ഞെടുക്കുന്നതുമായി ബന്ധപ്പെട്ട് സംസ്ഥാന സർക്കാർ കേന്ദ്രത്തിന് സമർപ്പിച്ച പട്ടികയിൽ അപ്രതീക്ഷിത മാറ്റങ്ങൾ വരുത്തി യു.പി.എസ്.സി (യൂണിയൻ പബ്ലിക് സർവീസ് കമ്മിഷൻ). പോലീസ് മേധാവി സ്ഥാനത്തേക്ക് സംസ്ഥാനം നിർദേശിച്ച എ.ഡി.ജി.പി. എം.ആർ. അജിത് കുമാറിനെയും വിജിലൻസ് ഡയറക്ടർ മനോജ് എബ്രഹാമിനെയും എസ്.പി.ജി. ഉപമേധാവി സുരേഷ് രാജ് പുരോഹിതിനെയും കേന്ദ്രം പരിഗണിക്കാതെ പുറത്താക്കി. റോഡ് സേഫ്റ്റി കമ്മിഷണർ നിധിൻ അഗർവാൾ, ഐ.ബി. സ്പെഷ്യൽ ഡയറക്ടർ റവാഡ ചന്ദ്രശേഖർ, ഫയർഫോഴ്സ് മേധാവി യോഗേഷ് ഗുപ്ത എന്നിവരാണ് പുതിയ ചുരുക്കപ്പട്ടികയിൽ ഇടംപിടിച്ചത്. വ്യാഴാഴ്ച ഡൽഹിയിൽ ചേർന്ന യു.പി.എസ്.സി. യോഗത്തിലാണ് മൂന്നംഗ ചുരുക്കപ്പട്ടികയ്ക്ക് അന്തിമരൂപമായത്.

യു പി എസ് സിയുടെ തീരുമാനം സർക്കാരിന് തിരിച്ചടി

എം.ആർ. അജിത് കുമാറിനെ ഡി.ജി.പി. സ്ഥാനത്തേക്ക് കൊണ്ടുവരാനുള്ള സംസ്ഥാന സർക്കാരിൻ്റെ ശ്രമത്തിനാണ് പുതിയ പട്ടികയോടെ തിരിച്ചടിയായിരിക്കുന്നത്. ഡി.ജി.പി. റാങ്കിലുള്ള നാലുപേരെ മാത്രമേ പരിഗണിക്കൂ എന്ന് കേന്ദ്രം അറിയിച്ചിരുന്നുവെങ്കിലും, എം.ആർ. അജിത് കുമാറിനെ ഉൾപ്പെടുത്തുന്നതിനുവേണ്ടിയാണ് എ.ഡി.ജി.പി. റാങ്കിലുള്ള ഉദ്യോഗസ്ഥരെക്കൂടി ഉൾപ്പെടുത്തി സംസ്ഥാന സർക്കാർ ആറംഗ പട്ടിക തയ്യാറാക്കി കേന്ദ്രത്തിനയച്ചത്. അജിത് കുമാർ ചുരുക്കപ്പട്ടികയിൽ ഉൾപ്പെട്ടിരുന്നെങ്കിൽ സർക്കാർ അദ്ദേഹത്തെ സംസ്ഥാന പോലീസ് മേധാവി സ്ഥാനത്തേക്ക് പരിഗണിക്കുമെന്നായിരുന്നു റിപ്പോർട്ടുകൾ.

എം ആർ അജിത് കുമാറിനെതിരെയുള്ള ആരോപണങ്ങൾ

എം.ആർ. അജിത് കുമാറിനെതിരെ ഗുരുതര ആരോപണങ്ങൾ ഉയർന്നിരുന്നു. കവടിയാറിലെ ഫ്‌ളാറ്റ്, വീട് നിർമാണം, ഫ്‌ളാറ്റ് വാങ്ങൽ, സ്വർണ്ണക്കടത്ത് അടക്കമുള്ള ആരോപണങ്ങൾ പി.വി. അൻവർ എം.എൽ.എ. ഉൾപ്പെടെയുള്ളവർ ഉന്നയിച്ചിരുന്നു. വിഷയത്തിൽ വിജിലൻസ് തിരുവനന്തപുരം യൂണിറ്റ് അന്വേഷണം നടത്തിയെങ്കിലും അജിത് കുമാറിന് ക്ലീൻ ചിറ്റ് നൽകുന്നതായിരുന്നു റിപ്പോർട്ട്.

കൂടാതെ, കഴിഞ്ഞ തൃശ്ശൂർ പൂരം അലങ്കോലമായ സംഭവത്തിൽ എം.ആർ. അജിത് കുമാർ അന്വേഷണം നേരിട്ടിരുന്നു. സംസ്ഥാന പോലീസ് മേധാവി ഷെയ്ഖ് ദർവേഷ് സാഹിബ് നടത്തിയ വകുപ്പുതല അന്വേഷണത്തിൽ പൂരം അലങ്കോലമായതിൽ അജിത് കുമാറിന് ഗുരുതര വീഴ്ചയുണ്ടായെന്ന് റിപ്പോർട്ട് നൽകിയിരുന്നു. ഈ ആരോപണങ്ങൾ ഉയർന്നിട്ടും എം.ആർ. അജിത് കുമാറിനെ ഡി.ജി.പി. പട്ടികയിൽ ഉൾപ്പെടുത്തിയ സർക്കാർ തീരുമാനം വലിയ വിമർശനങ്ങൾക്ക് വഴിവെച്ചിരുന്നു.

അടുത്ത പോലീസ് മേധാവി ആര്?

നിലവിലെ സംസ്ഥാന പോലീസ് മേധാവിയായ ഷെയ്ഖ് ദർവേഷ് സാഹിബ് ജൂൺ 30-ന് വിരമിക്കുന്ന സാഹചര്യത്തിലാണ് പുതിയ പോലീസ് മേധാവിയെ തിരഞ്ഞെടുക്കാനുള്ള നടപടികൾ വേഗത്തിലായത്. 30 വർഷം സേവനം പൂർത്തിയാക്കിയ ഐ.പി.എസ്. ഉദ്യോഗസ്ഥരുടെ പട്ടികയാണ് സംസ്ഥാനം തയ്യാറാക്കിയത്. ഇതിൽ ആദ്യത്തെ മൂന്നുപേരാണ് യു.പി.എസ്.സി. ചുരുക്കപ്പട്ടികയിൽ ഉൾപ്പെട്ടത്.

ഡൽഹിയിൽ നടന്ന യു.പി.എസ്.സി. യോഗത്തിൽ ചീഫ് സെക്രട്ടറി എ. ജയതിലകും നിലവിലെ സംസ്ഥാന പോലീസ് മേധാവി ഡോ. എസ്. ദർവേഷ് സാഹിബുമാണ് പങ്കെടുത്തത്. യു.പി.എസ്.സി. നൽകിയ മൂന്നംഗ പട്ടികയിൽനിന്ന് ഒരാളെ മുഖ്യമന്ത്രി പുതിയ പോലീസ് മേധാവിയായി നിയമിക്കും. സാധാരണയായി മന്ത്രിസഭ ചർച്ച ചെയ്ത ശേഷമാണ് പുതിയ പോലീസ് മേധാവിയെ പ്രഖ്യാപിക്കാറുള്ളത്. എന്നാൽ, ദർവേഷ് സാഹിബ് ജൂൺ 30-ന് വിരമിക്കുന്ന സാഹചര്യത്തിൽ മുഖ്യമന്ത്രി തന്നെ തീരുമാനമെടുത്ത് പ്രഖ്യാപിക്കുകയാകും ചെയ്യുക. ദർവേഷ് സാഹിബ് വിരമിക്കുന്ന ചടങ്ങിൽ തന്നെ പുതിയ പോലീസ് മേധാവിക്ക് അധികാരം കൈമാറുമെന്നും സൂചനകളുണ്ട്.

ഈ വാർത്തയെക്കുറിച്ചുള്ള നിങ്ങളുടെ പ്രതികരണം കമന്റ് ചെയ്യുക.

Article Summary: M.R. Ajith Kumar out of DGP shortlist; Kerala to get new police chief.

#KeralaPolice #DGP #UPSC #PoliceChief #KeralaPolitics #IPS