കൊച്ചി: (KVARTHA) ദീപാവലി ആഘോഷങ്ങൾക്ക് തുടക്കം കുറിക്കുന്ന ധൻതേരാസിൽ സ്വർണം, വെള്ളി വിൽപ്പനയിൽ വൻ കുതിച്ചുചാട്ടം രേഖപ്പെടുത്തി. റെക്കോർഡ് ഉയർന്ന വിലയിലും സ്വർണത്തിനുള്ള ആവശ്യം കഴിഞ്ഞ വർഷത്തേക്കാൾ 20-25 ശതമാനം വർധിച്ചു. വജ്ര ആഭരണങ്ങളും 12-15 ശതമാനം വളർച്ച കാണിച്ചു.

18 കാരറ്റ് ആഭരണങ്ങളാണ് ഏറ്റവും കൂടുതൽ ആവശ്യക്കാർ തേടിയത്. പോൽക്കി, കുന്തൻ തുടങ്ങിയ കല്ല് പതിച്ച ആഭരണങ്ങൾക്കും ഡിമാൻഡ് ഉയർന്നു. വെള്ളിയുടെ വിൽപ്പനയാകട്ടെ, കഴിഞ്ഞ കാലത്തെ എല്ലാ റെക്കോർഡുകളും തകർത്ത് 35 ശതമാനത്തിലധികം വർദ്ധിച്ചു.

ആഭരണങ്ങൾ മാത്രമല്ല, ഡിന്നർ സെറ്റുകൾ, വിളക്കുകൾ, ജലധാര യന്ത്രങ്ങൾ തുടങ്ങിയ വെള്ളിയിൽ നിർമ്മിച്ച വീട്ടുപകരണങ്ങൾ മുതൽ ഫർണിച്ചറുകൾ വരെ വിപണിയിലെത്തിയത് വിൽപ്പനയെ വലിയ തോതിൽ സ്വാധീനിച്ചു. കസ്റ്റംസ് ഡ്യൂട്ടിയിൽ 9% ഇളവ് ലഭിച്ചതും ഇന്ത്യൻ വിപണിയിലെ വിൽപ്പനയെ പ്രോത്സാഹിപ്പിച്ചു.

ധൻതേരാസ് സ്വർണം വാങ്ങാൻ ഏറ്റവും ശുഭമുഹൂർത്തമായി പലരും കണക്കാക്കുന്നു. ഈ വിശ്വാസം കാരണം സ്വർണ വില്പന വർദ്ധിക്കുന്നു. ലക്ഷ്മി ദേവിയെ പ്രീതിപ്പെടുത്തുന്നതിനായി ധൻതേരാസ് ദിനത്തിൽ സ്വർണം വാങ്ങുന്നത് പലരുടെയും പതിവാണ്.

പണം ഇടപാടുകൾ കുറഞ്ഞ് നെഫ്റ്റ്, ആർടിജിഎസ് പോലുള്ള ഡിജിറ്റൽ പണമിടപാടുകൾ വർധിച്ചതായും റിപ്പോർട്ടുകൾ സൂചിപ്പിക്കുന്നു. ദീപാവലി സീസണിൽ ആനുപാതികമായ വ്യാപാരം കേരളത്തിലും ലഭിച്ചതായി ഓൾ കേരള ഗോൾഡ് ആൻഡ് സിൽവർ മർച്ചന്റ്സ് അസോസിയേഷന്റെ സംസ്ഥാന ട്രഷറർ അഡ്വ. എസ്. അബ്ദുൽ നാസർ അറിയിച്ചു.
 

#Dhanteras #gold #silver #jewelry #festivalshopping #Kerala #India