ഇൻസ്റ്റഗ്രാം ലൈവിലൂടെ വ്യക്തിഹത്യ; യുവാവിന്റെ മരണത്തിൽ യുവതിക്കെതിരെ പ്രതിഷേധം ശക്തം, 'റീച്ചി'ന് വേണ്ടിയുള്ള ക്രൂരതയെന്ന് കുടുംബം

കോഴിക്കോട്/പയ്യന്നൂർ: (KVARTHA) ഇൻസ്റ്റഗ്രാമിലൂടെയുള്ള വ്യക്തിഹത്യയിൽ മനംനൊന്ത് യുവാവ് മരിച്ച സംഭവത്തിൽ വ്യാജ പരാതിയുമായി രംഗത്തുവന്ന യുവതിക്കെതിരെ പ്രതിഷേധം ശക്തമാകുന്നു. പയ്യന്നൂർ റെയിൽവേ സ്റ്റേഷനിൽ നിന്നും ബസ് സ്റ്റാൻഡിലേക്ക് പോകുന്ന സ്വകാര്യ ബസിൽ അതിക്രമം കാട്ടിയെന്നാരോപിച്ച് യുവതി ഇൻസ്റ്റഗ്രാമിൽ ലൈവ് വീഡിയോ പ്രചരിപ്പിച്ചിരുന്നു. ഇതിന് പിന്നാലെയാണ് ആരോപണ വിധേയനായ കോഴിക്കോട് ഗോവിന്ദപുരം സ്വദേശി യു. ദീപക്കിനെ (42) വീട്ടിൽ മരിച്ച നിലയിൽ കണ്ടെത്തിയത്.

'റീച്ചി'ന് വേണ്ടിയുള്ള ക്രൂരതയെന്ന് കുടുംബം

സോഷ്യൽ മീഡിയയിൽ കണ്ടന്റ് ക്രിയേറ്റ് ചെയ്യാനും റീച്ച് ലഭിക്കാനും വേണ്ടി യുവതി നടത്തിയ തികച്ചും വസ്തുതാവിരുദ്ധമായ പ്രചാരണമാണ് ദീപക്കിന്റെ മരണത്തിന് കാരണമെന്ന് ബന്ധുക്കളും സുഹൃത്തുക്കളും ആരോപിക്കുന്നു. 

ദീപക്കിനെ പീഡകനായി ചിത്രീകരിച്ചു കൊണ്ടുള്ള ഇൻസ്റ്റഗ്രാം ലൈവ് വീഡിയോ വ്യാപകമായി പ്രചരിക്കുകയും 20 ലക്ഷത്തിലധികം പേർ അത് കാണുകയും ചെയ്തിരുന്നു. ഇതേത്തുടർന്ന് കടുത്ത മാനസിക സംഘർഷത്തിലായിരുന്നു ദീപക്. മരിക്കുന്നതിന് മുൻപ് സുഹൃത്തുക്കളോട് ഇതുമായി ബന്ധപ്പെട്ട വിഷമം അദ്ദേഹം പങ്കുവെച്ചിരുന്നു.

സംഭവം ഇങ്ങനെ

പയ്യന്നൂരിലെ ഒരു വസ്ത്രാലയത്തിലെ ജീവനക്കാരനായ ദീപക് വെള്ളിയാഴ്ച വൈകുന്നേരം ജോലി കഴിഞ്ഞ് മടങ്ങുമ്പോഴാണ് സംഭവമുണ്ടായത്. ബസിൽ യാത്ര ചെയ്യുന്ന ദൃശ്യങ്ങളും മറ്റു യാത്രക്കാരെപ്പോലെ ദീപക് നിൽക്കുന്നതും യുവതിയുടെ വീഡിയോയിലുണ്ട്. ലൈംഗികാതിക്രമം നടത്തിയതായി യുവതി ആരോപിക്കുന്നുണ്ടെങ്കിലും അത്തരം ദൃശ്യങ്ങളൊന്നും വീഡിയോയിൽ ഇല്ലെന്ന് സുഹൃത്തുക്കൾ ചൂണ്ടിക്കാട്ടുന്നു.

ദീപക്കിന്റെ വിയോഗം

ഞായറാഴ്ച രാവിലെയാണ് ഗോവിന്ദപുരം കൊളങ്ങരക്കണ്ടിയിലുള്ള വീട്ടിൽ ദീപക്കിനെ തൂങ്ങി മരിച്ച നിലയിൽ കണ്ടെത്തിയത്. വീട്ടിൽ പ്രായമായ അച്ഛൻ ചോയിയും അമ്മ കന്യകയും മാത്രമാണുണ്ടായിരുന്നത്. രാവിലെ വിളിച്ചപ്പോൾ വാതിൽ തുറക്കാത്തതിനെത്തുടർന്ന് നാട്ടുകാരെത്തി വാതിൽ ബലമായി തുറന്നപ്പോഴാണ് ദീപക്കിനെ മരിച്ച നിലയിൽ കണ്ടത്. കുടുംബത്തിന്റെ ഏക ആശ്രയമായിരുന്നു ദീപക്.

യുവതിയുടെ വിശദീകരണം

സംഭവം വിവാദമായതോടെ തന്റെ ഭാഗം ന്യായീകരിച്ച് യുവതി രംഗത്തെത്തിയിട്ടുണ്ട്. തന്നോടും സഹയാത്രികയോടും ദീപക് അപമര്യാദയായി പെരുമാറിയെന്നും ബസിൽ നിന്നും ഇറങ്ങുമ്പോൾ എന്താണ് ഉദ്ദേശ്യമെന്ന് ചോദിച്ചിരുന്നുവെന്നും അവർ പറയുന്നു. ഇത് കേട്ട് യുവാവ് പെട്ടെന്ന് ഇറങ്ങിപ്പോയി. പിന്നീട് ആളെപ്പറ്റി വിവരങ്ങൾ ലഭിക്കാനാണ് വീഡിയോ പങ്കുവെച്ചതെന്നുമാണ് യുവതിയുടെ വിശദീകരണം.

നിയമനടപടി

യുവതിക്കെതിരെ നിയമനടപടി ആവശ്യപ്പെട്ട് ഹൈക്കോടതി അഭിഭാഷകൻ കുളത്തൂർ ജയ്സിംഗ് മുഖ്യമന്ത്രിക്ക് പരാതി നൽകിയിട്ടുണ്ട്. ദീപക്കിന്റെ ബന്ധുക്കൾ കോഴിക്കോട് മെഡിക്കൽ കോളേജ് പൊലീസിലും പരാതി നൽകും. സോഷ്യൽ മീഡിയ അരുംകൊലയിലൂടെ ഒരു കുടുംബത്തിന്റെ അത്താണിയാണ് നഷ്ടമായതെന്ന് നാട്ടുകാർ പറയുന്നു.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യുക

Article Summary: 42-year-old Deepak from Kozhikode committed death after a woman posted a video on Instagram accusing him of harassment on a bus. His family alleges the accusation was false and done for social media reach.

#CyberBullying #Kozhikode #SocialMediaTrial #JusticeForDeepak #KeralaNews #ViralVideo #DeathPrevention