തിരുവനന്തപുരം: (KVARTHA) ഓൺലൈനിൽ വിവാഹപ്പരസ്യം നൽകിയും സിനിമയെ വെല്ലുന്ന കഥകൾ മെനഞ്ഞും വിവിധ ജില്ലകളിലായി പത്തുപേരെ വിവാഹം കഴിച്ച് മുങ്ങിയ യുവതി അറസ്റ്റിൽ. എറണാകുളം ആമ്പല്ലൂര്‍ ഗ്രാമ പഞ്ചായത്ത് പരിധിയിലെ താമസക്കാരിയും രണ്ടു വയസ്സുള്ള കുട്ടിയുടെ മാതാവുമായ രേഷ്മയാണ് അടുത്ത വിവാഹത്തിന് തൊട്ടുമുൻപ് ആര്യനാട് പോലീസിൻ്റെ പിടിയിലായത്. വെള്ളിയാഴ്ച രാവിലെ വിവാഹത്തിനായി ഒരുങ്ങി ഓഡിറ്റോറിയത്തിലേക്ക് പോകാൻ നിന്ന രേഷ്മയെ, പ്രതിശ്രുത വരനായ പഞ്ചായത്ത് അംഗത്തിൻ്റെ പരാതിയെ തുടർന്നാണ് പോലീസ് നാടകീയമായി അറസ്റ്റ് ചെയ്തത്.

45 ദിവസം മുൻപ് വിവാഹം കഴിച്ചയാളെ കബളിപ്പിച്ചാണ് രേഷ്മ പഞ്ചായത്ത് അംഗവുമായുള്ള വിവാഹത്തിന് എത്തിയതെന്ന് പോലീസ് പറഞ്ഞു. അടുത്ത മാസം തിരുവനന്തപുരം സ്വദേശിയായ മറ്റൊരാളുമായി വിവാഹം നിശ്ചയിച്ചിരിക്കുകയായിരുന്നു എന്നും പോലീസ് കൂട്ടിച്ചേർത്തു. രേഷ്മയുടെ പെരുമാറ്റത്തിൽ സംശയം തോന്നിയതിനെ തുടർന്ന് പ്രതിശ്രുത വരനും ബന്ധുവും ചേർന്ന് ഇവരുടെ ബാഗ് പരിശോധിച്ചപ്പോഴാണ് തട്ടിപ്പ് പുറത്തായത്.

വിവാഹത്തിന് മുന്നോടിയായി രേഷ്മ ബ്യൂട്ടിപാർലറിൽ കയറിയ സമയത്താണ് പരിശോധന നടത്തിയത്. മുൻപ് വിവാഹം കഴിച്ചതിൻ്റെ രേഖകൾ ഉൾപ്പെടെ ബാഗിൽ നിന്ന് കണ്ടെത്തി. വിവാഹപ്പരസ്യം നൽകുന്ന ഗ്രൂപ്പിൽ പഞ്ചായത്ത് അംഗം രജിസ്റ്റർ ചെയ്ത ഫോൺ നമ്പറിലേക്ക് മേയ് 29-നാണ് രേഷ്മയുടെ അമ്മയാണെന്ന് പരിചയപ്പെടുത്തി ഒരു സ്ത്രീ ആദ്യം വിളിച്ചത്. പിന്നീട് ഇവർ രേഷ്മയുടെ ഫോൺ നമ്പർ യുവാവിന് കൈമാറുകയും ഇരുവരും പരസ്പരം സംസാരിക്കുകയും ചെയ്തു.

ഇക്കഴിഞ്ഞ നാലിന് കോട്ടയത്തുള്ള ഒരു മാളിൽ വെച്ച് ഇരുവരും പരസ്പരം കണ്ടു. 'തന്നെ ദത്തെടുത്തതാണെന്നും വിവാഹം നടത്തുന്നതിൽ അമ്മയ്ക്ക് താൽപര്യമില്ലെന്നും ഉപദ്രവിക്കാറുണ്ടെന്നും' രേഷ്മ യുവാവിനെ പറഞ്ഞു വിശ്വസിപ്പിച്ചു. ഇതോടെ വിവാഹം ഇന്നലെ നടത്താമെന്ന് യുവാവ് ഉറപ്പു നൽകി. അഞ്ചിന് വൈകിട്ട് തിരുവനന്തപുരത്ത് വെമ്പായത്ത് എത്തിയ രേഷ്മയെ യുവാവ് കൂട്ടിക്കൊണ്ടുപോയി സുഹൃത്തിൻ്റെ വീട്ടിൽ താമസിപ്പിച്ചു. ഇതിനിടെയാണ് രേഷ്മയുടെ പെരുമാറ്റത്തിൽ അസ്വാഭാവികത തോന്നുകയും ബാഗ് പരിശോധിച്ചപ്പോൾ തട്ടിപ്പ് കണ്ടെത്തുകയും പോലീസിൽ പരാതി നൽകുകയും ചെയ്തത്.

ഇത്തരം തട്ടിപ്പുകൾ തടയാൻ നിയമപരമായി എന്ത് മാറ്റങ്ങൾ വരുത്തണം? ഈ വാർത്ത നിങ്ങളുടെ സുഹൃത്തുക്കളുമായി പങ്കുവെച്ച്  അഭിപ്രായങ്ങൾ രേഖപ്പെടുത്തൂ.

Article Summary: Woman who married 10 men and defrauded them caught on wedding eve.

#MarriageFraud #KeralaPolice #OnlineScam #Thiruvananthapuram #CrimeNews #ReshmaCaught