ഇടുക്കി: (KVARTHA) വാഴത്തോപ്പ് ഗിരിജ്യോതി സ്ക്കൂളിൽ പ്ലേ സ്ക്കൂൾ വിദ്യാർത്ഥി സ്കൂൾ ബസ് കയറി മരിച്ച സംഭവത്തിൽ ബസ് ഡ്രൈവർ വാഴത്തോപ്പ് ഗ്രാമ പഞ്ചായത്ത് പരിധിയിലെ എം എസ് ശശിയെ പോലീസ് അറസ്റ്റ് ചെയ്തു. മനപൂർവ്വമല്ലാത്ത നരഹത്യ, അപകടകരമായും അശ്രദ്ധമായും വാഹനമോടിച്ച് അപകടമുണ്ടാക്കൽ എന്നീ വകുപ്പുകളാണ്‌ ഡ്രൈവർക്കെതിരെ ചുമത്തിയിരിക്കുന്നത്. വ്യാഴാഴ്ച (20.11.2025) സ്റ്റേഷനിൽ ഹാജരാകാൻ നോട്ടീസ് നൽകിയ ശേഷം ശശിയെ ജാമ്യത്തിൽ വിട്ടയച്ചു.

തടിയമ്പാട് പറപ്പള്ളില്‍ ബെൻ ജോൺസന്‍റെ മകൾ നാലു വയസുകാരി ഹെയ്സൽ ബെൻ ആണ്‌ ദുരന്തത്തിൽ മരിച്ചത്. അതേസമയം, അപകടത്തിൽ പരിക്കേറ്റ മറ്റൊരു കുട്ടി, മൂന്നു വയസ്സുകാരിയായ ഇനായ തെഹസിൽ ഇടുക്കി മെഡിക്കൽ കോളജ് ആശുപത്രിയിൽ ചികിത്സയിലാണ്‌. സംഭവത്തെത്തുടർന്ന് നാട്ടിലാകെ ദുഃഖം നിറഞ്ഞിരിക്കുകയാണ്‌.

സംസ്കാര ചടങ്ങുകൾ 11 മണിക്ക്

മരിച്ച ഹെയ്സലിന്‍റെ സംസ്കാര ചടങ്ങുകൾ രാവിലെ 11 മണിക്ക് വാഴത്തോപ്പ് സെൻ്റ് ജോർജ്ജ് കത്തിഡ്രൽ പള്ളിയിൽ നടക്കും. പ്ലേ സ്കൂൾ വിദ്യാർത്ഥിനിയായ ഹെയ്സലിന്‍റെ മരണം നാടിന് വിശ്വസിക്കാനായിട്ടില്ല. സ്കൂൾ ബസ് ഡ്രൈവറുടെ അശ്രദ്ധയാണ്‌ ഈ അപകടത്തിന് കാരണമെന്നാണ്‌ പ്രാഥമിക നിഗമനം. കുട്ടികളുടെ വാഹന സുരക്ഷയുമായി ബന്ധപ്പെട്ട് കൂടുതൽ ശ്രദ്ധ വേണമെന്ന വിമർശനവും സംഭവത്തെത്തുടർന്ന് ഉയരുന്നുണ്ട്.

കുട്ടികളുടെ സുരക്ഷ ഉറപ്പാക്കാൻ എന്തെല്ലാം നടപടികൾ എടുക്കണം? സ്കൂൾ ബസ് അപകടങ്ങൾ ഒഴിവാക്കാൻ നിങ്ങളുടെ അഭിപ്രായം കമൻ്റ് ചെയ്യുക.

Article Summary: Driver of Vazhathoppu school bus arrested for the death of 4-year-old Hazel.

#VazhathoppuAccident #IdukkiNews #SchoolBusSafety #HazelBen #DriverArrest #KeralaTragedy