കണ്ണൂർ: (kVARTHA) തളിപ്പറമ്പ് കുറുമാത്തൂരിൽ രണ്ട് മാസം പ്രായമുള്ള മകനെ കിണറ്റിൽ എറിഞ്ഞു കൊന്ന സംഭവത്തിൽ മാതാവ് അറസ്റ്റിൽ. കൊലക്കുറ്റം ചുമത്തിയാണ് കുറുമാത്തൂർ ഗ്രാമ പഞ്ചായത്ത് പരിധിയിലെ എം പി മുബഷീറയെ തളിപ്പറമ്പ് പോലീസ് അറസ്റ്റ് ചെയ്തത്. അമീഷ് അലന്‍ ജാബിര്‍ എന്ന കുട്ടിയാണ് മരിച്ചത്. തിങ്കളാഴ്ച (നവംബർ 3) രാവിലെ 9:30-ഓടെയാണ് കുഞ്ഞിനെ കിണറ്റില്‍ വീണ നിലയില്‍ കണ്ടെത്തിയത്.

കുടകിലെ വ്യാപാരിയായ ടി ജാബിറിൻ്റെ മകനാണ് മരിച്ച കുട്ടി. കുട്ടിയെ എണ്ണതേപ്പിച്ച് കുളിപ്പിക്കുമ്പോൾ അബദ്ധത്തിൽ കിണറ്റിൽ വീണുവെന്നാണ് മാതാവ് സംഭവശേഷം ആദ്യം പറഞ്ഞിരുന്നത്. ഉമ്മുമ്മ എണ്ണതേപ്പിച്ച് ഉമ്മ മുബഷീറയ്ക്ക് കുട്ടിയെ കൊടുത്തപ്പോൾ കിണറിൽ അബദ്ധത്തിൽ വീണതായാണ് യുവതിയുടെ മൊഴി.

.

പോലീസിൻ്റെ സമർത്ഥമായ നീക്കം

വീട്ടുകാരുടെ നിലവിളികേട്ട് ഓടിയെത്തിയ നാട്ടുകാരൻ കുറുമാത്തൂർ കടവിനടുത്ത പി പി നാസർ, 24 കോൽ താഴ്ചയുള്ള കിണറ്റിലിറങ്ങി കുഞ്ഞിനെ പുറത്തെടുത്ത് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. യുവതി നൽകിയ മൊഴി പോലീസ് ആദ്യമേ മുഖവിലക്കെടുത്തിരുന്നില്ല. 

ഡിവൈഎസ്പി കെ ഇ പ്രേമചന്ദ്രൻ്റെ നിർദ്ദേശപ്രകാരം ഇൻസ്പെക്ടർ പി ബാബുമോൻ, എസ് ഐ ദിനേശൻ കൊതേരി എന്നിവർ നടത്തിയ സമർത്ഥമായ അന്വേഷണത്തിലാണ് ഇത് കയ്യബദ്ധമല്ല, കുട്ടിയെ കിണറിൽ എറിഞ്ഞു കൊന്നതാണെന്ന് തെളിഞ്ഞത്.

ശാസ്ത്രീയ തെളിവുകൾ

ഇരുമ്പ് ഗ്രില്ലും ആൾമറയുമുള്ള കിണറ്റിൽ കുഞ്ഞ് വീഴാനുള്ള ഒരു സാധ്യതയുമില്ലെന്ന് സ്ഥലപരിശോധനയിൽ പോലീസിന് വ്യക്തമായിരുന്നു. തുടർന്ന്, കുട്ടിയുടെ മൃതദേഹം പോസ്റ്റ്‌മോർട്ടം ചെയ്ത കണ്ണൂർ ഗവ. മെഡിക്കൽ കോളേജ് ഫോറൻസിക് വിഭാഗത്തിലെ ഡോക്ടറെ സ്ഥലത്തെത്തിച്ച് ശാസ്ത്രീയമായ തെളിവുകൾ ശേഖരിച്ചു.

വനിതാ പോലീസിൻ്റെ നേതൃത്വത്തിൽ മുബഷീറയെ ചോദ്യം ചെയ്തപ്പോഴാണ് കുഞ്ഞിനെ കിണറിൽ എറിയുകയായിരുന്നുവെന്ന് യുവതി വ്യക്തമാക്കിയത്. അബദ്ധത്തിൽ വീണുമരിച്ചതായ ഉമ്മയുടെ വാദം പോലീസ് നേരത്തെ തള്ളിക്കളഞ്ഞിരുന്നുവെങ്കിലും, ശാസ്ത്രീയമായ മുഴുവൻ തെളിവുകളും ശേഖരിച്ച ശേഷം മാത്രം അറസ്റ്റിലേക്ക് നീങ്ങിയാൽ മതിയെന്ന ഉന്നത നിർദ്ദേശത്തെ തുടർന്നാണ് അറസ്റ്റ് വൈകിയത്.

പ്രസവാനന്തര വിഷാദം?

ബുധനാഴ്ച (05.11.2025) രാവിലെ കുറുമാത്തൂരിലെ വീട്ടിലെത്തിയാണ് ഇൻസ്പെക്ടർ പി ബാബുമോൻ്റെ നേതൃത്വത്തിൽ മാതാവ് മുബഷീറയെ അറസ്റ്റ് ചെയ്തത്. പ്രസവിച്ച സ്ത്രീകളിൽ ഉണ്ടാകാറുള്ള ഡിപ്രഷൻ അഥവാ പ്രസവാനന്തര വിഷാദം (Postpartum Depression) എന്ന മാനസിക സമ്മർദ്ദം കാരണമായിരിക്കാം ഈ കടുംകൈ ചെയ്യാൻ അമ്മയെ പ്രേരിപ്പിച്ചതെന്നാണ് പോലീസ് പറയുന്നത്.

അറസ്റ്റിലായ മുബഷീറയെ തളിപ്പറമ്പ് താലൂക്ക് ആശുപത്രിയിൽ പരിശോധനക്ക് വിധേയമാക്കിയ ശേഷം ഉച്ചയ്ക്ക് ശേഷം കോടതിയിൽ ഹാജരാക്കും.

തളിപ്പറമ്പിൽ നടന്ന ഈ ദാരുണ സംഭവത്തെക്കുറിച്ചും പ്രസവാനന്തര വിഷാദത്തെക്കുറിച്ചുമുള്ള നിങ്ങളുടെ അഭിപ്രായം പങ്കുവെക്കുക.

Article Summary: Mother arrested in Taliparamba for murder of two-month-old son by throwing him into a well.

#Taliparamba #ChildMurder #MotherArrested #KannurCrime #PostpartumDepression #KeralaPolice