മുംബൈ: (KVARTHA) വീട്ടില്‍ അതിക്രമിച്ചു കയറിയ മോഷ്ടാവില്‍ നിന്ന് ബോളിവുഡ് താരം സൈഫ് അലി ഖാന്  കുത്തേറ്റ സംഭവത്തില്‍ പൊലീസ് അന്വേഷണം ഊര്‍ജിതം. നടനെ ആക്രമിച്ച പ്രതിയുടെ കൂടുതല്‍ ദൃശ്യങ്ങള്‍ പൊലീസിന് ലഭിച്ചു. താരത്തിന്റെ ബാന്ദ്രയിലെ വസതിയില്‍ വെച്ചായിരുന്നു അക്രമം നടന്നത്. സംഭവത്തിന് ശേഷം ഓടി രക്ഷപ്പെട്ട പ്രതിയെ പിടികൂടാനുള്ള ശ്രമങ്ങള്‍ പൊലീസ് ശക്തമാക്കിയിട്ടുണ്ട്. 

അക്രമത്തിന് ശേഷം പ്രതി ദാദറിലെ ഒരു കടയില്‍ നിന്ന് ഹെഡ്ഫോണ്‍ വാങ്ങുന്ന സിസിടിവി ദൃശ്യങ്ങളാണ് ഇപ്പോള്‍ പുറത്തുവന്നിരിക്കുന്നത്. അക്രമം കഴിഞ്ഞ് ഏകദേശം ആറ് മണിക്കൂറിനുള്ളില്‍ രാവിലെ ഒമ്പത് മണിയോടെയാണ് ഇയാള്‍ കടയില്‍ എത്തിയത്. നീല ഷര്‍ട്ട് ധരിച്ചാണ് പ്രതി ദൃശ്യങ്ങളില്‍ പ്രത്യക്ഷപ്പെടുന്നത്. 

ഇതിനുമുമ്പും ഇതേ വേഷത്തില്‍ പ്രതിയുടെ ചിത്രങ്ങള്‍ പുറത്തുവന്നിരുന്നു. ബാന്ദ്ര റെയില്‍വേ സ്റ്റേഷനിലും ദാദറിലെ ഒരു മൊബൈല്‍ കടയിലും ഇതേ വേഷത്തില്‍ പ്രതിയെ കണ്ടതായി റിപ്പോര്‍ട്ടുകളുണ്ട്. ക്രൈം ബ്രാഞ്ച് ഉദ്യോഗസ്ഥര്‍ ദാദറിലെ കബൂത്തര്‍ഖാന പ്രദേശത്തെത്തി മൊബൈല്‍ കടയില്‍ നിന്ന് സിസിടിവി ദൃശ്യങ്ങള്‍ ശേഖരിച്ചു. 

അതിനിടെ മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസ് ഈ കേസില്‍ പൊലീസിന്റെ സമഗ്ര അന്വേഷണം നടക്കുന്നുണ്ടെന്നും പ്രതിയെ ഉടന്‍ പിടികൂടുമെന്നും അറിയിച്ചു. പ്രതിപക്ഷത്തിന്റെ വിമര്‍ശനങ്ങള്‍ക്ക് മറുപടിയായി മുംബൈ രാജ്യത്തെ ഏറ്റവും സുരക്ഷിതമായ നഗരങ്ങളില്‍ ഒന്നാണെന്നും ഒറ്റപ്പെട്ട സംഭവങ്ങളെ മുന്‍നിര്‍ത്തി നഗരത്തിന്റെ പ്രതിച്ഛായ തകര്‍ക്കരുതെന്നും അദ്ദേഹം കൂട്ടിച്ചേര്‍ത്തു. ചില സംഭവങ്ങള്‍ ഉണ്ടാകാറുണ്ടെന്നും അവ ഗൗരവത്തോടെയാണ് കാണുന്നതെന്നും എന്നാല്‍ ഒരു സംഭവം മാത്രം വെച്ച് മുംബൈ സുരക്ഷിതമല്ലാത്ത നഗരമാണെന്ന് പറയുന്നത് ശരിയല്ലെന്നും അദ്ദേഹം വ്യക്തമാക്കി.

അന്വേഷണത്തില്‍ ബാന്ദ്ര പൊലീസിന്റെ ഭാഗത്ത് നിന്ന് ചില വീഴ്ചകള്‍ സംഭവിച്ചതായി മുംബൈ ക്രൈം ബ്രാഞ്ച് വിമര്‍ശിച്ചു. അക്രമിയുടെ രക്ഷാമാര്‍ഗങ്ങള്‍ തടയുന്നതില്‍ ക്രൈം ബ്രാഞ്ച്, ഗവണ്‍മെന്റ് റെയില്‍വേ പോലീസ് (ജിആര്‍പി) തുടങ്ങിയ മറ്റ് യൂണിറ്റുകളെ ഉടന്‍ ഉള്‍പ്പെടുത്തുന്നതില്‍ ബാന്ദ്ര പൊലീസ് വേണ്ടത്ര ശ്രദ്ധ ചെലുത്തിയില്ലെന്ന് ക്രൈം ബ്രാഞ്ച് കുറ്റപ്പെടുത്തി. 

കവര്‍ച്ചാ ശ്രമത്തിനിടെ വീട്ടില്‍ അതിക്രമിച്ചു കയറിയ പ്രതിയെ ചെറുക്കുന്നതിനിടെ സെയ്ഫ് അലി ഖാന് ആറ് പരിക്കുകള്‍ പറ്റിയെന്നാണ് റിപ്പോര്‍ട്ട്. അദ്ദേഹം നിലവില്‍ ലീലാവതി ആശുപത്രിയില്‍ ചികിത്സയിലാണ്. നടന്റെ ആരോഗ്യനിലയില്‍ പുരോഗതി ഉണ്ടെന്നും അധികം വൈകാതെ അദ്ദേഹം പൂര്‍ണ ആരോഗ്യവാനായി തിരിച്ചെത്തുമെന്നും ആശുപത്രി വൃത്തങ്ങള്‍ അറിയിച്ചു.

#SaifAliKhan, #Bollywood, #Mumbai, #Crime, #Attack, #CCTV, #PoliceInvestigation

Mumbai, Maharashtra: Officers from the Crime Branch visited the Kabutarkhana area in Dadar and collected CCTV footage from a mobile shop named "Iqra" from where he purchased headphones after attacking actor Saif Ali Khan pic.twitter.com/ILxBjsD7eZ

— IANS (@ians_india) January 18, 2025