ബെംഗ്ളൂറു: (KVARTHA) ഹാസനിലെ ഫാം ഹൗസിൽ വെച്ച് 48 വയസ്സുള്ള വീട്ടുജോലിക്കാരിയെ പീഡിപ്പിച്ച കേസിൽ ജനതാദൾ (എസ്) മുൻ എംപി പ്രജ്വൽ രേവണ്ണയ്ക്ക് ജീവപര്യന്തം തടവ് ശിക്ഷയും അഞ്ച് ലക്ഷം രൂപ പിഴയും വിധിച്ച് ബെംഗ്ളൂറിലെ ജനപ്രതിനിധികൾക്കുള്ള പ്രത്യേക കോടതി. പ്രജ്വലിന്റേത് അതീവ ഗുരുതരമായ കുറ്റമാണെന്ന് കോടതി നിരീക്ഷിച്ചു. തനിക്ക് ശിക്ഷയിൽ ഇളവ് നൽകണമെന്ന് പ്രജ്വൽ രേവണ്ണ ആവശ്യപ്പെട്ടെങ്കിലും കോടതി അത് തള്ളിക്കളഞ്ഞു.

കോടതിയിലെ പ്രജ്വലിന്റെ വാദങ്ങൾ

രാഷ്ട്രീയത്തിൽ പെട്ടെന്ന് വളർന്നത് മാത്രമാണ് താൻ ചെയ്ത തെറ്റെന്ന് പ്രജ്വൽ രേവണ്ണ കോടതിയിൽ പറഞ്ഞു. ആരെയും ഉപദ്രവിച്ചിട്ടില്ലെന്നും തനിക്കെതിരെ സ്വമേധയാ സ്ത്രീകളാരും പരാതി നൽകിയില്ലെന്നും പ്രോസിക്യൂഷൻ മനഃപൂർവം അവരെ രംഗത്ത് കൊണ്ടുവന്നതാണെന്നും വാദിച്ച പ്രജ്വൽ രേവണ്ണ കോടതിയിൽ പൊട്ടിക്കരഞ്ഞു. ആറ് മാസമായി താൻ അച്ഛനും അമ്മയും ഉൾപ്പെടെയുള്ള കുടുംബത്തെ കണ്ടിട്ടില്ലെന്നും അദ്ദേഹം കോടതിയെ അറിയിച്ചു.

കേസിന്റെ നാൾവഴികൾ

കേസ് രജിസ്റ്റർ ചെയ്ത് 14 മാസത്തിനുള്ളിലാണ് പ്രതി കുറ്റക്കാരനെന്ന വിധി പുറത്തുവന്നത്. പ്രജ്വൽ രേവണ്ണയുടെ പേരിലുള്ള നാല് പീഡനക്കേസുകളിൽ ആദ്യത്തെ കേസിലാണ് ഇപ്പോൾ വിധി പറഞ്ഞിരിക്കുന്നത്. 2024 ഏപ്രിലിൽ ലോക്‌സഭാ തിരഞ്ഞെടുപ്പിന് തൊട്ടുമുമ്പ് ഹാസനിൽ അശ്ലീല വിഡിയോകളടങ്ങിയ പെൻഡ്രൈവുകൾ പ്രചരിച്ചതോടെയാണ് പീഡന വിവരം പുറത്തറിഞ്ഞത്. രണ്ട് തവണ പ്രജ്വലിന്റെ ഫാം ഹൗസിലും ഒരു തവണ ബസവനഗുഡിയിലെ വീട്ടിലും വെച്ച് ജോലിക്കാരിയെ പീഡിപ്പിച്ചെന്നും മൊബൈലിൽ രംഗങ്ങൾ ചിത്രീകരിച്ചെന്നും കുറ്റപത്രത്തിൽ പറഞ്ഞിരുന്നു. ജോലിക്കാരിയെ പിന്നീട് മൈസൂറു കെ.ആർ. നഗറിലെ വീട്ടിൽ നിന്ന് തട്ടിക്കൊണ്ടുപോയെന്ന കേസിൽ പ്രജ്വലിന്റെ പിതാവും എംഎൽഎയുമായ എച്ച്.ഡി. രേവണ്ണയും മാതാവ് ഭവാനി രേവണ്ണയും പ്രതികളാണ്.

ഈ വിധി നീതിന്യായ വ്യവസ്ഥയിൽ നിങ്ങളുടെ വിശ്വാസം വർദ്ധിപ്പിക്കുന്നുണ്ടോ? അഭിപ്രായം പങ്കുവെക്കൂ.

Article Summary: Former MP Prajwal Revanna sentenced to life imprisonment and ₹5 lakh fine in a sexual harassment case involving a housemaid. This is the first of four such cases against him.

#PrajwalRevanna #SexualHarassment #LifeImprisonment #JD(S) #KarnatakaCrime #CourtVerdict