മൊബൈൽ ഫോൺ ചാർജ് ചെയ്യുന്നതിനിടെ പവർ ബാങ്ക് പൊട്ടിത്തെറിച്ചു, വീട് പൂർണ്ണമായും കത്തിനശിച്ചു; വൻ ദുരന്തം ഒഴിവായി

മലപ്പുറം: (KVARTHA) മൊബൈൽ ഫോൺ ചാർജ് ചെയ്യുന്നതിനിടെ പവർ ബാങ്ക് പൊട്ടിത്തെറിച്ചുണ്ടായ അപകടത്തിൽ വീട് കത്തിനശിച്ചു. മലപ്പുറം തിരൂർ തെക്കൻ കുറ്റൂരിലെ മുക്കിലപീടിക അത്തംപറമ്പിൽ അബൂബക്കർ സിദ്ദിഖിന്റെ ഓല മേഞ്ഞ വീടാണ് കത്തിയമർന്നത്. അപകടസമയത്ത് വീട്ടിൽ ആരും ഇല്ലാതിരുന്നതിനാൽ വലിയൊരു ദുരന്തം ഒഴിവായി.

വ്യാഴാഴ്ച രാത്രിയായിരുന്നു സംഭവം. മൊബൈൽ ഫോൺ ചാർജ് ചെയ്യുന്നതിനായി വെച്ച പവർ ബാങ്കിൽ നിന്ന് വലിയ ശബ്ദത്തോടെ തീ പടരുകയായിരുന്നു. ആദ്യം വീടിന്റെ ഒരു ഭാഗത്തേക്ക് തീ പടർന്നു. 

തീ ഉയരുന്നത് കണ്ട നാട്ടുകാരും അയൽവാസികളും ഉടൻ തന്നെ തീയണയ്ക്കാൻ ശ്രമിച്ചു. സമീപത്തെ കിണറുകളിൽ നിന്ന് വെള്ളം പമ്പ് ചെയ്താണ് അവർ തീ നിയന്ത്രണവിധേയമാക്കിയത്.

നാട്ടുകാർ വിവരമറിയിച്ചതിനെ തുടർന്ന് തിരൂരിൽ നിന്ന് അഗ്നിരക്ഷാസേനയും സ്ഥലത്തെത്തി. മണിക്കൂറുകൾ നീണ്ട പരിശ്രമത്തിനൊടുവിലാണ് തീ പൂർണമായും അണയ്ക്കാനായത്. ഓട്ടോറിക്ഷ ഡ്രൈവറാണ് സിദ്ധിഖ്.

വീട്ടുപകരണങ്ങൾ, കുട്ടികളുടെ പഠന രേഖകൾ, സ്കൂൾ പുസ്തകങ്ങൾ, മറ്റ് പ്രധാന രേഖകൾ, വസ്ത്രങ്ങൾ എന്നിവയെല്ലാം പൂർണ്ണമായും കത്തിനശിച്ചു. ഒരു കുടുംബത്തിന്റെ മുഴുവൻ സ്വപ്നങ്ങളും നിമിഷനേരം കൊണ്ടാണ് ചാരമായത്. ഷോർട്ട് സർക്യൂട്ടാണ് അപകടകാരണമെന്നാണ് പ്രാഥമിക നിഗമനം. ഇത്തരം ഉപകരണങ്ങൾ ചാർജ് ചെയ്യുമ്പോൾ അതീവ ശ്രദ്ധ പുലർത്തണമെന്ന് അധികൃതർ മുന്നറിയിപ്പ് നൽകി.

മൊബൈൽ ഫോൺ ഉപയോഗിക്കുമ്പോൾ ശ്രദ്ധിക്കേണ്ട കാര്യങ്ങളെക്കുറിച്ച് ഈ വാർത്ത ഓർമ്മിപ്പിക്കുന്നു. നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: A power bank exploded, causing a house fire in Malappuram.

#Malappuram #PowerBankBlast #HouseFire #KeralaNews #Tirur #Safety