തൃശ്ശൂര്‍: (KVARTHA) വിദ്യാര്‍ഥിനിക്ക് നേരെ ലൈംഗികാതിക്രമം നടത്തിയെന്ന പരാതിയില്‍ പൊലീസുകാരനെ കയ്യോടെ പിടികൂടി പ്രദേശവാസികള്‍ പൊലീസില്‍ ഏല്‍പ്പിച്ചു. മലക്കപ്പാറ പൊലീസ് സ്റ്റേഷനിലെ സിപിഒ ഷാജുവിനെതിരെയാണ് പരാതി. മുന്‍ സ്റ്റുഡന്റ് പൊലീസ് കേഡറ്റായിരുന്ന വിദ്യാര്‍ഥിനിയാണ് പരാതിയുമായി രംഗത്തെത്തിയത്. ഷാജുവിനെതിരെ പോക്സോ ഉള്‍പ്പെടെയുള്ള വകുപ്പുകള്‍ ചുമത്തിയേക്കും.

ചാലക്കുടി കെഎസ്ആര്‍ടിസി ബസ് സ്റ്റാന്റില്‍ വച്ച് ചൊവ്വാഴ്ച ഉച്ചയ്ക്ക് 2.30ന് ഷാജു മോശമായി പെരുമാറിയെന്നാണ് വിദ്യാര്‍ഥിനിയുടെ പരാതി. ഈ സമയത്ത് പരാതിക്കാരിയായ വിദ്യാര്‍ഥിനി കോയമ്പത്തൂരിലേക്ക് പോകാനായി ബസ് സ്റ്റാന്റിലെത്തിയതായിരുന്നു. 

പൊലീസുകാരന്‍ അപമര്യാദയായി പെരുമാറിയതോടെ പെണ്‍കുട്ടി ബഹളം വയ്ക്കുകയും കുട്ടി കരയുന്നത് കേട്ട് ആളുകള്‍ ശ്രദ്ധിക്കാന്‍ തുടങ്ങിയപ്പോള്‍ ഇയാള്‍ സ്ഥലത്തുനിന്ന് രക്ഷപ്പെടാന്‍ ശ്രമിക്കുകയുമായിരുന്നു. ഓട്ടോറിക്ഷയില്‍ കയറിയ ഇയാളെ പിന്നാലെയെത്തിയ സമീപവാസികള്‍ പിടിച്ചുനിര്‍ത്തി. പിന്നീട് ഇവര്‍ തന്നെയാണ് ചാലക്കുടി പൊലീസിനെ വിളിച്ചുവരുത്തി കൈമാറിയത്.

#Kerala, #assault, #police, #arrest, #studentsafety, #womenagainstcrime, #POCSOAct