പാലക്കാട്: (KVARTHA) നെന്മാറ പോത്തുണ്ടിയിലെ സജിത കൊലക്കേസില്‍ പ്രതിയായ ചെന്താമരക്ക് പാലക്കാട് നാലാം അഡീഷ്ണൽ സെഷൻസ് കോടതി ഇരട്ട ജീവപര്യന്തം തടവ് ശിക്ഷ വിധിച്ചു. കൊലപാതകത്തിനും (വകുപ്പ് 302) അതിക്രമിച്ചു കടക്കലിനും (വകുപ്പ് 449) ചേർത്താണ് പ്രതിക്ക് ഇരട്ട ജീവപര്യന്തം തടവ് ശിക്ഷ നൽകിയത്. ഇരട്ട ജീവപര്യന്തത്തിനൊപ്പം 3.25 ലക്ഷം രൂപ പിഴയും കോടതി വിധിച്ചിട്ടുണ്ട്.

കൂടാതെ, തെളിവ് നശിപ്പിക്കലിന് (വകുപ്പ് 201) അഞ്ചു വർഷം തടവ് ശിക്ഷയും കാൽലക്ഷം രൂപ പിഴയും വിധിച്ചു. ഈ ശിക്ഷകൾ ഒരുമിച്ച് അനുഭവിച്ചാൽ മതിയാകും എന്നും കോടതി വ്യക്തമാക്കി. കഴിഞ്ഞ ദിവസമാണ് പ്രതി കുറ്റക്കാരനാണെന്ന് കോടതി കണ്ടെത്തിയത്. തുടര്‍ന്ന് ശനിയാഴ്ച (18.10.2025) നടന്ന വാദങ്ങള്‍ക്ക് ശേഷമാണ് കോടതി ശിക്ഷാവിധി പ്രഖ്യാപിച്ചത്. സജിത വധക്കേസ് അപൂർവങ്ങളിൽ അപൂർവമായ കേസ് അല്ല എന്ന് വ്യക്തമാക്കിയാണ് ചെന്താമരക്ക് ജീവപര്യന്തം തടവ് ശിക്ഷ വിധിച്ചത്.

സാക്ഷികള്‍ക്ക് സുരക്ഷ ഉറപ്പാക്കണം

ശിക്ഷ വിധിക്കുന്നതിന് മുമ്പായി ജാമ്യത്തിലിറങ്ങിയശേഷം പ്രതി നടത്തിയ ഇരട്ടക്കൊലപാതകത്തെക്കുറിച്ചും കോടതി പരാമർശിച്ചു. പ്രതി കുറ്റകൃത്യം ആവർത്തിക്കാൻ സാധ്യതയുള്ളതിനാൽ പരോൾ നൽകുകയാണെങ്കിൽ സാക്ഷികൾക്കും ഇരകൾക്കും പൂർണ സുരക്ഷ ഉറപ്പുവരുത്തണമെന്നും കോടതി വിധിച്ചു. പ്രതിയുടെ മാനസികനില ഭദ്രമാണെന്നും സ്വഭാവം മാറുമെന്നോ നല്ലവനാകുമെന്നോ പ്രതീക്ഷയില്ലെന്നും കോടതി വിധിന്യായത്തിൽ പറഞ്ഞു.

പ്രോസിക്യൂഷൻ്റെ പ്രധാന വാദം പ്രതിക്ക് വധശിക്ഷ നൽകണമെന്നായിരുന്നു. കേസിന് പിന്നാലെ നടന്ന ഇരട്ടക്കൊലയും കോടതിയെ അറിയിച്ചുകൊണ്ടാണ് പ്രോസിക്യൂഷൻ ഈ വാദം ഉന്നയിച്ചത്. എന്നാൽ, ശിക്ഷയിൽ ഇളവ് വേണമെന്ന് വാദിച്ച പ്രതിഭാഗം, ഇരട്ടക്കൊലപാതകം ഈ കേസുമായി കൂട്ടിക്കെട്ടരുതെന്നും പ്രതിക്ക് മുമ്പ് ക്രിമിനൽ പശ്ചാത്തലം ഉണ്ടായിരുന്നുവെന്നും അപൂർവങ്ങളിൽ അപൂർവമായ കേസല്ല ഇതെന്നും കോടതിയെ അറിയിക്കുകയായിരുന്നു.

മക്കൾക്ക് നഷ്ടപരിഹാരം

ചെന്താമര പിഴ തുക നൽകുമെന്ന് പ്രതീക്ഷയില്ലെന്നും അതിനാൽ ലീഗൽ സർവീസ് അതോറിറ്റി സജിതയുടെ മക്കളുടെ പുനരധിവാസം ഉറപ്പാക്കണമെന്നും പണം നൽകണമെന്നും കോടതി വിധിച്ചു. നെന്മാറ പോത്തുണ്ടി ബോയൻസ് നഗർ സ്വദേശിനി സജിത 2019 ഓഗസ്റ്റ് 31നാണ് കൊല്ലപ്പെട്ടത്.

ഈ കേസിൽ ജാമ്യത്തിൽ ഇറങ്ങിയ ശേഷമായിരുന്നു ചെന്താമര സജിതയുടെ ഭർത്താവിനെയും ഭർതൃമാതാവിനെയും കൊലപ്പെടുത്തിയത്. ഭാര്യയും മകളും തന്നെ വിട്ടുപോകാന്‍ കാരണം സജിതയാണെന്ന സംശയമാണ് കൊലപാതകത്തിലേക്ക് നയിച്ചതെന്നായിരുന്നു വിചാരണ ഘട്ടത്തിൽ പ്രതി മൊഴി നൽകിയത്. സജിതയുടെ വീടിനകത്ത് ചോര പതിഞ്ഞ ചെന്താമരയുടെ കാൽപാടുകളാണ് കേസിൽ നിർണായകമായത്. ഒപ്പം മൽപിടുത്തത്തിനിടയിൽ പോക്കറ്റ് കീറി നിലത്ത് വീണ വസ്ത്രം ചെന്താമരയുടെ തന്നെയെന്ന ഇയാളുടെ ഭാര്യയുടെ മൊഴിയും പ്രതിക്ക് കുരുക്കായി. കേസിലെ സാക്ഷികളുടെ മൊഴിയും പ്രതിക്കെതിരെ നിർണായകമായിരുന്നു. ശിക്ഷാ വിധി കേൾക്കാൻ സജിതയുടെ മക്കളും വീട്ടുകാരും കോടതിയിൽ എത്തിയിരുന്നു.

നെന്മാറ സജിത കൊലക്കേസിലെ വിധി ന്യായമാണോ? നിങ്ങളുടെ അഭിപ്രായം പങ്കുവെക്കുക.

Article Summary: Nemmara Sajitha murder case: Chendhamara gets double life imprisonment.

#NemmaraSajithaCase #DoubleLifeImprisonment #CourtVerdict #Chendhamara #PalakkadCrime #WitnessProtection