കണ്ണൂര്‍: (KVARTHA) കെഎസ്ആര്‍ടിസി ബസ് സ്റ്റാന്‍ഡിലെ (Bus Stand) ശുചിമുറി നടത്തിപ്പുകാരനെ കൊലപ്പെടുത്തിയെന്ന കേസില്‍ ഒന്നാംപ്രതി ചേലോറ ഗ്രാമ പഞ്ചായത് പരിധിയിലെ ഹരിഹരന് (Hariharan) കോടതി ശിക്ഷ വിധിച്ചു. പ്രതിക്ക് ഇരട്ട ജീവപര്യന്തവും ഒരു ലക്ഷത്തി ഇരുപതിനായിരം രൂപ പിഴയുമാണ് തലശ്ശേരി പ്രിന്‍സിപല്‍ സെഷന്‍സ് കോടതി വിധിച്ചത്. 

2017ലായിരുന്നു കേസിനാസ്പദമായ സംഭവം നടന്നത്. കണ്ണൂര്‍ കെഎസ്ആര്‍ടിസി ബസ് സ്റ്റാന്‍ഡിലെ ശുചിമുറി നടത്തിപ്പുകാരനായിരുന്നു തിരുവനന്തപുരം തോന്നക്കല്‍ സ്വദേശിയായ സുനില്‍കുമാര്‍. ശുചിമുറി നടത്തിപ്പ് ചുമല വിട്ടുകൊടുക്കാത്ത വിരോധമാണ് സുനില്‍ കുമാറിന്റെ കൊലപാതകത്തില്‍ കലാശിച്ചത്. കിടന്നുറങ്ങുകയായിരുന്ന സുനില്‍കുമാറിനെ ഒന്നാം പ്രതി ചേലോറ ഗ്രാമ പഞ്ചായത് പരിധിയിലെ ഹരിഹരന്‍ തോര്‍ത്തില്‍ കരിക്ക് കെട്ടി അടിച്ചു കൊലപ്പെടുത്തുകയായിരുന്നുവെന്നാണ് കേസ്. 

ജില്ലാ സെഷന്‍സ് ജഡ്ജ് കെടി നിസാര്‍ അഹമ്മദാണ് ശിക്ഷ വിധിച്ചത്. കേസില്‍ ജില്ലാ ഗവ. പീഡര്‍ അഡ്വ. കെ അജിത്ത് കുമാരാണ് പ്രോസിക്യൂഷന് വേണ്ടി ഹാജരായത്. സുനില്‍ കുമാറിനെ ആക്രമിക്കുന്നത് തടയാന്‍ ശ്രമിച്ച കെഎസ്ആര്‍ടിസി ബസ് ജീവനക്കാരനായ അഴീക്കോട് കച്ചേരി സ്വദേശി പി വിനോദ് കുമാറിനെയും ആക്രമിച്ചിരുന്നു. മദ്യലഹരിയിലാണ് പ്രതി അക്രമം നടത്തിയതെന്നാണ് പൊലീസ് സമര്‍പിച്ച കുറ്റപത്രത്തില്‍ പറയുന്നത്.

#KSRTC #Kannur #murder #Kerala #justice #crime