തൃശൂർ: (KVARTHA) സിപിഎം - ഡിവൈഎഫ്ഐ പ്രവർത്തകനായിരുന്ന കുമ്പളങ്ങാട് ബിജുവിനെ കൊലപ്പെടുത്തിയ കേസിൽ എട്ട് ആർഎസ്എസ് പ്രതികൾക്ക് ജീവപര്യന്തം തടവ്. തൃശൂർ മൂന്നാം അഡീഷണൽ ജില്ലാ ആൻഡ് സെഷൻസ് ജഡ്ജി കെ.എം. ലതീഷ് കുമാർ ആണ് ശിക്ഷ വിധിച്ചത്. ജീവപര്യന്തം കൂടാതെ ഓരോ പ്രതിയും 1,44,000 രൂപ പിഴയടയ്ക്കാനും കോടതി ഉത്തരവിട്ടു.

കൊലപാതക ശ്രമത്തിന് 10 വർഷവും സംഘം ചേരലിനും ഗൂഢാലോചനയ്ക്കും ഓരോ വർഷവും അധിക തടവും പ്രതികൾക്ക് വിധിച്ചിട്ടുണ്ട്. 2010 മെയ് 16 ന് ഉച്ചയ്ക്ക് മൂന്നരയോടെ കുമ്പളങ്ങാട് ഗ്രാമീണ വായനശാലയുടെ മുൻവശത്താണ് സംഭവം നടന്നത്. ഡിവൈഎഫ്ഐ യൂണിറ്റ് സമ്മേളനത്തിന്റെ പ്രവർത്തനങ്ങൾ നടക്കവേ ബിജെപി-ആർഎസ്എസ് പ്രവർത്തകരായ പ്രതികൾ മാരകായുധങ്ങളുമായി ആക്രമിക്കുകയായിരുന്നു.

പ്രതികളും ശിക്ഷയും

ഭൂരായിൽ ജയേഷ് (43), സുമേഷ് (42), സെബാസ്റ്റ്യൻ (45), ജോൺസൺ (51), ബിന്ദു എന്ന ചേലൻ ബിജു (46), സജീഷ് എന്ന സതീഷ് (39), സുനീഷ് (34), സനീഷ് (33) എന്നിവർക്കാണ് ശിക്ഷ വിധിച്ചത്. കേസിലെ ആറാം പ്രതി തവി വിചാരണയ്ക്കിടെ മരണപ്പെട്ടിരുന്നു.

കേസിന്റെ വിശദാംശങ്ങൾ

നാല് ബൈക്കുകളിലായി എത്തിയ പ്രതികൾ വടിവാൾ വീശി ഭീകരാന്തരീക്ഷം സൃഷ്ടിച്ച് ബിജുവിന്റെ തലയിലും കൈയിലും വെട്ടി. ഇത് തടയാനെത്തിയ പന്തലങ്ങാട്ട് ജിനീഷിനും (39) വെട്ടേറ്റ് പരിക്കേറ്റു. ഗുരുതരമായി പരിക്കേറ്റ ജിനീഷ് ഉൾപ്പെടെ 24 സാക്ഷികളെ പ്രോസിക്യൂഷൻ ഭാഗത്തുനിന്ന് വിസ്തരിച്ചു. 82 രേഖകളും 23 തൊണ്ടിമുതലുകളും കോടതിയിൽ ഹാജരാക്കി.

പ്രതികൾക്ക് പരമാവധി ശിക്ഷ നൽകണമെന്നും ബിജുവിന്റെ കുടുംബത്തിന് നഷ്ടപരിഹാരം നൽകണമെന്നും സ്പെഷ്യൽ പബ്ലിക് പ്രോസിക്യൂട്ടർ അഡ്വ. കെ.ഡി. ബാബു വാദിച്ചു. അഡ്വ. ശരത് ബാബു കോട്ടയ്ക്കൽ, അഡ്വ. പി.വി. രേഷ്മ എന്നിവരും പ്രോസിക്യൂഷനുവേണ്ടി ഹാജരായി. വടക്കാഞ്ചേരി ഇൻസ്പെക്ടറായിരുന്ന (നിലവിൽ ഗുരുവായൂർ എസിപി) ടി.എസ്. സിനോയാണ് കേസന്വേഷണം നടത്തി കുറ്റപത്രം സമർപ്പിച്ചത്.

കുമ്പളങ്ങാട് ബിജു വധക്കേസിലെ വിധി രാഷ്ട്രീയ കൊലപാതകങ്ങൾക്ക് എന്ത് സന്ദേശമാണ് നൽകുന്നത്? നിങ്ങളുടെ അഭിപ്രായം പങ്കുവെക്കുക

Article Summary: Eight RSS workers sentenced to life imprisonment for the murder of CPI(M)-DYFI activist Kumbalangad Biju in Thrissur.

#KeralaPolitics #PoliticalMurder #ThrissurCourt #KumbalangadBiju #RSS #CPIM