ബെംഗളൂരു: (KVARTHA) കർണാടക പൊലീസിന് നാണക്കേടായി മാറിയ അശ്ലീല ദൃശ്യ വിവാദത്തിൽ മുതിർന്ന ഐപിഎസ് ഉദ്യോഗസ്ഥനെതിരെ കർശന നടപടിയുമായി സംസ്ഥാന സർക്കാർ. സിവിൽ റൈറ്റ്സ് എൻഫോഴ്‌സ്‌മെന്റ് വിഭാഗം ഡിജിപി കെ. രാമചന്ദ്ര റാവുവിനെയാണ് സർവീസിൽ നിന്നും സസ്പെൻഡ് ചെയ്തത്. ഓഫിസിനുള്ളിൽ വെച്ച് സഹപ്രവർത്തകക്കൊപ്പം അടുത്ത് ഇടപഴകുന്ന ദൃശ്യങ്ങൾ കഴിഞ്ഞ ദിവസം സമൂഹമാധ്യമങ്ങളിൽ വ്യാപകമായി പ്രചരിച്ചിരുന്നു. ഇതിന് പിന്നാലെയാണ് സർക്കാർ നടപടി.

ദൃശ്യങ്ങൾ സമൂഹമാധ്യമങ്ങളിൽ

ഓഫിസിലെത്തിയ സഹപ്രവർത്തകയെ ഡിജിപി ചുംബിക്കുന്നതിന്റെയും കെട്ടിപ്പിടിക്കുന്നതിന്റെയും ഒന്നിലധികം ദൃശ്യങ്ങളാണ് പുറത്തുവന്നത്. ഓഫിസിനുള്ളിൽ നിന്നുതന്നെ ഒളിക്യാമറ ഉപയോഗിച്ച് ചിത്രീകരിച്ച ദൃശ്യങ്ങളാണിതെന്നാണ് സൂചന. ദൃശ്യങ്ങൾ പുറത്തുവന്നതോടെ കർണാടക പൊലീസിനെതിരെ വലിയ രീതിയിലുള്ള വിമർശനങ്ങൾ ഉയർന്നിരുന്നു. ഇതേത്തുടർന്ന് മുഖ്യമന്ത്രി സിദ്ധരാമയ്യയുടെ നേതൃത്വത്തിലുള്ള സർക്കാർ സംഭവത്തിൽ അടിയന്തര അന്വേഷണം പ്രഖ്യാപിക്കുകയും രാമചന്ദ്ര റാവുവിനെ സസ്പെൻഡ് ചെയ്യാൻ ഉത്തരവിടുകയുമായിരുന്നു.

പഴയ ദൃശ്യങ്ങളെന്ന് സൂചന

നിലവിൽ പുറത്തുവന്നിരിക്കുന്ന ദൃശ്യങ്ങൾ ഏകദേശം എട്ട് വർഷം മുൻപത്തേതാണെന്നാണ് ലഭിക്കുന്ന വിവരങ്ങൾ. ഓഫിസ് സമയത്ത് ക്യാബിനിലെത്തിയ സഹപ്രവർത്തകയുമായാണ് ഡിജിപി അടുത്തി ഇടപഴകിയത്. ദൃശ്യങ്ങൾ ഇപ്പോൾ പുറത്തുവന്നതിന് പിന്നിലെ സാഹചര്യവും അധികൃതർ പരിശോധിക്കുന്നുണ്ട്. വിരമിക്കാൻ വെറും നാലുമാസം മാത്രം ബാക്കിനിൽക്കെയാണ് ഉന്നത ഉദ്യോഗസ്ഥനെതിരെ അച്ചടക്ക നടപടി ഉണ്ടായിരിക്കുന്നത്.

മന്ത്രിയെ കാണാനായില്ല

വിഡിയോ വിവാദമായതിന് തൊട്ടുപിന്നാലെ ഡിജിപി രാമചന്ദ്ര റാവു ആഭ്യന്തര മന്ത്രി ജി. പരമേശ്വരയുടെ വീട്ടിലെത്തിയിരുന്നു. എന്നാൽ ഡിജിപിയെ കാണാനോ സംസാരിക്കാനോ മന്ത്രി തയാറായില്ലെന്നാണ് റിപ്പോർട്ടുകൾ. സർക്കാരിന് കടുത്ത അവമതിപ്പുണ്ടാക്കിയ സംഭവത്തിൽ വിട്ടുവീഴ്ച വേണ്ടെന്ന നിലപാടിലാണ് ആഭ്യന്തര വകുപ്പ്.

വിവാദങ്ങൾ വിടാതെ

1993 ബാച്ച് ഐപിഎസ് ഉദ്യോഗസ്ഥനായ രാമചന്ദ്ര റാവുവിനെതിരെ മുൻപും ഗുരുതര ആരോപണങ്ങൾ ഉയർന്നിരുന്നു. 2025-ൽ രാമചന്ദ്ര റാവുവിന്റെ വളർത്തുമകൾ രന്യ റാവുവിനെ സ്വർണക്കടത്ത് കേസിൽ റവന്യു ഇന്റലിജൻസ് (ഡിആർഐ) അറസ്റ്റ് ചെയ്തിരുന്നു. വിമാനത്താവളത്തിലെ പരിശോധനകൾ മറികടക്കാൻ മകളെ രാമചന്ദ്ര റാവു സഹായിച്ചുവെന്ന് അന്വേഷണത്തിൽ കണ്ടെത്തിയിരുന്നു.

തുടർന്ന് കഴിഞ്ഞ വർഷം രാമചന്ദ്ര റാവുവിനോട് നിർബന്ധിത അവധിയിൽ പ്രവേശിക്കാൻ സർക്കാർ നിർദേശിച്ചിരുന്നു. ഈ അവധി പൂർത്തിയാക്കി അടുത്തിടെയാണ് അദ്ദേഹം സർവീസിൽ തിരിച്ചെത്തിയത്. ഇതിനു പിന്നാലെയാണ് ഇപ്പോൾ അശ്ലീല ദൃശ്യ വിവാദത്തിലും അദ്ദേഹം കുടുങ്ങിയിരിക്കുന്നത്.

നിയമം കാത്തുസൂക്ഷിക്കേണ്ട ഉന്നത ഉദ്യോഗസ്ഥൻ ഓഫീസിനുള്ളിൽ കാണിച്ചത് അച്ചടക്ക ലംഘനമല്ലേ? നിങ്ങളുടെ അഭിപ്രായം പങ്കുവെക്കൂ.

Article Summary: Karnataka DGP K. Ramachandra Rao has been suspended following the viral circulation of an obscene video involving a colleague inside his office, just four months before his retirement.

#KarnatakaDGP #RamachandraRao #Suspension #PoliceControversy #KarnatakaNews #ViralVideo