കണ്ണൂർ: (KVARTHA) സ്റ്റേഷൻ ഹൗസ് ഓഫീസർ (എസ്.എച്ച്.ഒ) വ്യാപാരിയിൽനിന്ന് പാരിതോഷികം വാങ്ങിയെന്ന പരാതിയെത്തുടർന്ന് കണ്ണൂർ ടൗൺ പോലീസ് സ്റ്റേഷനിൽ വിജിലൻസ് പരിശോധന നടത്തി. ചൊവ്വാഴ്ച രാവിലെ പത്തുമണിയോടെയാണ് കണ്ണൂർ വിജിലൻസ് ഡി.വൈ.എസ്.പി. സുരേഷ് ബാബുവിൻ്റെ നേതൃത്വത്തിൽ പരിശോധന ആരംഭിച്ചത്. ഏകദേശം ഒരു മണിക്കൂറോളം റെയ്ഡ് നീണ്ടുനിന്നു.

വിജിലൻസിന് ലഭിച്ച പരാതിയുടെ അടിസ്ഥാനത്തിലാണ് പരിശോധന നടത്തിയതെന്ന് ഡി.വൈ.എസ്.പി. മാധ്യമങ്ങളോട് പ്രതികരിച്ചു. കണ്ണൂരിലെ വ്യാപാരിയും ബ്ലോഗറുമായ ഒരു വ്യക്തിയിൽനിന്ന്, സ്വർണം പൂശിയ മുത്തപ്പൻ വിളക്ക് എസ്.എച്ച്.ഒ. ശ്രീജിത്ത് കൊടേരി പിറന്നാൾ ഉപഹാരമായി സ്വീകരിക്കുന്നതിൻ്റെ വീഡിയോ ദൃശ്യം സാമൂഹിക മാധ്യമങ്ങളിൽ റീൽസായി പ്രചരിച്ചിരുന്നു. ഇതുമായി ബന്ധപ്പെട്ട് ഒരു മാധ്യമപ്രവർത്തകൻ മുഖ്യമന്ത്രിക്കും വിജിലൻസിനും പരാതി നൽകിയിരുന്നു. കണ്ണൂർ നഗരത്തിലെ വ്യാപാരിയുടെ സ്ഥാപനത്തിലെത്തി എസ്.എച്ച്.ഒ. ഉപഹാരം കൈപ്പറ്റുന്ന ദൃശ്യമടക്കമാണ് വിജിലൻസിന് ലഭിച്ച പരാതിയിൽ ഉൾപ്പെട്ടത്.

മുഖ്യമന്ത്രിക്ക് ലഭിച്ച പരാതിയുടെ അടിസ്ഥാനത്തിൽ ശ്രീജിത്ത് കൊടേരിക്കെതിരെ സ്പെഷ്യൽ ബ്രാഞ്ച് എ.സി.പി.യുടെ നേതൃത്വത്തിൽ അന്വേഷണം നടന്നുവരികയാണ്. ഇതിനിടെയാണ് വിജിലൻസ് റെയ്ഡ് നടന്നത്. എന്നാൽ, സ്റ്റേഷനിൽനിന്ന് പണമോ മറ്റു രേഖകളോ കണ്ടെടുത്തിട്ടില്ലെന്ന് വിജിലൻസ് അറിയിച്ചു. നേരത്തെയും കണ്ണൂർ ടൗൺ സ്റ്റേഷനിലെ ചില ഉദ്യോഗസ്ഥർക്കെതിരെ പൊതുജനങ്ങളിൽനിന്ന് വ്യാപകമായ ആരോപണങ്ങൾ ഉയർന്നിരുന്നു. ഇതിൻ്റെ അടിസ്ഥാനത്തിൽ സ്റ്റേഷനിലെ ചില ഉദ്യോഗസ്ഥർ വിജിലൻസ് നിരീക്ഷണത്തിലായിരുന്നു.

ഈ സംഭവത്തെക്കുറിച്ച് നിങ്ങളുടെ അഭിപ്രായം എന്താണ്? പോലീസ് ഉദ്യോഗസ്ഥർ പാരിതോഷികം സ്വീകരിക്കുന്നത് ശരിയാണോ? 

Article Summary: Vigilance raid at Kannur Town PS after SHO accused of accepting gift.

#Kannur #Vigilance #PoliceCorruption #SHO #GiftScandal #KeralaPolice