ന്യൂഡൽഹി: (KVARTHA) ഹൈകോടതി ജഡ്ജിയായിരുന്ന യശ്വന്ത് വർമയുടെ ഔദ്യോഗിക വസതിയിലെ സ്റ്റോർ റൂമിൽനിന്ന് വൻതോതിൽ പണം കണ്ടെത്തിയ സംഭവത്തിൽ സുപ്രീം കോടതിയുടെ അന്വേഷണ റിപ്പോർട്ട് പുറത്ത്. യശ്വന്ത് വർമയ്‌ക്കെതിരെ നടപടിക്ക് ശുപാർശ ചെയ്യുന്നതാണ് റിപ്പോർട്ട്. പണം ഔദ്യോഗിക വസതിയിൽ സൂക്ഷിച്ചതിന് തെളിവുണ്ടെന്നും, ജഡ്ജി വർമയോ വർമയുമായി ബന്ധപ്പെട്ടവരോ അറിയാതെ പണം വസതിയിൽ സൂക്ഷിക്കാൻ കഴിയില്ലെന്നും അന്വേഷണ സംഘം കണ്ടെത്തി.

64 പേജുള്ള റിപ്പോർട്ട് രാവിലെയാണ് സുപ്രീം കോടതിക്ക് സമർപ്പിച്ചത്. 55 പേരുടെ മൊഴി രേഖപ്പെടുത്തിയാണ് റിപ്പോർട്ട് തയ്യാറാക്കിയത്. പണം കണ്ടെത്തിയ സ്റ്റോർ മുറിയിൽ ജസ്റ്റിസ് യശ്വന്ത് വർമയ്ക്കും അദ്ദേഹത്തിന്റെ കുടുംബാംഗങ്ങൾക്കും പ്രവേശനം ഉണ്ടായിരുന്നു. അനുമതിയില്ലാതെ പുറത്തുനിന്നുള്ളവർക്ക് പ്രവേശനം നൽകിയിരുന്നില്ലെന്നും റിപ്പോർട്ടിൽ പറയുന്നു.

ഇംപീച്ച്മെന്റിന് സാധ്യത

യശ്വന്ത് വർമയെ ഇംപീച്ച് ചെയ്യാൻ മതിയായ തെളിവുകളുണ്ടെന്ന് റിപ്പോർട്ടിൽ പറയുന്നു. ഇപ്പോൾ അലഹബാദ് ഹൈകോടതിയിലെ ജഡ്ജിയാണ് അദ്ദേഹം. പണം കണ്ടെത്തിയ സംഭവത്തിനു പിന്നാലെയാണ് അദ്ദേഹത്തെ അലഹബാദിലേക്ക് സ്ഥലം മാറ്റിയത്.

സുപ്രീം കോടതിയുടെ ഫുൾ കോർട്ട് യോഗത്തിലാണ് ജസ്റ്റിസ് യശ്വന്ത് വർമയ്‌ക്കെതിരെ അന്വേഷണത്തിന് തീരുമാനമെടുത്തത്. യശ്വന്ത് വർമയ്‌ക്കെതിരെ കടുത്ത നടപടി വേണമെന്ന് ചില ജഡ്ജിമാർ നേരത്തെ ആവശ്യപ്പെട്ടിരുന്നു. യശ്വന്ത് വർമയുടെ വീട്ടിൽ തീപിടിത്തമുണ്ടായപ്പോൾ തീ അണയ്ക്കാൻ വന്ന അഗ്‌നിരക്ഷാസേനയാണ് കണക്കിൽപ്പെടാത്ത പണം കണ്ടെത്തിയത്. തീപിടിത്തമുണ്ടായ സമയത്ത് യശ്വന്ത് വർമ വീട്ടിലുണ്ടായിരുന്നില്ലെന്ന് പോലീസ് പറഞ്ഞു. കുടുംബാംഗങ്ങൾ അറിയിച്ചതിനെ തുടർന്നാണ് അഗ്‌നിരക്ഷാസേന വീട്ടിലെത്തി തീ അണച്ചത്. ഇതിനിടയിലാണ് കെട്ടുകണക്കിന് പണം കണ്ടെത്തിയത്. പരിശോധനയിൽ ഇവ കണക്കിൽപ്പെടാത്തതാണെന്ന് സ്ഥിരീകരിച്ചു.

ജഡ്ജിയുടെ വീട്ടിൽ പണം കണ്ടെത്തിയ സംഭവത്തെക്കുറിച്ച് നിങ്ങളുടെ അഭിപ്രായം എന്താണ്?

Article Summary: SC inquiry report recommends action against Justice Yashwant Varma for undisclosed cash.

#JusticeVerma #JudiciaryScandal #BlackMoney #SupremeCourt #Impeachment #IndiaCorruption