കാസർകോട്: (KasargodVartha) കുണ്ടംകുഴി സ്കൂളിൽ പത്താം ക്ലാസ് വിദ്യാർത്ഥിയെ കരണത്തടിച്ച് കര്‍ണപടം പൊട്ടിച്ച സംഭവത്തിൽ ഹെഡ്മാസ്റ്റർ എം. അശോകനെതിരെ പോലീസ് കേസെടുത്തു. ജാമ്യമില്ലാ വകുപ്പുകൾ പ്രകാരമാണ് ബേഡകം പോലീസ് കേസെടുത്തിരിക്കുന്നത്. ബി.എൻ.എസ് 126(2), 115(2) എന്നീ വകുപ്പുകൾ ചേർത്താണ് കേസെടുത്തത്. സംഭവത്തിൽ ബാലാവകാശ കമ്മീഷൻ സ്വമേധയാ കേസെടുക്കുകയും ചൊവ്വാഴ്ച (19.08.2025) കുട്ടിയുടെ വീട്ടിലെത്തി മൊഴിയെടുക്കുകയും ചെയ്യും.

അന്വേഷണത്തിൻ്റെ ഭാഗമായി ജില്ലാ വിദ്യാഭ്യാസ ഉപ ഡയറക്ടർ വി. മധുസൂദനൻ തിങ്കളാഴ്ച (18.08.2025) സ്കൂളിലെത്തി ഹെഡ്മാസ്റ്ററുടെയും പരിക്കേറ്റ വിദ്യാർത്ഥിയുടെയും മൊഴി രേഖപ്പെടുത്തിയിരുന്നു. പൊതുവിദ്യാഭ്യാസ ഡയറക്ടർക്ക് റിപ്പോർട്ട് സമർപ്പിച്ചിട്ടുണ്ട്. ഈ റിപ്പോർട്ടിന്റെ അടിസ്ഥാനത്തിൽ ഹെഡ്മാസ്റ്റർക്കെതിരെ നടപടിയുണ്ടായേക്കുമെന്ന് സൂചനയുണ്ട്.

കഴിഞ്ഞ തിങ്കളാഴ്ച സ്കൂൾ അസംബ്ലിക്കിടെയാണ് ഹെഡ്മാസ്റ്റർ വിദ്യാർത്ഥിയെ അടിച്ചതിനെ തുടർന്ന് കര്‍ണപടം പൊട്ടിയത്. സംഭവത്തിൽ മാധ്യമങ്ങളിൽ വാർത്ത വന്നതോടെയാണ് ബാലാവകാശ കമ്മീഷൻ കേസെടുത്തത്. കുട്ടിയുടെ അമ്മയുടെ മൊഴി പ്രകാരം, കുട്ടിയെ അസംബ്ലിയിൽ വെച്ച് അടിക്കുന്നത് കണ്ട അനുജത്തിക്ക് മാനസിക വിഷമം കാരണം ഛർദിയും തലകറക്കവുമുണ്ടായി. സംഭവത്തിൽ വിശദമായ അന്വേഷണം നടത്തുമെന്ന് വിദ്യാഭ്യാസ മന്ത്രി വി. ശിവൻകുട്ടി നേരത്തെ വ്യക്തമാക്കിയിരുന്നു.

അതേസമയം, അടിച്ചത് ലക്ഷ്യം തെറ്റിയതാണെന്ന് ഹെഡ്മാസ്റ്റർ വിശദീകരിച്ചെന്ന് പി.ടി.എ. പ്രസിഡന്റ് പറഞ്ഞു. ഒത്തുതീർപ്പിനായി ഒരു ലക്ഷം രൂപ വാഗ്ദാനം ചെയ്തു എന്ന ആരോപണം തെറ്റാണെന്നും അദ്ദേഹം കൂട്ടിച്ചേർത്തു. സംഭവത്തിൽ പ്രതിഷേധിച്ച് വിവിധ രാഷ്ട്രീയ പാർട്ടികൾ സ്കൂളിലേക്ക് മാർച്ച് നടത്തി. യൂത്ത് കോൺഗ്രസ് നടത്തിയ മാർച്ചിൽ നേരിയ സംഘർഷമുണ്ടായി.
 

ഇത്തരം സംഭവങ്ങൾക്കെതിരെ എങ്ങനെയാണ് പ്രതികരിക്കേണ്ടത്? നിങ്ങളുടെ അഭിപ്രായം കമന്റ് ചെയ്യുക.

Article Summary: Headmaster booked for allegedly hitting student and rupturing his eardrum.

#Kerala #SchoolViolence #Kasargod #CrimeNews #StudentSafety #ChildRights