തിരുവനന്തപുരം: (KVARTHA) പാറശ്ശാല സ്വദേശിയായ ഷാരോണ്‍ രാജിന്റെ കൊലപാതക കേസില്‍ ഒന്നാം പ്രതി ഗ്രീഷ്മയ്ക്ക് നെയ്യാറ്റിന്‍കര അഡീഷണല്‍ സെഷന്‍സ് കോടതി തൂക്കുകയര്‍ വിധിച്ചു. കേസില്‍ ഗ്രീഷ്മയുടെ അമ്മാവന്‍ നിര്‍മ്മല്‍ കുമാറിനെയും കോടതി കുറ്റക്കാരനായി കണ്ടെത്തിയിരുന്നു. ജഡ്ജ് എഎം ബഷീറാണ് വിധി പ്രസ്താവിച്ചത്.

കന്യാകുമാരി ജില്ലയിലെ രാമവര്‍മ്മചിറ സ്വദേശിനിയായ ഗ്രീഷ്മയും ഷാരോണും പ്രണയത്തിലായിരുന്നു. എന്നാല്‍ മറ്റൊരു വിവാഹം ഉറപ്പിച്ചതോടെ ഷാരോണുമായുള്ള ബന്ധം അവസാനിപ്പിക്കാന്‍ ഗ്രീഷ്മ തീരുമാനിച്ചു. തമിഴ്‌നാട്ടുകാരനായ ഒരു സൈനികന്റെ വിവാഹാലോചന വന്നതോടെ ഒന്നര വര്‍ഷത്തിലേറെ പ്രണയിച്ച ഷാരോണിനെ ഒഴിവാക്കാന്‍ ഗ്രീഷ്മ തീരുമാനിക്കുകയായിരുന്നു. ഈ തീരുമാനമാണ് ഷാരോണിന്റെ ദാരുണമായ കൊലപാതകത്തിലേക്ക് വഴി തെളിയിച്ചത്. 

ഷാരോണുമായുള്ള പ്രണയത്തില്‍ നിന്ന് പിന്മാറാന്‍ ജാതി വ്യത്യാസം മുതല്‍ ഭര്‍ത്താവ് മരിക്കുമെന്ന ജാതകദോഷം വരെയുള്ള നുണക്കഥകള്‍ ഗ്രീഷ്മ പറഞ്ഞുനോക്കി. എന്നാല്‍ ഷാരോണ്‍ പ്രണയത്തില്‍ ഉറച്ചുനിന്നതോടെ ഗ്രീഷ്മ കഷായത്തില്‍ വിഷം കലര്‍ത്തി നല്‍കി കൊലപ്പെടുത്താന്‍ തീരുമാനിക്കുകയായിരുന്നു. ഗ്രീഷ്മ ബിരുദാനന്തര ബിരുദ വിദ്യാര്‍ത്ഥിനിയും ഷാരോണ്‍ റേഡിയോളജി വിദ്യാര്‍ത്ഥിയുമായിരുന്നു.

2022 ഒക്ടോബര്‍ 14-ന് ഷാരോണ്‍ ഗ്രീഷ്മയുടെ വീട്ടില്‍ പോയിരുന്നു. അവിടെ വെച്ച് വേദന കുറയ്ക്കുന്നതിനുള്ള കഷായമാണെന്ന് പറഞ്ഞ് ഗ്രീഷ്മ ഷാരോണിന് വിഷം കലര്‍ത്തിയ കഷായം നല്‍കി. കഷായത്തിന്റെ കയ്പ് കാരണം മാങ്ങാ ജ്യൂസും നല്‍കി. വീട്ടില്‍ നിന്ന് മടങ്ങിയ ഷാരോണിന് ശാരീരിക അസ്വസ്ഥതകള്‍ അനുഭവപ്പെട്ടു. തുടര്‍ന്ന് പാറശാല സര്‍ക്കാര്‍ ആശുപത്രിയിലും പിന്നീട് തിരുവനന്തപുരം മെഡിക്കല്‍ കോളേജ് ആശുപത്രിയിലും പ്രവേശിപ്പിച്ചു. 

രക്തപരിശോധനയില്‍ കാര്യമായ പ്രശ്‌നങ്ങളില്ലെന്ന് കണ്ടതിനെ തുടര്‍ന്ന് വീട്ടിലേക്ക് തിരിച്ചയച്ചു. എന്നാല്‍ ഒക്ടോബര്‍ 15-ന് ഷാരോണിന്റെ ആരോഗ്യനില കൂടുതല്‍ മോശമായി. വീണ്ടും ആശുപത്രിയില്‍ പ്രവേശിപ്പിച്ചെങ്കിലും ഒക്ടോബര്‍ 25-ന് ഷാരോണ്‍ മരിച്ചു. ആന്തരിക അവയവങ്ങളുടെ തകരാറാണ് മരണകാരണമെന്ന് ഡോക്ടര്‍മാര്‍ കണ്ടെത്തി.

ഷാരോണിന്റെത് ആസൂത്രിത കൊലപാതകമാണെന്ന് കുടുംബം ആരോപിച്ചതിനെ തുടര്‍ന്ന് കേസിന്റെ അന്വേഷണം ക്രൈംബ്രാഞ്ച് പ്രത്യേക അന്വേഷണ സംഘത്തിന് കൈമാറി. ഡി.വൈ.എസ്.പി ജോണ്‍സന്റെ നേതൃത്വത്തിലുള്ള സംഘമാണ് കേസ് അന്വേഷിച്ചത്. കേസില്‍ ഗ്രീഷ്മയുടെ അമ്മാവന്‍ നിര്‍മല്‍ കുമാറിനെ ഇന്ത്യന്‍ ശിക്ഷാ നിയമം 201 പ്രകാരം (തെളിവ് നശിപ്പിക്കല്‍) കുറ്റക്കാരനാണെന്ന് കണ്ടെത്തി. ഗ്രീഷ്മയെ കൊലപാതകം, കൊലപാതക ശ്രമത്തോടുകൂടിയ തട്ടിക്കൊണ്ടുപോകല്‍, തെളിവ് നശിപ്പിക്കല്‍ തുടങ്ങിയ കുറ്റങ്ങള്‍ ചുമത്തിയാണ് ശിക്ഷിച്ചത്. 

ഗ്രീഷ്മയുടെ പ്രതിശ്രുത വരന്‍ ഉള്‍പ്പെടെ 68 സാക്ഷികളാണ് കേസില്‍ ഉണ്ടായിരുന്നത്. വിചാരണ വേളയില്‍ പ്രതികള്‍ക്കെതിരെ 95 സാക്ഷികളെ വിസ്തരിച്ചു. 323 രേഖകളും 51 തൊണ്ടിമുതലുകളും പ്രോസിക്യൂഷന്‍ കോടതിയില്‍ ഹാജരാക്കി. വിവാഹ നിശ്ചയത്തിന് ശേഷം ഷാരോണുമായി ഗ്രീഷ്മ ലൈംഗിക ബന്ധത്തില്‍ ഏര്‍പ്പെട്ടിരുന്നു എന്ന് കോടതി വിധി പ്രസ്താവത്തില്‍ വ്യക്തമാക്കി. സാഹചര്യ തെളിവുകള്‍ പൊലീസ് നല്ല രീതിയില്‍ ഉപയോഗിച്ചെന്നും കോടതി അഭിപ്രായപ്പെട്ടു.

#SharonMurderCase #GreeshmaVerdict #Kerala #Justice #Crime #Murder