കണ്ണൂര്‍: (KVARTHA) എരഞ്ഞോളിയില്‍ ആംബുലന്‍സിന് വഴി മുടക്കിയ സംഭവത്തില്‍ കാര്‍ ഓടിച്ച ഡോക്ടറില്‍ നിന്ന് മോടോര്‍ വാഹന വകുപ്പ് ഈടാക്കിയത് 5000 രൂപ പിഴ. ഹൃദയാഘാതത്തെ തുടര്‍ന്ന് അതീവ ഗുരുതരാവസ്ഥയില്‍ ആശുപത്രിയിലേക്ക് കൊണ്ടുപോവുകയായിരുന്ന റുഖിയ എന്ന സ്ത്രീയുടെ ജീവനാണ് ഡോക്ടറുടെ അനാസ്ഥ മൂലം നഷ്ടമായത്. പിണറായി സ്വദേശിയായ ഡോക്ടര്‍ രാഹുല്‍ രാജാണ് വഴിമുടക്കിയ കാര്‍ ഓടിച്ചത്. 

ജനുവരി 16-ന് വൈകുന്നേരമാണ് കേരളത്തെ നടുക്കിയ സംഭവം അരങ്ങേറിയത്. മട്ടന്നൂര്‍ സ്വദേശി റുഖിയക്ക് ഹൃദയാഘാതം ഉണ്ടാവുകയും അടിയന്തര ചികിത്സക്കായി തലശേരിയിലെ ഇന്ദിരാഗാന്ധി സഹകരണ ആശുപത്രിയിലേക്ക് മാറ്റാന്‍ തീരുമാനിക്കുകയും ചെയ്തിരുന്നു. രോഗിയുടെ ഗുരുതരാവസ്ഥ കണക്കിലെടുത്ത് സിപിആര്‍ നല്‍കുന്നതിനുള്ള സൗകര്യങ്ങളോടെയാണ് ആംബുലന്‍സ് പുറപ്പെട്ടത്.

കനത്ത ട്രാഫിക് ഉണ്ടായിരുന്നിട്ടും ആംബുലന്‍സ് ഡ്രൈവര്‍ ശരത് വളരെ വേഗത്തില്‍ ലക്ഷ്യസ്ഥാനത്തേക്ക് കുതിക്കുകയായിരുന്നു. ഏകദേശം 30 മിനിറ്റിനുള്ളില്‍ 29 കിലോമീറ്റര്‍ ദൂരം അദ്ദേഹം പിന്നിട്ടു. എന്നാല്‍ നായനാര്‍ റോഡില്‍ എത്തിയപ്പോള്‍ ഡോക്ടര്‍ രാഹുല്‍ രാജിന്റെ കാര്‍ ആംബുലന്‍സിന് മുന്നില്‍ തടസ്സമുണ്ടാക്കി. ആംബുലന്‍സ് ഹോണ്‍ മുഴക്കിയിട്ടും സൈറണ്‍ ഇട്ടിട്ടും ഡോക്ടര്‍ വാഹനം മാറ്റാന്‍ തയ്യാറായില്ലെന്നാണ് പരാതി. 

സംഭവത്തെ തുടര്‍ന്ന് ആംബുലന്‍സ് ഡ്രൈവര്‍ ശരത് പൊലീസില്‍ പരാതി നല്‍കി. ഇതിന് പിന്നാലെയാണ് മോടോര്‍ വാഹന വകുപ്പ് ഡോക്ടര്‍ക്ക് 5000 രൂപ പിഴ ചുമത്തിയത്. കൂടാതെ കതിരൂര്‍ പൊലീസ് ഇന്‍ഡ്യന്‍ ശിക്ഷാ നിയമത്തിലെ വിവിധ വകുപ്പുകള്‍ പ്രകാരം കേസ് രജിസ്റ്റര്‍ ചെയ്തിട്ടുണ്ട്. ആംബുലന്‍സ് പലതവണ ഓവര്‍ടേക്ക് ചെയ്യാന്‍ ശ്രമിക്കുന്നതിന്റെ ദൃശ്യങ്ങള്‍ സമൂഹമാധ്യമങ്ങളില്‍ വ്യാപകമായി പ്രചരിച്ചതോടെ ഡോക്ടര്‍ക്കെതിരെ വലിയ പ്രതിഷേധമാണ് ഉയര്‍ന്നത്.

ആംബുലന്‍സ് തൊട്ട് പിന്നില്‍ എത്തിയപ്പോഴാണ് കണ്ടതെന്നും, തുടര്‍ന്ന് വെപ്രാളത്തില്‍ സംഭവിച്ചതാണെന്നുമാണ് ഡോ. രാഹുല്‍ രാജ് മൊഴി നല്‍കിയത്. 20 സെക്കന്റിനുള്ളില്‍ തന്നെ സൈഡ് നല്‍കിയിരുന്നുവെന്നും രാഹുല്‍ രാജ് പറഞ്ഞു. എന്നാല്‍, ഒരു ജീവന്‍ നഷ്ടപ്പെടുന്നതിന് ഇടയാക്കിയ ഈ സംഭവം ഒരിക്കലും ന്യായീകരിക്കാനാവില്ലെന്ന് പലരും അഭിപ്രായപ്പെട്ടു.

#ambulancedelay, #medicalnegligence, #kannurnews, #kerala, #trafficviolation