ബെംഗ്ളൂറു: (KVARTHA) ധർമസ്ഥലയിൽ മലയാളി കെ.ജെ. ജോയിയുടെ മരണത്തിൽ ദുരൂഹതയുണ്ടെന്ന് ആരോപിച്ച് മകൻ പരാതി നൽകി. 2018-ൽ വാഹനം ഇടിച്ച് മരിച്ച ഇടുക്കി സ്വദേശി ബൽത്തങ്ങാടി കറമ്പാറു സവനാലു ഡാർബെ ഹൗസിൽ കെ.ജെ. ജോയിയുടെ മരണം കൊലപാതകമാണെന്ന് ആരോപിച്ച് മകൻ തളിപ്പറമ്പ് പുളിമ്പറമ്പിലെ കക്കാട്ടുവീട്ടിൽ അനീഷ് തളിപ്പറമ്പ് പോലീസിൽ പരാതി നൽകുകയായിരുന്നു. ധർമസ്ഥലയിലെ ദുരൂഹ മരണങ്ങൾക്ക് സമാനമാണ് പിതാവിൻ്റെ മരണമെന്ന് പരാതിയിൽ പറയുന്നു.

ധർമസ്ഥലയിലെ ഒരു പ്രമുഖൻ്റെ നിർദേശപ്രകാരം ഇരുചക്ര വാഹനത്തിൽ സഞ്ചരിക്കുമ്പോൾ വാഹനം ഇടിച്ച് കൊലപ്പെടുത്തിയെന്നാണ് അനീഷിൻ്റെ പരാതി. അനീഷ് ധർമസ്ഥലയിലെത്തി പരാതി നൽകിയതോടെ ഭീഷണി ശക്തമായെന്നും, തുടർന്ന് അവിടെനിന്ന് രക്ഷപ്പെട്ട് നാട്ടിൽ എത്തിയെന്നും അദ്ദേഹം പോലീസിനെ അറിയിച്ചു.

ധർമസ്ഥലയിലെ ദുരൂഹ മരണങ്ങൾ: എസ്‌ഐടി അന്വേഷണത്തെ സ്വാഗതം ചെയ്ത് ക്ഷേത്ര ട്രസ്റ്റ്

അതേസമയം, ധർമസ്ഥലയിൽ നൂറിലധികം പേരുടെ മൃതദേഹങ്ങൾ മറവു ചെയ്‌തെന്ന കേസിലെ എസ്‌ഐടി (പ്രത്യേക അന്വേഷണ സംഘം) അന്വേഷണത്തെ ക്ഷേത്ര ട്രസ്റ്റ് സ്വാഗതം ചെയ്തു. ഈ ആരോപണങ്ങളിൽ ഇതാദ്യമായാണ് ട്രസ്റ്റ് പരസ്യമായി പ്രതികരിക്കുന്നത്. സ്ത്രീകളുടെയും കുട്ടികളുടെയും മൃതദേഹങ്ങൾ വനമേഖലയിൽ കുഴിച്ചുമൂടിയെന്ന, ക്ഷേത്രത്തിലെ മുൻ ശുചീകരണ തൊഴിലാളിയുടെ വെളിപ്പെടുത്തലിൽ സ്വതന്ത്രവും സുതാര്യവും നീതിപൂർവകവുമായ അന്വേഷണം വേണമെന്ന് ട്രസ്റ്റ് വക്താവ് കെ. പാർശ്വനാഥ് ജെയിൻ ആവശ്യപ്പെട്ടു.

ട്രസ്റ്റിനെ അപകീർത്തിപ്പെടുത്തുന്ന വാർത്തകൾക്ക് വിലക്ക്

ഇതിനിടെ, ഇനിയൊരു ഉത്തരവുണ്ടാകും വരെ ട്രസ്റ്റിനെ അപകീർത്തിപ്പെടുത്തുന്ന വാർത്തകൾ പ്രസിദ്ധീകരിക്കരുതെന്ന് ബെംഗളൂരു സെഷൻസ് കോടതി ഉത്തരവിട്ടു.
 

ധർമസ്ഥലയിലെ ഈ ദുരൂഹ മരണങ്ങളെക്കുറിച്ച് നിങ്ങളുടെ അഭിപ്രായം എന്താണ്? കമൻ്റ് ചെയ്യുക.

Article Summary: Malayali's death in Dharmasthala, son alleges murder and threats.

#Dharmasthala #MysteryDeath #MurderAllegation #KeralaNews #PoliceComplaint #Investigation