തിരുവനന്തപുരം: (KVARTHA) പേരൂർക്കട പോലീസ് സ്റ്റേഷനിൽ മോഷണക്കുറ്റം ആരോപിച്ച് ദളിത് യുവതിയെ 20 മണിക്കൂറോളം അനധികൃതമായി തടഞ്ഞുവെച്ച് മാനസികമായി പീഡിപ്പിച്ചതായി പരാതി. പനവൂർ ഗ്രാമ പഞ്ചായത് പരിധിയിലെ ബിന്ദു (36) ആണ് ദുരനുഭവം നേരിട്ടത്. ഈ മാസം 13-ന് വൈകുന്നേരം മൂന്ന് മണിക്ക് ചോദ്യം ചെയ്യാനായി വിളിച്ചുവരുത്തിയ ബിന്ദുവിനെ അടുത്ത ദിവസം ഉച്ചയ്ക്ക് 12 മണിക്കാണ് പോലീസ് വിട്ടയച്ചത്.

ജോലിക്ക് നിന്ന വീട്ടിൽ നിന്ന് സ്വർണ്ണമാല നഷ്ടപ്പെട്ടെന്ന വീട്ടുടമസ്ഥയുടെ പരാതിയെ തുടർന്നാണ് പോലീസ് ബിന്ദുവിനെ ചോദ്യം ചെയ്യാനായി സ്റ്റേഷനിലേക്ക് വിളിപ്പിച്ചത്. മൂന്ന് ദിവസം മുൻപാണ് ബിന്ദു ഈ വീട്ടിൽ ജോലിക്കെത്തിയത്. വീട്ടുടമസ്ഥയുടെ പരാതിയെ തുടർന്ന് പോലീസ് ക്രൂരമായി മാനസികമായി പീഡിപ്പിച്ചെന്നും കുടിക്കാൻ വെള്ളം പോലും നൽകിയില്ലെന്നും ബിന്ദു ആരോപിച്ചു. രാത്രി വൈകി പോലീസ് ബിന്ദുവിൻ്റെ പനവൂരിലെ വീട്ടിൽ മാലയ്ക്കായി പരിശോധന നടത്തി. പിന്നീട് വീണ്ടും പേരൂർക്കട സ്റ്റേഷനിലെത്തിച്ച് ഏറെ നേരം ഇരുത്തി. നിരപരാധിയാണെന്ന് കരഞ്ഞു പറഞ്ഞിട്ടും പോലീസ് വിട്ടയച്ചില്ലെന്നും രാത്രി വൈകിയും സ്റ്റേഷനിലാണെന്ന വിവരം വീട്ടുകാരെ അറിയിക്കാൻ പോലും അനുവദിച്ചില്ലെന്നും ബിന്ദു പറഞ്ഞു.

അതേസമയം, മോഷണം പോയെന്ന് പറയുന്ന സ്വർണ്ണമാല പിന്നീട് പരാതിക്കാരുടെ വീട്ടിൽ നിന്ന് തന്നെ കണ്ടെത്തി. പിറ്റേന്ന് ഉടമസ്ഥ തന്നെ സ്റ്റേഷനിലെത്തി മാല കിട്ടിയെന്ന് അറിയിച്ചതിന് ശേഷമാണ് ബിന്ദുവിനെ പോലീസ് വിട്ടയക്കാൻ തയ്യാറായത്. നിരപരാധിത്വം തെളിഞ്ഞിട്ടും മണിക്കൂറുകളോളം സ്റ്റേഷനിൽ നിർത്തിയ ശേഷം മാത്രമാണ് ഫോൺ തിരികെ നൽകിയതും വീട്ടിലേക്ക് പോകാൻ അനുവദിച്ചതെന്നും ബിന്ദു കൂട്ടിച്ചേർത്തു.

തനിക്ക് നേരിട്ട അപമാനത്തിനും മാനസിക പീഡനത്തിനും എതിരെ ബിന്ദു മുഖ്യമന്ത്രി, പട്ടികജാതി വകുപ്പ് മന്ത്രി, ഡിജിപി എന്നിവർക്ക് പരാതി നൽകി.

പോലീസിന്റെ ഈ നടപടിയെക്കുറിച്ച് നിങ്ങളുടെ അഭിപ്രായങ്ങൾ രേഖപ്പെടുത്തുക. ഇങ്ങനെയുള്ള സംഭവങ്ങൾ ആവർത്തിക്കാതിരിക്കാൻ എന്ത് ചെയ്യാം? വാര്‍ത്ത ഷെയർ ചെയ്യൂ.

Article Summary: A Dalit woman has filed a complaint against the Peroorkada police in Thiruvananthapuram, alleging that she was mentally harassed and detained for about 20 hours at the police station on a false accusation of theft. The woman, Bindu, was released only after the missing necklace was found at the complainant's house.

#PoliceHarassment, #DalitWoman, #PeroorkadaPolice, #KeralaPolice, #Injustice, #HumanRights