യുവതിയുടെ നഗ്നചിത്രങ്ങൾ പ്രചരിപ്പിച്ച് ഭീഷണിപ്പെടുത്തിയ സൈബർ തട്ടിപ്പിലെ മുഖ്യപ്രതി പിടിയിൽ

കോഴിക്കോട്: (KVARTHA) അഴിയൂരിലെ യുവതിയെ വഞ്ചിച്ചു പണം തട്ടിയെടുക്കുകയും മോർഫ് ചെയ്ത നഗ്നചിത്രങ്ങൾ പ്രചരിപ്പിക്കുമെന്ന് ഭീഷണിപ്പെടുത്തുകയും ചെയ്ത സൈബർ തട്ടിപ്പ് കേസിലെ മുഖ്യപ്രതിയെ ചോമ്പാല പോലീസ് അറസ്റ്റ് ചെയ്തു. ബിഹാറിലെ ഔറംഗാബാദ് ജില്ലയിലെ മാലി എന്ന സ്ഥലത്ത് നിന്നാണ് അഭിമന്യു കുമാർ (22) എന്നയാളെ സാഹസികമായി പിടികൂടിയത്.

യുവതി ഇൻസ്റ്റഗ്രാം വഴി കണ്ട ഒരു ലോൺ പരസ്യം ആണ് തട്ടിപ്പിൻ്റെ തുടക്കം. ഈ പരസ്യത്തിൽ ക്ലിക്ക് ചെയ്തതോടെ യുവതിയുടെ ഫോൺ ഐ.ഡി. ഹാക്ക് ചെയ്ത പ്രതി പണം തട്ടിയെടുക്കുകയായിരുന്നു. പിന്നീട്, കൂടുതൽ പണം ആവശ്യപ്പെട്ട് ഭീഷണിപ്പെടുത്തുകയും, പണം നൽകാൻ വിസമ്മതിച്ചപ്പോൾ യുവതിയുടെയും അവരുടെ 13 വയസ്സുള്ള മകളുടെയും ഫോട്ടോകൾ മോർഫ് ചെയ്ത് നഗ്നചിത്രങ്ങളുണ്ടാക്കി അയച്ചു നൽകി ഭീഷണി തുടരുകയും ചെയ്തു. തുടർന്നാണ് യുവതി ചോമ്പാല പോലീസിൽ പരാതി നൽകിയത്.

പരാതിയുടെ അടിസ്ഥാനത്തിൽ ചോമ്പാല പോലീസ് കേസെടുത്ത് അന്വേഷണം ആരംഭിച്ചു. ബാങ്ക് അക്കൗണ്ടുകൾ, മൊബൈൽ നമ്പറുകൾ, സോഷ്യൽ മീഡിയ അക്കൗണ്ടുകൾ എന്നിവ കേന്ദ്രീകരിച്ച് നടത്തിയ അന്വേഷണത്തിലാണ് പ്രതികളെക്കുറിച്ച് പോലീസിന് സൂചന ലഭിച്ചത്. ജില്ലാ പോലീസ് മേധാവി കെ. ഇ. ബൈജു ഐ.പി.എസ് നൽകിയ നിർദ്ദേശപ്രകാരം, കേസിൻ്റെ അന്വേഷണ ഉദ്യോഗസ്ഥനായ ഇൻസ്പെക്ടർ സേതുനാഥ് എസ്. ആറിൻ്റെ നേതൃത്വത്തിൽ സബ് ഇൻസ്പെക്ടർ ജെഫിൻ രാജു, സീനിയർ സിവിൽ പോലീസ് ഓഫീസർ സജിത്ത് പി.ടി, സിവിൽ പോലീസ് ഓഫീസർ രാജേഷ് എം.കെ. എന്നിവരടങ്ങിയ പ്രത്യേക അന്വേഷണ സംഘത്തെ ബിഹാറിലേക്ക് അയക്കുകയായിരുന്നു.

നക്സൽ ഭീഷണിയുള്ളതും വർഷങ്ങൾക്ക് മുമ്പ് പോലീസ് സ്റ്റേഷൻ ആക്രമിച്ച് പോലീസുകാരെ വധിച്ചതുമായ ഔറംഗാബാദ് ജില്ലയിലെ മാലി പോലീസ് സ്റ്റേഷൻ പരിധിയിൽ വെച്ചാണ് പ്രതിയെ പിടികൂടിയത്. പോലീസ് സാന്നിധ്യം തിരിച്ചറിഞ്ഞ് പ്രതി രക്ഷപ്പെടാൻ സാധ്യതയുണ്ടെന്ന് മനസ്സിലാക്കിയ അന്വേഷണ സംഘം വാഹനം ഒഴിവാക്കി അർദ്ധരാത്രിയിൽ ആയുധങ്ങളേന്തിയ ഇരുപതോളം സായുധസേനയ്ക്കൊപ്പം കിലോമീറ്ററുകൾ കാൽനടയായി സഞ്ചരിച്ച് പ്രതിയുടെ വീട് വളഞ്ഞ് സാഹസികമായി പിടികൂടുകയായിരുന്നു. അറസ്റ്റ് ചെയ്ത പ്രതിയെ കോടതിയിൽ ഹാജരാക്കി താൽക്കാലിക കസ്റ്റഡിയിൽ വാങ്ങി മറ്റ് പ്രതികളെക്കുറിച്ചുള്ള നിർണ്ണായക വിവരങ്ങൾ ശേഖരിച്ചാണ് അന്വേഷണ സംഘം മടങ്ങിയത്.

സൈബർ തട്ടിപ്പിൻ്റെ ഭീകരത മനസ്സിലാക്കാൻ ഈ വാർത്ത സഹായിക്കും. നിങ്ങളുടെ സുഹൃത്തുക്കളുമായി ഇത് പങ്കുവയ്ക്കൂ.

Article Summary: Main accused in a cyber fraud case arrested from Bihar.

#CyberCrime #FraudArrest #Bihar #KeralaPolice #CyberSafety #OnlineFraud