Controversy | പീഡന പരാതിയില് പ്രതിഷേധം കനത്തിട്ടും മുകേഷിനെ ചേര്ത്തുപിടിച്ച് സിപിഎം; രാജി വേണ്ടന്ന് തീരുമാനം
തിരുവനന്തപുരം: (KVARTHA) നടിയുടെ ലൈംഗിക പീഡന പരാതിയില് (Molestation Complaint) ജാമ്യമില്ലാ വകുപ്പുകള് പ്രകാരം കേസെടുത്തിട്ടും മുകേഷിനെ (Mukesh) ചേര്ത്തുപിടിച്ച് സിപിഎം (CPM). കൊല്ലം എംഎല്എ സ്ഥാനം രാജിവെക്കില്ല. അവെയ്ലബിള് സെക്രട്ടറിയേറ്റ് യോഗത്തില് നിലവില് എംഎല്എ സ്ഥാനത്തുനിന്ന് രാജി വേണ്ടെന്നാണ് നിലപാട്. തല്ക്കാലം ചലച്ചിത്ര നയ രൂപീകരണ സമിതിയില് നിന്ന് മുകേഷിനെ മാറ്റാനാണ് തീരുമാനം. അതേസമയം, നാളത്തെ സെക്രട്ടറിയേറ്റ് യോഗവും വിഷയം ചര്ച്ച ചെയ്യും.
പീഡന പരാതിയില് പ്രതിഷേധം കനത്തതോടെ, ആരോപണത്തില് താരം മുഖ്യമന്ത്രി പിണറായി വിജയന് വിശദീകരണം നല്കിയിരുന്നു. ആരോപണം ശരിയല്ലെന്നും പരാതിക്കാരി തന്നെ ഭീഷണിപ്പെടുത്തിയെന്നുമാണ് മുകേഷ് പറയുന്നത്. നടി അയച്ച വാട്സ്അപ്പ് സന്ദേശങ്ങള് കൈവശം ഉണ്ടെന്നും മുകേഷ് മുഖ്യമന്ത്രിയെ അറിയിച്ചു. രാജിയ്ക്കായി പ്രതിപക്ഷമുള്പ്പെടെ പ്രതിഷേധം ശക്തമാക്കുന്നതിനിടയിലാണ് വിശദീകരണം നല്കിയത്.
നടിയുടെ ലൈംഗികാതിക്രമ പരാതിയില് നേരത്തെ കോണ്ഗ്രസ് എംഎല്എമാര് രാജിവെച്ചില്ലലോയെന്ന് ചോദിച്ചുകൊണ്ടാണ് മുകേഷിന്റെ രാജിയാവശ്യം എല്ഡിഎഫ് കണ്വീനര് ഇപി ജയരാജന് തള്ളിയത്. മുകേഷിനെതിരെ കേസെടുത്തത് ധാര്മികമായ നിലപാടാണെന്നും ഇപി ജയരാജന് പറഞ്ഞു. സംസ്ഥാന സര്ക്കാര് സ്ത്രീ സംരക്ഷണത്തിനു സ്വീകരിച്ചത് ചരിത്ര നടപടിയാണ്. മുഖം നോക്കാതെയാണ് ശക്തമായ നടപടിയെടുത്തത്. പൊലീസ് നടപടിയും സ്വീകരിച്ചുവരുകയാണ്. പ്രത്യേക അന്വേഷണ സംഘം രൂപീകരിച്ചതും ചരിത്രപരമായ നടപടിയാണ്. പ്രത്യേക സംരക്ഷണം നല്കില്ല. തെറ്റിന് ശിക്ഷ ഉണ്ട്. എല്ലാം കാത്തിരുന്ന് കാണാമെന്നും ഇപി ജയരാജന് പ്രതികരിച്ചു.
അതേസമയം, മുകേഷിന്റെ രാജി കാര്യത്തില് സിപിഐയില് അതിരൂക്ഷമായ അഭിപ്രായ ഭിന്നതയുണ്ടെന്നാണ് റിപ്പോര്ട്ട്. രാജിവക്കാതെ മുന്നോട്ട് പോകുന്നത് ശരിയാകില്ലെന്നാണ് പാര്ട്ടിയിലെ ഭൂരിപക്ഷ അഭിപ്രായം. പൊതു പ്രവര്ത്തനത്തില് ധാര്മ്മികത അനിവാര്യമെന്നാണ് പൊതു വികാരം. എന്നാല് മുകേഷിന്റെ രാജി ആവശ്യം കടുപ്പിക്കേണ്ടെന്നാണ് പാര്ട്ടി സംസ്ഥാന സെക്രട്ടറി ബിനോയ് വിശ്വം ആവശ്യപ്പെട്ടത്. രാജി കാര്യത്തില് സിപിഎമ്മും മുകേഷും തീരുമാനം എടുക്കട്ടെ എന്ന നിലപാടിലാണ് ബിനോയ് വിശ്വം. സിപിഎം നേതൃത്വവുമായി ബിനോയ് വിശ്വം സംസാരിച്ചെന്നും വിവരമുണ്ട്.
#KeralaPolitics #CPM #India #controversy #MLA #justiceforwomen
