ചെന്നൈ: (KVARTHA) മോഷണം പോയ മൊബൈല്‍ ഫോൺ കണ്ടെത്താനെത്തിയ മലയാളി ആർപിഎഫ് ഉദ്യോഗസ്‌ഥനെയും പരാതിക്കാരനെയും കൂട്ടം ചേർന്നു ക്രൂരമായി മർദിച്ച സംഭവത്തിൽ രണ്ട്‌ പേർ അറസ്റ്റ‌ിലായി. ചെന്നൈ സെൻട്രൽ സ്റ്റേഷനിൽ ഹെഡ് കോൺസ്റ്റബിളായി ജോലി ചെയ്യുന്ന ആലപ്പുഴ സ്വദേശിയായ ഉദ്യോഗസ്ഥനും, ഫോൺ നഷ്ടപ്പെട്ട തിരുവനന്തപുരം മെയിലിലെ എസി മെക്കാനിക്ക് കാർത്തിക്കിനുമാണു മർദനമേറ്റത്‌.

ഇരുവരും ആക്രമണത്തെ തുടർന്ന്‌ ചികിത്സ തേടി. അതേ സമയം, സംഭവത്തിന്റെ വിഡിയോ ദൃശ്യങ്ങളടക്കം സമൂഹമാധ്യമങ്ങളിൽ വ്യാപകമായി പ്രചരിച്ചിട്ടും ഒരാഴ്ചയ്ക്കു ശേഷമാണു ബർമ ബസാറിലെ കച്ചവടക്കാരായ ചന്ദ്ര, ഇമ്രാൻ എന്നിവരെ പോലീസ്‌ പിടികൂടിയത്‌. കാർത്തിക്കിൻ്റെ ഫോൺ ട്രെയിനിൽ നിന്നാണ്‌ നഷ്ടമായത്‌.

സെൻട്രലിലെ ആർപിഎഫ് ഉദ്യോഗസ്‌ഥർ 'ഫോൺ ട്രാക്കർ ആപ്പിന്റെ' സഹായത്തോടെ നടത്തിയ അന്വേഷണത്തിൽ, ഫോൺ ബർമ ബസാറിൽ ഉള്ളതായി കണ്ടെത്തി. ഈ ഫോണിലേക്ക്‌ വിളിച്ചപ്പോൾ, പണം നൽകുകയാണെങ്കിൽ ഫോൺ തിരികെ നൽകാമെന്ന്‌ കോളെടുത്തയാൾ അറിയിച്ചു.

ഇതേത്തുടർന്നു പണം നൽകി ഫോൺ തിരികെ വാങ്ങാനാണ്‌ ഉദ്യോഗസ്‌ഥൻ കാർത്തിക്കിനെയും കൂട്ടി ബർമ ബസാറിലെത്തിയത്‌. എന്നാൽ, കാർത്തിക്കിൻ്റെ ഫോൺ നൽകാൻ ഇയാൾ തയാറായില്ല. അതിനിടെ, ഇയാളുടെ കൈവശമുണ്ടായിരുന്ന ബാഗിൽ ലക്ഷക്കണക്കിനു രൂപയുടെ നോട്ടുകെട്ടുകൾ ആർപിഎഫ് ഉദ്യോഗസ്‌ഥരുടെ ശ്രദ്ധയിൽപെട്ടു. ഇതോടെ, ബർമ ബസാറിലെ കച്ചവടക്കാർ നൂറിലേറെ വരുന്ന സംഘമായി ഇരുവരെയും വളയുകയായിരുന്നു.

സംഘം രണ്ടു പേരെയും ക്രൂരമായി ആക്രമിച്ചു. ആർപിഎഫ് ഉദ്യോഗസ്ഥന്റെ മുഖത്തും നെഞ്ചിലും വയറിലുമടക്കം ഗുരുതരമായ പരുക്കേറ്റു. 'ബർമ ബസാറിൽ പോലീസ്‌ കടക്കാൻ അനുവദിക്കില്ല' എന്ന്‌ ആക്രോശിച്ചായിരുന്നു ആക്രമണം. ഇരുവരെയും 'തല്ലിക്കൊല്ലാൻ' ചിലർ ആക്രോശിക്കുന്നതും സംഭവത്തിൻ്റെ ദൃശ്യങ്ങളിലുണ്ട്‌.

സംഭവം നടന്ന്‌ ഒരാഴ്‌ചയിലേറെ കഴിഞ്ഞിട്ടും, ആർപിഎഫ് ഉദ്യോഗസ്‌ഥനും ഫോൺ നഷ്‌ടപ്പെട്ട യുവാവും നൽകിയ പരാതിയിൽ തുടർ നടപടികൾ സ്വീകരിക്കാൻ നോർത്ത് ബീച്ച് റോഡ് പൊലീസ് തയാറായില്ലെന്ന്‌ ഇരുവരും ആരോപിച്ചു. കച്ചവടത്തിന്റെ മറവിൽ ബർമ ബസാറിൽ നടക്കുന്ന അനധികൃത ഇടപാടുകൾ നിയന്ത്രിക്കാൻ നടപടികൾ ഉണ്ടാകണമെന്ന ആവശ്യവും ശക്തമായി ഉയരുന്നുണ്ട്‌.

ബർമ ബസാറിലെ അനധികൃത ഇടപാടുകൾ പോലീസ്‌ നിയന്ത്രിക്കേണ്ടതല്ലേ? നിങ്ങളുടെ അഭിപ്രായം കമൻ്റ് ചെയ്യുക.

Article Summary: RPF constable and friend brutally attacked in Chennai Burma Bazaar while tracking a stolen phone.

#ChennaiAttack #BurmaBazaar #RPFAssault #StolenPhone #KeralaNews #PoliceInaction