ഇടുക്കി: (KVARTHA) ഇടുക്കിയിലെ ബെവ്‌കോ കൊച്ചറ ഔട്ട്‌ലെറ്റിൽ വിജിലൻസ് നടത്തിയ മിന്നൽ പരിശോധനയിൽ കണക്കിൽപ്പെടാത്ത പണം പിടികൂടിയ സംഭവത്തില്‍ കൂടുതല്‍ വിവരങ്ങള്‍ പുറത്ത്. ഇതേത്തുടർന്ന് നടപടികളിൽനിന്ന് രക്ഷപ്പെടാൻ ജീവനക്കാർ അണിയറ നീക്കങ്ങൾ തുടങ്ങിയതായി റിപ്പോർട്ട്. പിടിച്ചെടുത്ത പണം സ്വകാര്യ വ്യക്തിയിൽനിന്ന് വായ്പയായി തരപ്പെടുത്തിയതാണെന്ന് വ്യാജ രേഖയുണ്ടാക്കി കേസിൽനിന്ന് തലയൂരാനാണ് ശ്രമം നടക്കുന്നത്.

മദ്യത്തിന് അമിതവില ഈടാക്കുന്നു, ഉപഭോക്താക്കൾക്ക് ബിൽ നൽകാതെ മദ്യവിൽപ്പന നടത്തുന്നു എന്നിങ്ങനെ നിരവധി പരാതികൾ ലഭിച്ചതിനെ തുടർന്നായിരുന്നു വിജിലൻസ് ഇടുക്കി യൂണിറ്റ് ഡിവൈഎസ്പിയുടെ നേതൃത്വത്തിൽ മിന്നൽ പരിശോധന നടത്തിയത്. റെയ്ഡിൽ ജീവനക്കാരന്റെ കാറിൽനിന്ന് 19,000 രൂപയാണ് കണക്കിൽപ്പെടാതെ പിടിച്ചെടുത്തത്. ഈ കേസിലാണ് ജീവനക്കാർ വ്യാജരേഖകളുണ്ടാക്കി രക്ഷപ്പെടാൻ ശ്രമിക്കുന്നതായി വിവരം ലഭിച്ചിരിക്കുന്നത്. ഔട്ട്‌ലെറ്റ് പ്രവർത്തിക്കുന്ന കോമ്പൗണ്ടിൽ നിർത്തിയിട്ടിരുന്ന ജീവനക്കാരന്റെ കാറിൽ സൂക്ഷിച്ച നിലയിലാണ് ഈ പണം കണ്ടെത്തിയത്.

2023-ൽ ഓപ്പറേഷൻ മൂൺലൈറ്റിന്റെ ഭാഗമായി നടന്ന റെയ്ഡിലും ഇവിടത്തെ ഒരു ജീവനക്കാരന്റെ കൈവശത്തുനിന്ന് കണക്കിൽപ്പെടാത്ത 20,000 രൂപ പിടിച്ചെടുത്തിരുന്നു. എന്നാൽ, ഈ പണം സമീപത്തെ വ്യാപാരി ചില്ലറ മാറ്റാൻ ഏൽപ്പിച്ചതാണെന്ന് അന്ന് ജീവനക്കാർ പറഞ്ഞിരുന്നു. വ്യാപാരിയും മൊഴിയിൽ ഉറച്ചുനിന്നതോടെ അന്ന് നടപടികൾ ഉണ്ടായില്ല. അതേസമയം, സ്ഥാപനത്തിലെ അഴിമതികൾ സംബന്ധിച്ച പരാതിയിൽ മാനേജിംഗ് ഡയറക്ടർ നേരിട്ട് അന്വേഷണം നടത്തി നടപടി സ്വീകരിക്കാൻ ബെവ്‌കോയ്ക്ക് എക്സൈസ് വകുപ്പ് മന്ത്രി നിർദേശം നൽകിയിട്ടുണ്ട്.

സ്ഥലം മാറ്റിയാലും മടങ്ങിയെത്തും

കൊച്ചറയിലെ ഔട്ട്‌ലെറ്റിൽനിന്ന് ജീവനക്കാരെ സ്ഥലം മാറ്റിയാലും ഉന്നത തലത്തിൽ സ്വാധീനം ചെലുത്തി പോയതിന്റെ ഇരട്ടി വേഗത്തിൽ തിരിച്ചെത്തുമെന്നാണ് പറയപ്പെടുന്നത്. പൊതുസ്ഥലംമാറ്റത്തിന്റെ ഭാഗമായി സമീപത്തെ ഔട്ട്‌ലെറ്റുകളിലേക്ക് മാറ്റപ്പെട്ടവരും ഇതേപോലെ മടങ്ങിയെത്തിയിട്ടുണ്ട്. ഇതിന് ഇവരെ സഹായിക്കുന്നത് ഭരണകക്ഷിയിലെ ട്രേഡ് യൂണിയൻ നേതാക്കളിൽ ചിലരാണെന്നും ആരോപണമുണ്ട്.
 

ബെവ്‌കോ ഔട്ട്‌ലെറ്റുകളിലെ ഇത്തരം അഴിമതികളെക്കുറിച്ച് നിങ്ങളുടെ അഭിപ്രായം എന്താണ്? കമന്റ് ചെയ്യുക.

Article Summary: Vigilance raid at Bevco outlet, unaccounted cash found.

#Bevco #VigilanceRaid #Idukki #Corruption #UnaccountedCash #KeralaExcise