കൊച്ചി: (KVARTHA) സുരക്ഷാ ജീവനക്കാരന് യൂത്ത് കോൺഗ്രസ് നേതാവിന്‍റെ ക്രൂര മര്‍ദനം. സൂപ്പർ മാർക്കറ്റിനു മുന്നിൽ കാർ പാർക്ക് ചെയ്യാനുള്ള സ്ഥലത്ത് സ്കൂട്ടർ പാർക്ക് ചെയ്യരുതെന്ന് പറഞ്ഞതിനാണ് ആലുവ ആശാൻ ലൈൻ സ്വദേശിയായ അന്നപ്പിള്ളി ബാലകൃഷ്ണനെ (73) മര്‍ദിച്ചതെന്നാണ് പരാതി. സംഭവത്തില്‍ യൂത്ത് കോൺഗ്രസ് സമൂഹമാധ്യമ വിഭാഗം എറണാകുളം ജില്ലാ കോഓർഡിനേറ്റർ കുട്ടമശേരി കുന്നത്ത് കോളായിൽ കെ.ബി. ഇജാസിനെതിരെ ആലുവ പോലീസ് കേസെടുത്തിട്ടുണ്ട്. തിങ്കളാഴ്ചയുണ്ടായ മർദനത്തിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്.

ആലുവ ചെമ്പകശേരി ജംക്ഷനിലെ ഒരു സൂപ്പർമാർക്കറ്റിന്റെ പാർക്കിങ് ഏരിയയിലാണ് സംഭവം നടന്നത്. ഈ സൂപ്പർമാർക്കറ്റിലെ സുരക്ഷാ ജീവനക്കാരനാണ് ബാലകൃഷ്ണൻ. ഇജാസിനൊപ്പം എത്തിയതെന്ന് കരുതുന്ന ഒരാൾ സ്കൂട്ടർ പാർക്ക് ചെയ്യാൻ ശ്രമിക്കുമ്പോൾ, കാർ പാർക്ക് ചെയ്യുന്നിടത്ത് സ്കൂട്ടർ വെക്കരുതെന്നും അത് മാറ്റി പാർക്ക് ചെയ്യണമെന്നും ബാലകൃഷ്ണൻ പറഞ്ഞുവെന്നാണ് പരാതി. ഇതോടെ ഇയാൾ സ്കൂട്ടർ മാറ്റാൻ ശ്രമിക്കുമ്പോൾ സ്ഥലത്തെത്തിയ ഇജാസ് ബാലകൃഷ്ണനോട് സംസാരിക്കുകയും പിന്നാലെ മർദിക്കുകയുമായിരുന്നുവെന്നും ആരോപണമുണ്ട്.

മുഖത്തും നെഞ്ചിലും മർദനമേറ്റ ബാലകൃഷ്ണൻ്റെ ഒരു പല്ല് ഇളകിപ്പോയെന്നും കണ്ണടയുടെ പൊട്ടിയ ചില്ല് തറച്ച് കണ്ണിനും പരുക്കേറ്റുവെന്നും പരാതിയിൽ പറയുന്നു. പരാതിയുമായി വൈകിട്ട് 4 മണിക്ക് സ്റ്റേഷനിൽ എത്തിയ ബാലകൃഷ്ണനെ രാത്രി 9 മണിക്കാണ് വിട്ടയച്ചതെന്ന് അദ്ദേഹത്തിന്റെ വീട്ടുകാർ ആരോപിച്ചു. കേസ് ഒത്തുതീർപ്പാക്കാൻ പോലീസ് ശ്രമിച്ചതായും ആക്ഷേപമുയർന്നിട്ടുണ്ട്.
 

പാർക്കിങ് തർക്കങ്ങളെ തുടർന്നുണ്ടാകുന്ന ഇത്തരം സംഭവങ്ങളെക്കുറിച്ച് നിങ്ങളുടെ അഭിപ്രായം എന്താണ്? കമൻ്റ് ചെയ്യുക.

Article Summary: Youth Congress leader allegedly assaulted security guard over parking.

#Aluva #Assault #YouthCongress #ParkingDispute #KeralaPolice #CCTV