ആലപ്പുഴ: (KVARTHA) നാലാം ക്ലാസ് വിദ്യാർഥിനിയെ രണ്ടാനമ്മയും പിതാവും ക്രൂരമായി മർദിച്ചതായി പരാതി. ആലപ്പുഴയിലെ ആദിക്കാട്ടുകുളങ്ങരയിലാണ് സംഭവം. പാലമേല്‍ ഗ്രാമ പഞ്ചായത്ത് പരിധിയിലെ അൻസറും രണ്ടാം ഭാര്യയും ചേർന്നാണ് കുട്ടിയെ മർദിച്ചത്. സംഭവത്തിൽ നൂറനാട് പോലീസ് കേസെടുത്തു. കുട്ടിയുടെ ശരീരത്തിൽ ചുവന്ന പാടുകൾ കണ്ട അധ്യാപകർ വിവരം അന്വേഷിച്ചപ്പോഴാണ് മർദനത്തിന്റെ ക്രൂരത പുറത്തുവന്നത്. രണ്ടാനമ്മയും പിതാവും ചേർന്ന് മർദിക്കാറുണ്ടെന്ന് കുട്ടി അധ്യാപകരോട് പറഞ്ഞു. തുടർന്ന് അധ്യാപകരാണ് പോലീസിനെ വിവരമറിയിച്ചത്.

നോട്ടുബുക്കിലെ അനുഭവക്കുറിപ്പ്

നോട്ടുബുക്കിൽ കുട്ടി എഴുതിയ അനുഭവക്കുറിപ്പിലെ വരികൾ ഏറെ വേദനിപ്പിക്കുന്നതാണ്. 'എനിക്ക് അമ്മയില്ല കേട്ടോ', 'ഒരു പ്ലേറ്റ് ചോദിച്ചപ്പോൾ ഉമ്മി കരണത്തടിച്ചു' എന്നിങ്ങനെ തുടങ്ങുന്ന കുറിപ്പിൽ, രണ്ടാനമ്മ ചെറിയ കാര്യങ്ങൾക്ക് പോലും ഉപദ്രവിക്കാറുണ്ടെന്ന് കുട്ടി പറയുന്നു. 'അനിയനുമായി വഴക്കിട്ടപ്പോൾ അമ്മ വായയുടെ ഭാഗത്ത് അടിച്ചു', 'വാപ്പയും ഉമ്മയും എന്നോട് ക്രൂരതയാണ് കാണിക്കുന്നത്' എന്നും കുട്ടി എഴുതിയിട്ടുണ്ട്. രണ്ട് മാസം മുൻപാണ് പുതിയ വീട്ടിലേക്ക് മാറിയതെന്നും അതിനുശേഷം കൂടുതൽ പേടിപ്പെടുത്തുകയും ഭീഷണിപ്പെടുത്തുകയും ചെയ്യുന്നുണ്ടെന്നും കുറിപ്പിൽ പറയുന്നു.
 

കുട്ടികൾക്കെതിരായ അതിക്രമങ്ങൾ തടയാൻ എന്തു ചെയ്യാം? നിങ്ങളുടെ നിർദ്ദേശങ്ങൾ പങ്കുവയ്ക്കുക.

Article Summary: A fourth-grade student was cruelly beaten by her stepmother and father in Alappuzha. Police have filed a case.

#ChildAbuse #Alappuzha #KeralaPolice #ChildSafety #CrimeNews #KeralaCrime