മലപ്പുറം: (KVARTHA) ജില്ലയിലെ കോട്ടയ്ക്കൽ നഗരസഭാ പരിധിയിലും വേങ്ങര, ചെമ്മാട്, ചെറുമുക്ക് മേഖലകളിലും നേരിയ ഭൂചലനം അനുഭവപ്പെട്ടു. ചൊവ്വാഴ്ച (23.12.2025) രാത്രി 11.20 ഓടെയാണ് വിവിധയിടങ്ങളിൽ പ്രകമ്പനമുണ്ടായത്. ഇടിമുഴക്കം പോലുള്ള വലിയ ശബ്ദത്തോടെ ഭൂമി കുലുങ്ങിയത് ജനങ്ങളെ പരിഭ്രാന്തിയിലാഴ്ത്തി. കോട്ടയ്ക്കൽ നഗരസഭയിലെ ആമപ്പാറ, കൈപ്പള്ളിക്കുണ്ട്, കോട്ടപ്പടി, പാലത്തറ, ചെനയ്ക്കൽ, സ്വാഗതമാട്, ചീനംപുത്തൂർ, അമ്പലവട്ടം, കൊഴൂർ, ചെറുശോല, കൂരിയാട്, മറ്റത്തൂർ, കൊളത്തുപ്പറമ്പ്, ചോലക്കുണ്ട്, പുത്തൂർ തുടങ്ങിയ ഭാഗങ്ങളിലാണ് ഭൂചലനം രൂക്ഷമായി അനുഭവപ്പെട്ടത്.

ഈ പ്രദേശങ്ങളിലെ വീടുകളും മറ്റ് കെട്ടിടങ്ങളും ശക്തമായി കുലുങ്ങിയതായാണ് വിവരം. ചിലയിടങ്ങളിൽ ഭൂമിക്കടിയിൽ നിന്ന് മുഴക്കം കേട്ടതിന് പിന്നാലെ ശബ്ദം വീണ്ടും ആവർത്തിച്ചതായും നാട്ടുകാർ പറഞ്ഞു. പ്രകമ്പനത്തിന്റെ ആഘാതത്തിൽ ചില വീടുകൾക്ക് വിള്ളൽ വീണിട്ടുണ്ട്. പലയിടങ്ങളിലും വീട്ടിലെ പാത്രങ്ങളും മറ്റ് സാധനങ്ങളും താഴെ വീണതായും റിപ്പോർട്ടുകളുണ്ട്. ശബ്ദം കേട്ട് ഭയന്ന പലരും രാത്രിയിൽ വീടുകളിൽ നിന്ന് പുറത്തിറങ്ങിയോടി.

കോട്ടയ്ക്കലിന് പുറമെ വേങ്ങര, ചെമ്മാട് സി കെ നഗർ, ചെറുമുക്ക് തുടങ്ങിയ ഭാഗങ്ങളിലും സമാനമായ രീതിയിൽ ഭൂമി കുലുങ്ങിയതായി വിവരമുണ്ട്. സെക്കൻഡുകൾ മാത്രമാണ് പ്രകമ്പനം നീണ്ടുനിന്നതെങ്കിലും ജനങ്ങൾ വൻ ഭീതിയിലാണ്. മേഖലയിൽ മുൻപും സമാനമായ രീതിയിൽ ഭൂമിക്കടിയിൽ നിന്ന് ശബ്ദം കേട്ടതായി പറയപ്പെടുന്നുണ്ടെങ്കിലും ഇത്തവണത്തെ ശബ്ദം ഇടിമുഴക്കം പോലെ അതിശക്തമായിരുന്നുവെന്ന് പ്രദേശവാസികൾ സാക്ഷ്യപ്പെടുത്തുന്നു.

സംഭവത്തെത്തുടർന്ന് റവന്യൂ അധികൃതർക്കും ദുരന്തനിവാരണ വിഭാഗത്തിനും വിവരങ്ങൾ കൈമാറിയിട്ടുണ്ട്. പലയിടങ്ങളിലും ജനങ്ങൾ ഉറങ്ങാതെ വീടിന് പുറത്തുതന്നെ കഴിയുന്ന സാഹചര്യമുണ്ടായി. നിലവിൽ ആളപായമോ വലിയ നാശനഷ്ടങ്ങളോ റിപ്പോർട്ട് ചെയ്തിട്ടില്ലെങ്കിലും വീടുകൾക്ക് വിള്ളൽ വീണ സാഹചര്യത്തിൽ അധികൃതർ പരിശോധന നടത്തും.

മലപ്പുറത്ത് ഭൂമിക്കടിയിൽ നിന്ന് മുഴക്കവും ഭൂചലനവും ഉണ്ടായ വാർത്ത ഷെയർ ചെയ്യൂ.

Article Summary: Mild earthquake and loud sounds reported in Malappuram district.

#Malappuram #Earthquake #Kottakkal #Vengara #KeralaNews #Emergency